WAROMA 6 - Bibilia Kui Mdedie fo Kimochi

¹ Aka luihamba luda ngesa? Lukaae lochiwuta kya wunyamaṟi, kundu wotonga wushike ifo ko? O, manyale.

² So lukamaa iwiia wunyamaṟi wapfu, nyi wuda luwuye-se ikaa nawo lingi ngesa?

³ Ang'u mokaa mulaichi ke so ili luiwapatisye Kristo Yesu nyi lui wapatisye opfu loke?

⁴ Kikawa kido nyi lui-waṟike kimu nao opfunyi kulya kui wupatiso kundu chando Kristo aleweṟutso wapfunyi kui wuitoṟi wo Wande na wudo so lukae-ho lochihendekya luirie moo mhya.

⁵ Kyamba kokoya lomehenda ilungyo kila kya opfu lulya loke, na kya iṟuka lyake na lochihenda ikilungyo.

⁶ Kilya lukiichi kikeri kiile; ke wumndu wodu lui-wawike nawo, wo womaa ihenda ikapyo msalabe-hu kimu nao kundu mbihu-fu fuichiwie inyamaṟa fudi fuhende irumara so lulakisingye-se wunyamaṟi.

⁷ Kyamba alyando mndu o wandu amhenda ipfa nyi aimdumbwo mwaanya fonyamaṟa.

⁸ Indi kokoya lomhenda ipfa kimu na Kristo nyi luidikie ke lochikaa nao.

⁹ Nyi luichi ke Kristo alemeṟutso wapfunyi ekifasepfo, opfu lokimwidimasepfo.

¹⁰ Kyamba kilya alepfa kyakyo nyi alepfa kya wunyamaṟi ili limu lyedumbwo teṟe, indi iki kimbode ili ai-ho na moo nyi kii-le; ke nyi ai mopfuṟukanya nafo Ruwa.

¹¹ Nanyo na wudo kewekuitalenyi mui wandu wawewiia wunyamaṟi wapfu, na moo muwode nyi mukuwodye nafo Kristo-hu Yesu mochipfuṟukanya nafo Ruwa.

¹² Ko ikyo mulalekie wunyamaṟi wuchilie mbihu yanu yechikaa ipfe muwechiidikyana na lango tsafo.

¹³ Ma mulawone mochidambikya wunyamaṟi shiwungo shanu shiwe shihia sha wukika, kya indi kudambikenyi nyo muwenyi Ruwa cha wandu warie moo waweṟukie nafo wapfunyi, na shiwungo shanu shiwiie Ruwa shihia sha wuhoṟotsu.

¹⁴ Kyamba wunyamaṟi wulechimwidimase, kyamba mulai shi ya wuwawaso kya indi nyi mukeri shi ya wutonga.

Chando kiwaṟi iwa wahendeli

¹⁵ Alewo kiwukye-ho nyi ki? Ke luwute kya wunyamaṟi kipfa ili lulai shi ya wuwawaso kya indi lukakaa shi ya wutonga? O, chi wudopfo.

¹⁶ Aka mulaichi ke ichu mochikumdambikya cha masinga kyemwanguya madu nao nyio mombia masinga hake mochimwanguya madu kiwe kya wunyamaṟi woduo opfunyi kiwe kya wuidiki woende wuhoṟotsu oshangunyi lo Ruwa.

¹⁷ Indi Ruwa nawikyo mwaano kipfa muwesia ikaa masinga ha wunyamaṟi mukashika yanguya madu mateteṟa-chu mompfunda muiwadambikye koke mukuwode-ho na mrima msanze.

¹⁸ Indi mlewuto wusingenyi wo wunyamaṟi nyi musingye wuhoṟotsu wu.

¹⁹ Ngadeda njidi kiwandu kipfa mofafaa kui nyama tsanu;) Kyamba chando muwewedambikie shiwungo shanu shiwe shesingya ngafu na wukika wofeṟya-ho wukika, nyi wudo muwe mochidambikya shiwungo shanu wulalu shiwe shechisingya wuhoṟotsu-wu wuduo kiilishyonyi.

²⁰ Kyamba ilindi muwei masinga ha wunyamaṟi mandi-ha muwechi chandu kimuwaṟi iwa wahoṟotsu pfo.

²¹ Nyi kiira kiki mulewona ho mandi halya? Chi kiwei kya mbaṟi imwinengye mopfia kyayo sonu wulalu? Cha kipfa kiira kyakyo nyi opfu.

²² Indi wulalu ili momeletso na wunyamaṟi mukatano masinga ha Ruwa; nyi muwode-ng'u kiira wulalu kimwendie iilisho na kiheṟi kyefurumia nyi moo fo mlungana.

²³ Kyamba wueri wosingya wunyamaṟi nyi opfu, indi kilya Ruwa aisumba nakyo mndu oke nyi moo fo mlungana fukukerye Kristo-hu Yesu Mndumii odu.