WAROMA 9 - Bibilia Kui Mdedie fo Kimochi

¹ Njiideda kya lohi njii Kristo-hu, njihamba wongopfo, na ngo tsa mrimenyi foko tsii-njiwanze nyi Mumuyo Mwele tso tsanjiikanya ihoṟotsa kiṟingishyo ki.

² Ke njiwodo mnu mfowa na mawawio ipfo ngoonyi na wukiwa wochitochatocha kitsitsi kipfa kya wandu wako lui samu imu.

³ Kyamba njiwekundi ke inyi njimonyi njitano msese kyewa lyenenga wanawawama wako wa mkambo fumu na inyi wawehenda ikiṟo.

⁴ Wo nyiwo wai Waisraeli sa Ruwa alewasambuṟa wawe wana wake, kawasumba wuitoṟi na mkundana fulya na wuwawaso wulya na wuindi woindya Ruwa na shyasa shilya.

⁵ Na waku walya na wawo, na ipfo kowo Kristo achee apaṟikye kowo ili amefeo mndu, nyio Ruwa mokaa huya-shose moichimbiṟo mlungana. Amenyi.

⁶ Manya chi cha ili idedo lya Ruwa lilachikiepfo. Kyamba chi wandu wose iwo wapaṟikye ko Israeli wai wambuṟe wa Ruwapfo.

⁷ Cha kipfa chi iwa wai luwa lya Abrahamu wakeri wana wosepfo, Chando Madedo Maele hahambye “Luwa lyapfo nyi lyechiuka ko Isaki.”

⁸ Lyo likeri lile; ke wana wawafee kimbihu chiwo wai wana wa Ruwapfo chila nyi wana wawafee kui kyaasenyi nyiwo sa waitalo ke wai luwa.

⁹ Kyamba kyaasa kilya nyi, “Alya cha wulalu njechiicha-se njikoye Sara awode mana.”

¹⁰ Kya indi chi ikyo kyake tupupfo, na kya Rebeka ili awekupfungye wamboṟa awuta ko ichu umu nyio ndeyadu so Isaki.

¹¹ Kyamba kyawo ma indi wana walawendefeo ma walawendewuta kiwe kii kicha kiwe kii kiporu kashika iwio kyewadumbuya, kundu kyama kya Ruwa kyesambuṟa kikae-ho kechitoṟya.

¹² Kilahendeke kyechiwa na mweke fo ngaata tsa mndu kya indi kiwukye ko Ruwa ichu modika ndaho kikyenyi, nakyo kiwei kiile, ke wawae nyi echisingya manawo.

¹³ Na wudo ku-kuṟehie ke, “Yakobo nyio njilemkunda indi Esau nyio njilemleha.”

¹⁴ Aka luhambe luda? Kulako Ruwa nyi aledeko? Manya-le

¹⁵ kyamba nyi awie Mose, “Njechisaṟia ichu njechikunda imsaṟia.”

¹⁶ Alewo koka na wudo kii kindo-kyo kyawa ikundo nyi mndu ang'u iidikyo nyiopfo kya indi kii kya Ruwa mosaṟya amonyi.

¹⁷ Kyamba Maṟehyo Maele hahambye kya Farao, “Kitewe ngakuwika mangi nyi kundu njimanyishye kopfo pfinya yako mbode na rina lyako liweongoya ipfo orukenyi kose.”

¹⁸ Kyasia ng'u Ruwa nekesaṟia icho ose akunda imsaṟia; ichu amdumbuya kyemumiṟa nyi aimumiṟa.

Tuke na osaṟio lo Ruwa

¹⁹ Kulako nyi ochireeka na inyi nonjiwie, “Nyi kiili Ruwa awonya-se mndu owingo? Kyamba nyi o ku awehodana na kyama kyake?”

²⁰ Hoo iyo ui mndu o wandu; nyi ukeri o ku koanduyana na Ruwa? Aka kindo kiwumbe kitane kyawia mokiwumba, “Nyi kiili untanye kudi?”

²¹ Mowumba chi awode pfinya na kilya alewumba nakuwutye chando akundi kumu kakuwumbya kihia kyechia kumu kakuwumbya-ho sa kyefana.

²² Indi Ruwa narie imanyishya shihia shilya shimpfulutsya nyashi tuuke yake, na iloṟa-ho kilya akuidimye nyi ashilelye na wuleeli wung'anyi ma shishitsye ihenda rumatso.

²³ Nyi kundu nawemanyishya-ho mfoe fo wuitoṟi woke alya shihie-hu shirio nyi wutonga woke isho alesonguo ishiteseheṟya wuitoṟi wulya.

²⁴ Nawo nyiso so alelulaha lupaṟikye chi ko Wayuda tupupfo kya indi na ipfo mkambonyi ya wahenu.

²⁵ Kiidikyanyi na kilya ahambye kui dumbu lya Hosea; “Njechilaha fulawei mkambo fuwe mkambo foko. Na ichu alawei mkunde nawe Mkunde oko.

²⁶ Na mwikimbi ipfo kundo wawekewio, Nyo mukeri wandu wakopfo mpfondo wechikaa wasendo wana wa Ruwa menyi-moo.”

²⁷ Na Yesaya apoṟohoṟya Israeli, “Kukoye mfoye fo wana wa Israeli wueshikya cha mbuṟusanga tsa mbai ya ipalyipalyi lya wuyana sa wechikiṟo-ho nyi waangu tupu.

²⁸ Kyamba Mndumii nyi echimarisa iwika kitanyo na limu na idumbwo teṟe ipfo sangenyi lyose.”

²⁹ Kiwe chando Yesaya alewesonguo ihamba, “Kima Mndumii Menyi-Matoṟito alawelutsuhaṟya luwa nyi luwewa cha Wasodomu na ifanana na Wagomora.”

Waisraeli na Ndumi ya Sia

³⁰ Aka luhambe luda? Nyi kikeri kiile wa mkambo mhenu walawewingya wuhoṟotsu, oshangunyi lo Ruwa wo wakawada wuhoṟotsu, oshangunyi lo Ruwa, kui wuidiki.

³¹ Indi Israeli ili iweiwingya wuhoṟotsu oshangonyi lo Ruwa ikusirye na wuwawaso ileshika ikoya wuwawasopfo.

³² Nyi ki kyaduma? Nyi kipfa ilawekuwode kiwanje-hu kya wuidiki indi iwekuwode kiwanje-hu kya mawuto ikakapa mtuulya alya iho-hu lya mtuulya.

³³ Chando Madedo Maele hahambie, “Ambuya a ulya ngaleṟya iho lyekapya mtuulya kulya Sioni na piita ya iho yedekesha. Mdu moidikia ichu ai iho lyo echisukapfo.”