WAROMA 14 - Bibilia Kui Mdedie fo Kimochi

¹ Msa afafae wuidiki kewemambyenyi mulawone mochimitika hando akangashia.

² Wandu wailachikanyi: Ichu umu nyi akusirye kelya shindo shose na ichu ungi afafae adi kui wuidiki nyi ekelya mboha tupu.

³ Ichu ekelya shelya shose nalawone kechimina ichu alalya shose. Ma ichu ekelya mboha tupu nalawone kechihutsya ichu ekelya shelya shose owingo; kyamba Ruwa nyi awemwambye nao.

⁴ A iyo nyi o wu notane oanduya mṟundi o mndu ungi? Nyi Mndumii oke amonyi ekembanza mafuo hake ang'u imwolotsa wanda; indi nyi echihoṟoka kyamba Mndumii ai na pfinya yemhoṟotsa.

⁵ Mndu nekeidima iwona mfiri mliwe fumcha kota ingi, ichu ungi ekeindya mfiri yose chando yambanyi: orio mndu nakuwangye necha mhionyi foke fumenyi.

⁶ Ichu ekyeindia mkonu mliwe nyi ekefuwiluya iindia Mndumii; na ichu molya shelya nyi awelia Mndumii oke, kyamba nyi aidapfuma-ho Ruwa. Na ichu ekekuotoya ilya nyi awekuotoya ichihiṟa Mndumii na idapfuma kaidapfuma Ruwa.

⁷ Kyamba kodu kulaipfo mokulisiṟa na moo foke amonyi, ma kulaipfo mokupfia opfu loke amonyi.

⁸ Kyamba ili mandi lui-ho na moo nyio Mndumii luimpfuṟukanya nafo, ili mandi loshika ihenda ipfa, nyio Mndumii lohenda impfia. Kyasia lukaa-ho na moo ang'u lukapfa na luwei wa Mndumii.

⁹ Kimaduma kya ikyo Kristo alepfa kawuya kaṟuka, nyi kundu nawe Mwitoṟi o iwo wapfie na iwo wai na moo.

¹⁰ A iyo nyi kiili oanduya manomayo? Ang'u iyo, nyi kiili uminye manomayo? Kyamba so lose nyi lochikaa lushike ihoṟoka alya mbai ya loṟika lo ianduyo lo Ruwa.

¹¹ Kyamba kuu-kuṟehye; Mndumii ahambye, so inyi njii na moo, orio mndu nechinjipfiria ndi na orio olimi lochiichika ke inyi nyi Ruwa.

¹² Kikawa kido orio mndu odu nyi echikaa nahoṟoke kii kyake o amonyi ipfo oshangunyi lo Ruwa.

Kulaterefutse odoo

¹³ Nahong'u kya indi muitike ideda kya iki, ke kulakae-ho echiendie manomae tewe ang'u paṟi lya mrima ang'u imtewa nawute wunyamaṟi.

¹⁴ Inyi njiichi njikusihye Mndumii Yesu ke kwipfo kindo kirie tewepfo.

¹⁵ Kyamba kokoya manomayo ahenda iwichuṟo nyi mlie fopfo okechumia mhendo furio nyi ikundapfo. Manya kulawone kochidekesha kui mlie fu fopfo ichu alepfio nyi Kristo.

¹⁶ Kilya kyanu kii kicha mulaleke kiisalucho.

¹⁷ Kyamba Wumangi wo Ruwa chi wukeri mlie na mnyoepfo, kya indi nyi wukeri wuhoṟotsu na ofoṟo na wukesi wokuṟamkya-ho kui Mumuyo Mwele.

¹⁸ Kyamba ichu akuwode na ikyo awa mopfuṟukanya-ho Kristo nyio sa achihiṟye Ruwa kawekundo nyi wandu.

¹⁹ Ili nyi wudo kii luwingye isho shiende ofoṟo na isho shepfungana so luwenyi na wenyi.

²⁰ Ma kulawone kochifurunja iṟunda lya Ruwa kui marekyano ha mlie fo shelya. Shelya shose shii shiheṟemtsu kya indi ko ichu echilya kindo kepfio nyi mdo, ipfo koke kyechiwa nyi wunyamaṟi.

²¹ Kiwe kicha-ho nyi koda kulalya nyama; ma inyo mpfinyo; ma ilya kelya kingi kyekeendye manomayo ikapya-ho mtuulya.

²² Nyi mwidikye uifukaya wocho? Ufukaye kya ora lo-kopfo ukeri oshangunyi Ruwa. Nanga icho alakuendye owingo amonyi lo Ruwa. Nanga icho alakuendye owingo amonyi ipfo kundo akudumbuya kya kindo kiwe.

²³ Indi ichu echilya kepfiopfio mdo o nyi ai mbonye owingo, kipfa awuta kilai-kiamtse nyi mwidikie. Na orio kindo kilechiwuto na mweke fo mwidikye kyo kii wunyamaṟi.