WAROMA 12 - Bibilia Kui Mdedie fo Kimochi

Ohendo lo moo kiidi kya iṟunda lya Ruwa

¹ Ngashika aa ngamtutuma-ng'u, wanawawama, njiimwitike nyi osaṟio lu lo Ruwa, ke mudambike mbihu yo yanu iwe kidaso kiele kii na moo kichihianyi na Ruwa; kiwe wuindi wonu wusumhanyi.

² Ma mulawone mokuwakisha na wuyana-wu wo kiwulalu, kya indi muhende kuhalwo mochikulawukya mhie, kundu muidime iidikyana na kilya Ruwa akundi, kilya kii kicha kichihiṟye, kyawukye swai.

³ Kisumbo njii-msumbe nakyo kyanjienenga njiwie orio mndu ose akeri ipfo konu, ke nalahie kyake kyekung'anyisha kyeng'anya kilya kimsuhananye, kya indi nahie-ho kyeidikya kidembo kyake chando Ruwa ahawye orio mndu kiheo kya mwidikye.

⁴ Kyamba chando so lui na mbihu fuwode shiwungo shifoi, indi shiwungosho shilai shiwawasye iṟunda lya mbaṟi imu shose.

⁵ Nyi wudo naso lufoi ludi nyi lukeri mbihu fumu fuu-msanze Kristo-hu, indi kyadu so luikayana shiwungo.

⁶ Na shisumbo so lui-wasumbe shirianyi na wutonga wulya, sho shii shingi na shingi. Msa amsumbe wuikimbi naikimbe kisumhanye wuidiki.

⁷ Msa amsumbe wuṟundi naṟunde. Msa amsumbe wuloshi naloshe.

⁸ Msa amsumbe chila yewhiṟia wengi moo nawewuta ado. Kwipfo ai motutuma, nawekaa echitutuma; kwipfo Sa ai mohawia wengi shindo awode nahawe ai msalari, kwipfo ai mosaṟya, nakae-ho echiṟamka. Na mosaṟia nasaṟie na sia.

⁹ Mkundie fukae fulawode wulembetseṟi. Tangaluonying'u kilya kii kiwicho, mukuwawe na kilya kii kicha.

¹⁰ Mkundana fonu fokundana fuwe fo wakanyi kamu, ngapano moira iwe yewikyana wuindi.

¹¹ Mulalehele ihidya siṟi, mwake-akye mrimenyi yanu mochisingya Mndumii.

¹² Ipfo kikusihyonyi kyanu mbechihio, ipfo shiwirenyi mukuhode, ipfo wuindinyi woiterewa mukae-pfo kiheri kyose.

¹³ Mudaṟane na wandu wa Ruwa kya shindo wawuṟye, mukukambiṟe ihida wahenu kui wulalutsa.

¹⁴ Walya waimterengya muwawikye ona. Ee-wo iwawikya ona, ma mulawasese.

¹⁵ Kewechihionyi kimu na iwo wawachihie, muwelia na iwo welia.

¹⁶ Muwe mochikayana kui mhie fumu koorio mndu, mulawone mochihia kya shidembo shesonguo, kya indi muchumie muwodanyi na walya watutu. Mulakutane waṟango nyo muwenyi.

¹⁷ Kiwicho mndu aimbutia mulawone mochimtaa na kiwicho kingi; muwe mochikusaṟa isho shii shicha ipfo sumuhana na wandu wose.

¹⁸ Kokoya kyewa-ho kui pfinya yo nyo murie, kewadienying'u wandu wose ofoṟo.

¹⁹ Wana wa wama, Ma mulatae kiṟaache deyenyi Ruwa, kyamba kui kuṟehye kiṟaache nyi kyako inyi, nyio inyi njechitaa. Nyi wudo Mndumii ahambie.

²⁰ Kya indi iyo mkituwa opfo kawado nyi njaa kewemnenge shelya, kawado n nyoda kewemrutse mṟinga; kowika kudo nyi ochimsanya okaa lwake oo mdo-hu foke.

²¹ Ulakunde iwinzo nyi kilya kii kiwicho, kya indi kilya kii kiwicho ukiwinze ochiwuta kii kicha.