WAROMA 15 - Bibilia Kui Mdedie fo Kimochi

Denyi ikukundia

¹ Indi so luwangi wuidikinyi kiluwaṟi idaṟana na waleheshi walya hando wafafae, lulawone lochikulisiṟa luwenyi.

² Orio mndu odu nawe molisiṟa odoe na kilya kii kicha kiwe kechimira.

³ Kyamba nao Kristo alalekulisiṟa amonyi, kya indi kiwehendekye kuu-kuṟehye, “Shiisalucho sha walya walekuisalucha iyo nyio inyi shikanjihoya.”

⁴ Kyamba shilya shileṟehyo mbooko nyi shilemmaa iṟehyo shelulosha-so, kundu lukuwutye ikaa lochikusihya ipfo kundo mṟeho-yo ihambye ikukarishya lya waidiki wa kacha yechiluwihiṟya nalyo moo.

⁵ Nao Ruwa chu ai mokarisha na iwihiṟya moo namuenenge muwe mochikusaṟa kimu nyo muwenyi na wenyi, kiwe kyechihiana na Yesu Kristo.

⁶ Kundu muwe mochiwikya Ruwa mng'ano, ichu ai Nde o Mndumii odu Yesu Kristo, fuwe fochiwikyo-ho kui mrima ii msanze cha ili kui-ho modeda umu mfi.

Mbonyi tsa sia ko wandu wose

⁷ Nkyo kimwitike muhende yambyana nyo muwenyi na wenyi chando na Kristo alewemuambya nyo kyewikya Ruwa mng'ano.

⁸ Kyamba ngamuwia Kristo nyi alewa mopfuṟukanya Wayuda kemanyisha-ho kiwulohi kya Ruwa nainutsye-ho shaasa Ruwa shilya waku walya walewikyo,

⁹ kundu mkambo iya mhenu waṟumishe Ruwa kipfa kya osaṟio loke lowasaṟya. Chando kuu-kuṟehye, Nkyo kyaenenga njechikuṟumisha ipfo mkambonyi mhenu na iimbya kiṟumi kya rina lyapfo.

¹⁰ Kukawuya kukahambo-se; Nyo mkambo mhenu ke chihionyi kimu na mkambo fu foke.

¹¹ Na lingi-se, “Keichikenyi Mndumii nyo mose mbaṟi tsa wandu, mkambo yo iwe yechimwichika yose.”

¹² Na lingi-se Yesaya ahambie, “Kochicha mndu kuwuka kisharinyi kya Yese, msa echiikolonya mkambo ya wandu, nao nyio wa mkambo-ii wechimwidikia.”

¹³ Nao Ruwa-chu mokusihyo adi nawe mombonya nyo mfeṟa fo orio msiha fose na ofoṟo shirianyi na mwidikye fomwidikya kundu mukusuṟye necha mui na mkusihye kui pfinya ya Mumuyo Mwele.

Mṟumo fo Paulo

¹⁴ Na inyi mmonyi, wanawawama, njikusirya kyanu nyo ke muwelukye wutechi welu mukaichuo wulaanyi wose mukatana moidima iloshana muwenyi.

¹⁵ Indi njilawode wuowu ngaṟehya mbonyi kui shinengele cha ili njimtamṟa njiimchihie nyi wutonga njimsumbe nyi Ruwa.

¹⁶ Mumanye ke inyi njii mwongoi o Kristo Yesu a-mdume ko mkambo ya wandu mhenu njiwe mowoongoya Ndumi ya Sia ya Ruwa ya okiio, kundu wa mbaṟi tsingi tsa wandu wawe odambiko luchihianyi na Ruwa lui-uheṟemtse nyi Mumuyo Mwele.

¹⁷ Mpfo kundo kiṟumi kya wusongoṟu woko kiwukye iki njiwode ipfo Kristo-hu Yesu wopfuṟukanya shilya shii sha Ruwa.

¹⁸ Kyamba njilakarya ihamba kindo shile nyi shilya Kristo aletana anjiwode kihia kyake kyeangushya mkambo mhenu madu kui ideda na iwuta.

¹⁹ Kikawa kui pfinya ya shichano na maṟiho shiweiwiko nyi Mumuyo Mwele, fo Ruwa. Kui ichumia lyako orio handu, wokia Yerusalemu ngashika Iliriko, ngaonguo Ndumi ya Sia ya Kristo kui Wusalari.

²⁰ Indi ngakunyasha njidi ke njechiongoya Ndumi ii ya Sia kundo kulandesendyo rina lya Kristo, njilawone njechihenda iwika mba ipfo kundo ungi awehye-ho otende.

²¹ Kya indi kihendekye chando kuukuṟehye, “Iwo walandeongoyo mbonyi tsake wahende imbona, na iwo welandeicho kyake wahende immanya.”

Chila ya Paulo yehenda Roma

²² Nakyo nyikyo kiwenjishingye njia kafoi yeshika konu.

²³ Indi wulalu ngamemarisa iṟunda kunu; na kyamba kafoi mbewodo nyi macha heshika konu; njiicha wulalu.

²⁴ Mbekundi iwonana nanyo njechiida ihenda Hispanyia njiwoneho na kyentarama ipfo kyaṟonyi ngamaa isuṟa nanyo macha.

²⁵ Indi wulalu njiihenda Yerusalemu itarama wandu wa Ruwa walya ngaya.

²⁶ Siṟi tsa Makedonyia na Akaaya waleteṟia ilekia kitarama ketarama wandu wa Ruwa wai wakiwa ipfo Yerusalemu.

²⁷ Nyi kiwachihiṟye kihendeke kidi, na wakerye-ho na wasile wawo; kyamba ili wa mkambo mhenu wamesanzyo iambia mboṟa tsa kimrima sha Wayuda nyi kiwewawaṟi wawewaikanya Wayuda wo na shichoṟe shawo sha kimbihu.

²⁸ Nahong'u ngamemarisa iki na iwikya osano luwewatowoke ludi mhuri foko ipfo kowo njechiira kyaṟo kehenda Hispanyia njiide konu.

²⁹ Na njichi ngacha na konu njechicha njirie mofoeṟa fo ona luwukye ko Kristo.

³⁰ Nanyo wanawawama, ngamterewa mnu njikuwode na Mndumii odu Yesu Kristo na ikunda lya Mumuyo ke muwe mochikusanza na inyi ngapanonyi monjiterewya ko Ruwa.

³¹ Kundu njihendeletso walemeshi walya wa ipfo Yudaya na osano loko loendye Yerusalemu luhende ichihiana na wandu walya wa Ruwa.

³² Kundu njishike konu njiwodo nyi sia njechiwihiṟyo moo hamu nanyo chandu Ruwa akundi.

³³ Na Ruwa-chu menyi ofoṟo nakae nanyo mose. Amenyi.