WAROMA 5 - Bibilia Kui Mdedie fo Kimochi

¹ Kyasia ili lui-watane ludi wahoṟotsu na mweke fo wuidiki nyi luwode ofoṟo lo ko Ruwa lui-uwikeho nyi Yesu Kristo Mndumii odu.

² Nao nyio aluinengye mtengele fulya foluduo ipfo kundo kuwode wutonga-wu wo Ruwa lukuilikishye nawo na ikuṟumisha kui owedi lowedya wuitoṟi wo Ruwa.

³ Ma chi kya ikyo tupupfo, kya indi lui wakesi ipfo shiwirenyi kipfa nyi luichi shiwira shekeende ikuhoda.

⁴ Na ikuhoda-li lyekeende otsano na otsano-lu lokeende owedi.

⁵ Na owede-lu lohutsa sonupfo kipfa ikunda lya Ruwa liikualya ngoonyi tsadu kui Mumuyo Mwele ichu lui-wasumbe.

⁶ Kyamba Kristo amelupfia so kiheri luwefafae kawepfia walemeshi walemanyi na Ruwa matika na halya.

⁷ Chi kii kiangu ipfa keletsa mndu asumhanyipfo. Kya ichu ai mcha amonyi kofia kuweipfo ekaria ilekia-ho moo.

⁸ Indi Ruwa nyi amanyishye ikunda lyake alukundi nalyo so ipfo kundo Kristo alelupfia kiheri luwei-se wanyamaṟi.

⁹ Kikawa kido naso lui-watane wahoṟotsu wulalu oshangunyi lo Ruwa kui pfinya ya samu iya yake, nyi wuda kya ngoseṟa lochikaa luhende iletso nyio tuuke iya ya Ruwa.

¹⁰ Kyamba kokoya lomhenda yoloṟyo Ruwa kui ipfa lya Mana-chu oke lilyandi luwei kituwenyi, nyi wuda kya ngoseṟa lochikaa luiwaringe ipfo kundo aitsinda na moo ili lui-waoloṟye ludi.

¹¹ Manya chi ikyo lukuwawye na Mndumii odu Yesu Kristo lukamaa yambya mwoloṟye-fu wulalu kui mweke foke.

Adamu na Kristo

¹² Nakyo kihendekie kidi, ke wunyamaṟi wulecha na kunu wuyana kitewe kya mndu umu, na opfu lukacha kitewe nyi wunyamaṟi, nakyo kikaenenga opfu lomhenda idung'ana wandu wose nyi kipfa wanyamaṟie wose.

¹³ Kyamba wunyamaṟi wuwei kunu wuyana kiheri kulawewode wuwawaso, indi wunyamaṟi wulahenda italo alyando kulaipfo wuwawaso.

¹⁴ Kya indi wokia Adamu shika Mose nyi opfu luwei mangi achilie na walya walawenyamaṟye cha Adamu aleumbuya mawawaso ha Ruwa. Nao Adamu nyio awehambie ichu echikaa nache.

¹⁵ Kya indi kiiho na kiira chi shihianyipfo, kyamba kokoya yumbuya lya ichu umu litewye washike ihenda ipfa wadi wafoi nyi wuda kya ngoseṟa wutonga wo Ruwa na ohawi lo wutonga wurio nyi mndu-chu umu Yesu Kristo wusuṟie wafoi walya.

¹⁶ Na kisumbo-ki kya Ruwa kilafananyi na wunyamaṟi wulya wo mndu ulya umu. Kyamba ipfo kundo ulya umu alemhenda yanduyo kukawuka-ho mdumbuye folunga ipfunga kitsitsi, indi kisumbo ki kya wutonga ili kyamcha kitewe nyi marendemko ha wandu wafoi, kyo kyaende msumhantsie fowatana wahoṟotsu.

¹⁷ Nkya lohi wunyamaṟi wo mndu ichu umu wuletewa opfu luchilie wose kimarete kya ichu umu-ho, nyi wuda kya ngoseṟa iwa weambya mfeṟa fo wutonga na fo kisumbo kya wuhoṟotsu wulya nyi wechiwa mangi tsekuachia na moo wakuwode na ichu umu nyio Yesu Kristo.

¹⁸ Nahong'u kihendyekye kidi; ke chando iho lya ichu umu lyendie wandu wose owingo nyi wudo ipfo kundo ichu umu awehoṟoki-ho kechihendelya shose kuendyo wandu wose kihoṟotsa moo.

¹⁹ Cha kipfa chando walya wafoi wamhenda itano wanyamaṟi kitewe nyi wulemi wulya wo mndu-cho umu, na wudo na walya wafoi wechitano wahoṟotsu kimaduma nyi wutechi wo ichu umu-ho.

²⁰ Indi wuwawaso wulya wuweoshye-ho wofeṟya iho lilya. Indi ipfo kundo wunyamaṟi womfo, mpfondo wutonga woshika ifo kawi wochilimba.

²¹ Nyi kyawa kido kundu chando wunyamaṟi wuwei mangi yededa na pfinya ya opfu nyi wudo wutonga wuwe mangi ipfo mengenyi ya wuhoṟotsu wochiwika moo fo mlungana fo ipfo Mndumii-hu odu Yesu Kristo.