YAKOBO 1 - Bibilia Kui Mdedie fo Kimochi

Kiiṟikiṟo

¹ Inyi Yakobo njii isinga lya Ruwa na lya Mndumii Yesu Kristo ngaiṟikiṟa njoshari tsilya ikumi na tsiwi tsilee wahenunyi.

Wuidiki na Wulaanyi

² Wanawawama wako, kokoya moshika ihoyo shihesho shiwe na shiwe, iki mukitane sia ii njenyi.

³ Mochimanya ke kilya kiihesha wuidiki wonu kiende wukuhodi.

⁴ Indi wukuhodi wu wumarisie iṟunda lyawo ipfo kundo nyo mochiawukya muhendechia wyoo mulapfuwae ma kya iki ma kya iki.

⁵ Indi kokoya ipfo konu kwipfo atoṟowae wuṟango, o naterewe Ruwa chu ekenengya wose alasambuṟa alechideda mndu na echienengo.

⁶ Indi naterewe ai mwidiki nalawone apfio nyi mdo; kyamba mopfio nyi mdo afananyi na isinanu lya ipalyipalyi likeri isingitso-singitso nyi otanu lyechipongaikapongika.

⁷ Mndu amba adi ma nalahambe ke nyi echienengo kindo nyi Mndumii.

⁸ Ai mndu o mrima iwi awa motangatanga njiehu tsake tsose.

Wukiwa na wusuṟi

⁹ Indi manowama chu mtutu nakuṟumishe kya mng'ano foke.

¹⁰ Indi ichu msuṟi nawekuṟumisha kya wututu woke kipfa echisia cha kiwaṟo kya maṟenyi.

¹¹ Kyamba mnengeṟi fodo fuiwaa na mbaṟi fukanaṟa maṟa, na shiwaṟo shaho shikaanama na lole yasho ikadeka. Na wudo mndu msuṟi echikoṟosoka njohendonyi tsake.

Shihesho

¹² Nanga mndu msoṟo aikuhoda kiheshyonyi, kipfa ili ambangohoda echiambya oṟo iya nchope, nyiyo moo fu Ruwa alemteṟya walya wamkundi.

¹³ Mndu aihesho ma nalahambe, ke nyi Ruwa anjihesha. Kyamba Ruwa alahesheka na shindo shiwicho, nao amonyi ahesha mndupfo.

¹⁴ Indi orio mndu ose ahenda ihesho nyi lango tsake tsi njenyi tsechimkuruo-kuruo na imhomuo-homuo.

¹⁵ Ilindi lango yamaa yambya yafee wunyamaṟi, indi wunyamaṟi wukamaa itano woende opfu.

¹⁶ Wanawawama wako wakunde, ma muladekesho.

¹⁷ Orio kisumbo kyose kii kicha, orio kinego kyose kii kya sungusihu kichee huye, kisokie kyechiwuka ko Wande mowika sa tsose. Na ipfo koke kuwode ma mhaluye mliwe manya mṟishe mangu fo masehyanopfo.

¹⁸ Nyio alekunda kalufee so kui idedo lya kii-lohi kundu lukae-pfo lui odambiko lulya lo wuwee lusongoe mawumbe hake.

Iicho na iwuta

¹⁹ Iki mukiichi, wanawawama wako wakunde. Indi orio mndu nawe mwangu kui yadanya na mlemeri kui ideda na mlemeri kui idosa nyashi.

²⁰ Kyamba nyashi ya mndu ilekeṟundya wusumhanyi wo Ruwa.

²¹ Nkyo kimwenenge muhende kuatuo orio ngafu yose na wumbafu wufo wudo.

²² Na idedo lyo lii iwaye konyu lyo muliwade muwe watanyi wa idedo, mulakae weliadanya tupu mochikulemba muwenyi.

²³ Kipfa kokoya mndu aadanyia idedo alawa mtanyi nyio ai cha kilolenyi.

²⁴ Kyamba o ili amekuambuya alewuka-ho kahenda ihadima na limu fana iya awefanyi.

²⁵ Indi ichu alekulemya wuwawaso-hu wu wusumhanye njora tsose iwu wo ikuachia, o awa mokaika kechiwuambuya, alai moadanya kya ihadima indi ai mtanyi motana kindo lohi-nyio echiwa mosumbo sia ipfo mbutienyi yake.

²⁶ Kokoya mndu ahamba ke ai menyi-wuindi nao alaapfinya olimi loke indi alemba ngoo yake, wuindi wu woke wukeri wo wulya.

²⁷ Wuindi wuharami wulafanyi oshangunyi lo Ruwa Wande wukeri wule, isenguda wana wangoeda na waka wa kusu iwa wai walise wukiwa na ikuṟisa ihenda fanytso nyi wuyana wu.