WAROMA 3 - Bibilia Kui Mdedie fo Kimochi

¹ Kikawa kido Myuda wawodeki kya ngoseṟa kota wandu wengi? Na odino lulya loekya ki?

² Mwidye fu a fui-pfo foringa njora tsose. Kya kuwoka Wayuda nyi waiwadambikye mbia tsa Ruwa.

³ A nyi ki-wo ili kuweipfo waleletsihendelya? Alae wuṟingi wu wowo wushike iwuta-ho wuhendeli wo Ruwa ko?

⁴ Oo! Manyale Ruwa nyi mhendeli kiheri kyose indi orio mndu o wandu ai mowongo chando ku-kuṟehye, “E-wo Ruwa, orio mandi omededa.”

⁵ Indi kokoya wutahachi wu wodu wowikya wudi wuhoṟotsu wo Ruwa kiṟingishyo luhambe luda ngesa? Kulako Ruwa nekedeko echilekia tuuke yake iluhoye ko? Ngadeda njido mbaṟi ya kiwandu.

⁶ O Manyale! Aka shile nyi wudo nyi wuda Ruwa awechianduya wuyana wu?

⁷ Indi kokoya kiwulohi kya Ruwa kyawutia tewe lyehenda yengeṟya wuitoṟi ipfo hando inyi njii mowongo a nyiki-se inyi njianduyo cha ili njii mnyamaṟi ngesa?

⁸ Kyimu cha ihamba, “Luwute wuwicho kundu luwone mecha?” Wengi nyi wudo ili kwipfo wailuiria wongo na ilusutsa ke nyi wudo lokelosha. Wo wechianduyo owingo lusumhanyi.

Kulaipfo ma umu ai mhendeli

⁹ Kwipfo mndu ma umu aimhendelyipfo? A nyi wuda-se ngesa! So Wayuda lulimbie ngesa? Chi kosepfo. Kyamba lulesonguo ikumba na Wayuda na Wagriki ke nyi wai-walamye nyi wunyamaṟi wose.

¹⁰ Chando kuu-kuṟehye, “Kulaipfo ai mhoṟotsu manya umu.

¹¹ Kulaipfo awode osaaṟe kulaipfo ai mopfula Ruwa.

¹² Wama ihenda itandawuka wose wakalehela wose kakapi. Kulaipfo sa ekewuta kilya kii kicha manya umu.

¹³ Oṟo lowo nyi kipfu kiwedye mnying'a, njolimi tsawo nyi wekelemba natso, ipfo shi-ya momu yawo nyi wuṟoi wo manjoka wuu-wuṟike-pfo.

¹⁴ Dumbu lya-wo liichwo shirumo na shipusiṟo.

¹⁵ Madende hawo hedichya ipusuo samu.

¹⁶ Ipfo kundo wamekuidya-ho kodeoho mawaṟi na mawawiṟo.

¹⁷ Na njia yewika ofoṟo walaimanye.

¹⁸ Ipfo kowo wawode yowuo Ruwa manyale-pfo.”

¹⁹ Kya indi luichi ke isho wuwawaso wuhambye nyi woshiwia walya wai shi ya wuwawaso kundu orio dumbu lipfumbo na wuyana wose wuwone wuu-wuhutsye owingo sumuhana na Ruwa.

²⁰ Kipfa kulaipfo mndu o wandu awetano mhoṟotsu oshanguyi lo Ruwa kui mweke fo mawuto ha-mawawase, kyamba wuwawaso wu kindo wukiendie nyi imanyisha mndu wunyamaṟi woke.

Iidikyo oshangunyi lo Ruwa kui Wuidiki

²¹ Na wulalu wuhoṟotsu wo Ruwa womhenda imanyisho tare wuwawaso indi wuu-wuwikye kiṟingishyo nyi wuwawaso-wo na waikimbi wo.

²² Ruwa neketana wandu wahoṟotsu oshangunyi loke kui wuidiki woidikya Yesu Kristo iwo wamwidikye wadi wose, kyamba kulaipfo mletsano.

²³ Kyamba wandu wose wawenyamaṟie na iwuṟa wawewuṟye ngeela ya Ruwa.

²⁴ Nyi wai-watane wahoṟotsu ki wutonga woke walawewika-ho kindo likawa na oletso lulya luleendo nyi Kristo Yesu.

²⁵ Nao nyio Ruwa alemtana njoko yeoloṟa mondu fulya, iwe kui samu yake ko iwo womemwidikya. Nalewuta ado kundu namanyishe wuhoṟotsu wu woke na kya mwidyo fulya aweidya matahachyo halya ha kacha mwidyo.

²⁶ Nyiho naho Ruwa alewa mokukarishya kyaho kundu namanyishye-ho wuhoṟotsu wu woke, kiheri kya wulalu kumanyike-ho ke nyio amonyi ai mhoṟotsu kawewa motana na ichu aidikye Yesu mhoṟotsu.

²⁷ A mwaanya fokushela ku foya ngesa? Nyi fumbikye hima. Nyi kui mweke fo wuwawaso wuki? Nyi wulya woringa iawutsia mawuto ngesa? Manyale, kya indi nyi kipfa luidikie.

²⁸ Nyihondo lokuwutya-ho ihamba ke mndu o wandu aitano mhoṟotsu ili awa mwidiki kulawode nyi iawutsia mawuto hamaringe nyi wuwawaso wulya.

²⁹ Alae Ruwa nyi o Wayuda tupu ko? Chi nao mkambo ingi riti wo? E-ko na o mkambo ingi riti!

³⁰ Ruwa nyi umu echitana ichu mdine nawe mhoṟotsu kui wudiki na ichu alai mdine nawe wa mhoṟotsu kui wuidiki.

³¹ Ashika kikawa kido luilache wuwawaso luwike-ho wuidiki ngesa? O ma-le kya indi nyi ikapya wuwawaso owanzo lukeri.