WAROMA 13 - Bibilia Kui Mdedie fo Kimochi

¹ Orio mndu nawe moanguya wanene wo waitoṟie oruka madu, kyamba kulaiho wuitoṟi shile na iwo wuwukie ko Ruwa; waitoṟi-wo wakeri-ho m wawawikye-ho nyi Ruwa.

² Nkyo kimaduma mndu molemana na mawawaso ha waitoṟi wo, nyi alemanyi na kilya Ruwa akiwikye. Indi walemanyi-wo nyi wechikuwonya wudeheli wawenyi.

³ Kyamba wanene wa mengenyi wo walaendye mndu wuowu kya ko wandu wecha, kya indi nyi waende wuowu kya ko wandu wawicho Kokoya ulakundi iowuo waitoṟi wuta mecha nao nechikuṟumisha.

⁴ Kyamba nyi wukukerye-ho mpfuṟukanyi mokupfuṟukanya iyo kya wucha. Indi komkoya owuta kii kiwicho owuo, kyamba walakupfungye oshu kya wulya; kyamba nyi wakeri mpfuṟukanyi o Ruwa mowonya mndu awutye owicho wudeheli wurio nyi tuuke iya ya Ruwa.

⁵ Ko ikyo kiwaṟi iindia wanene wadu, chi kipfa kya tuuke iya ya Ruwa tupupfo, kya indi na kipfa kya ngo tsa mrima.

⁶ Nkyo kimaduma moketaa na okamba, wasongoru wo kyamba wakukerye wechiṟundya Ruwa iawutsia iṟunda lyawo.

⁷ Kewenengenyi wose kiwasumhanye, mowesa okamba, mtaenyi okamba, sa ai mosuhuṟa, muwemsuhuṟya, sa aoweshye muvemowuo, moindyo kewemwindyenyi.

Ikundana lya lohi

⁸ Mulakae na sile ya mndu ma iwe ya iki, shile na iya ya ikundana; kyamba icho mokunda odoe nyio aawutsye wuwawaso.

⁹ Kyamba ili lihambye; ulaṟuhuye, ulawaahe, ulaiwe, ulalange, ma kokooya kwipfo iwawaso lingi ma likawa lihya, nyi hamawunge-wunge na idedo-li, ke kunda odoo chandu ukukundi iyo kumonyi.

¹⁰ Mndu akundi odoe ekembutia kiwichopfo. Nahong'u ikunda odoya lyo lyekeawutsya wuwawaso.

¹¹ Wikenyi mudo mui wandu waichi heri ke saa yamshika yekure-ng'u madonyi; kyamba oletso lodu wulalu nyi lui afui na kota lyandi lulewoka iidikya.

¹² Kio kyaitika ihenda mfiri nyi icha fukeri. Ili kii kido lukuatwo mawuto hose ha meema luṟae shisha sha sa.

¹³ Luchumie lui na sonu njicha tsisumhanye mfiri, lulawone lokaa na tsilya mbicho tsa ṟinginyi ma tsa wunanzinyi ma tsa wumeluki ma tsa sheeṟe ma tsa isohuo mondu ma tsa idosa nyashi.

¹⁴ Kya indi kuṟaaenyi Mndumii Yesu Kristo, mfo mṟaae fonu, mukuṟise kundu iwetesya moo lilawone lyechiamtsa lango mbicho.