WAROMA 11 - Bibilia Kui Mdedie fo Kimochi

¹ Ili nyi wudi kii ngahamba, Aka Ruwa nyi alekufunya wandu wake ngesa? Ote ko. Kyamba na inyi njii Mwisraeli njipaṟikye ipfo luwenyi lya Abrahamu njii o kishari kya Benyamin.

² Ruwa afunye mkambo foke alemsambuṟa kachapfo. Ang'u mulaichi kilya Madedo Maele hahambia kya Elia ili alenunuwia Ruwa kechianduya Israeli kehamba.

³ “Hoi Mndumii, wamewaha waikimbi wapfo wakawesanya marasyo hapfo; na inyi mmonyi njitsihee-ho; nawo nyi injiṟinjawia moo fu wakeri.”

⁴ Ruwa nalemhaluo ada? “Na njikutsiheṟye-ho wasoṟo shiku mfungade sa welalepfirya Baali ndi.”

⁵ Nyi wudo kuwei na wulalu, kutsuhe mtsuhaṟo sa Ruwa afusambuṟie njia ya wutonga.

⁶ Indi nyi njia ya wutonga woke chi kui mawuto ha mndupfo. Kima shila wudo wutonga wuwekaa wui wutongapfo.

⁷ Kikuwukie-ho ki kemanya ngesa? Waisraeli walekoya kilya waweikipfula-pfo mtsuhaṟo fulya nyi fulekikoya. Indi walya wengi wakakuumiṟa.

⁸ Chando kuu-kuṟehie, “Ruwa nyi alewaenengya mumuyo fo ihombya na meso halaambuo na madu halaicho shika mkonu fo inu.”

⁹ Na Dawidi nyi ahambie, “Kidembo kyawo kelya kando kiwawiie mshihodi na mdeho, kiwahalukie hando hewalahutsa watayoho kiṟaache.

¹⁰ Meso hawo hahutsyo meema walawone kindo, na mhongo yawo uileme mlungana.”

¹¹ Akale Kulako Wayuda nyi walekapa mtuulya itane warumara ngesa? Oo manya-le. Kya indi ipfo kundu warendemkye mpfondo na mkambo iya mhenu ilewonyo-ho okiio, nalo luhende iwamtsya Wayuda nawo wanyenyi wowanyenyia.

¹² Indi komkoya ideko lyawo lyamesuṟisha lidi wuyana na iho lyawo likawesuṟisha mkambo iya mhenu, nyi wuda kya ngoseṟa Wuholotsu wowo wochisuṟisha wengi mnu.

Okiṟo lo wandu wa mkambo ingi

¹³ Nyi ngadeda nanyo mui wa mkambo mhenu. Ma ili nji-mdume njiwe msu ko mkambo mhenu na njiiwikya wupfuṟukanyi wu woko mng'ano.

¹⁴ Njechitambahanya yamtsa macha ha wa orukenyi loko wamunyenyie kulako njechikiṟa-ho maata wawo.

¹⁵ Kyamba kokoya ipfo kundu wamhenda ileho-wo kukuwukye-ho kisanza wuyana na Ruwa, nyi-ki kyechiwuka ipfo kundo wehenda yambyo nyi Ruwa? Wapfu wechiṟuka!

¹⁶ Komkoya kipeṟengu kya mkate kii kiele, na mkate fo fose mso fo mruwe fui mwele na komkoya mri fo ikidi fumcha na maṟamba ho naho hamecha.

¹⁷ Indi komkoya maṟamba halya maata-ho ha msinepfu mcha halepahuo handu halya kukadongio ho iṟamba lya msinepfu fongeṟenyi. Kowa malungyo-ho na mru fo na malenda ha msinepfu,

¹⁸ kulapiṟe Ma kulakushelye oo maṟambenyi; indi kokunda ikushela manya chi iyo urie mru fo pfo nyifo sa fukurie iyo.

¹⁹ Kyasia nyi ochikuhambya-ng'u, “Maṟamba nyi ha-mapahwo-ng'u kundu njiodongyo-ho inyi.”

²⁰ Na kicha; ho halemepahwo nyi kipfa halaweidikye, indi iyo uhoṟoki-ho kui pfinya ya mwidikye. Ma ulakung'anyishe, indi owuo.

²¹ Kyamba kokoya Ruwa amekeda alalindya Wayuda walya wai cha maṟamba halya ha kikaya, echikulindya iyopfo.

²² Kyasia keweringang'u woloru wo Ruwa na wunesi woke. Wunesi nyi wuhoye walya warendemkye, indi wuoloru wo Ruwa wokukaya iyo kiwe ochikutambahana na woloru-wu; shile nyi wudo na iyo na ochipahwo-ho.

²³ Na Wayuda da wakada wupiṟi wowo wakaidikia Ruwa na wechikaa wadongyo-ho; Kyamba Ruwa nawode pfinya echiidima-se iwadongya-ho nawo.

²⁴ Kyamba komkoya iyo ulepahwo ipfo msinepfunyi fui fo ngeṟenyi kowewuya idongyo ipfo msinepfunyi fulya mcha kulasumhana kikaaya kyafo, nyi wuda kya wueṟa Wayuda wo wai wa kikya kyafo wechiwuya idongyo ipfo msinepfunyi fui fowo wawenyi.

Idumbuya na ihaluka lya Waisraeli

²⁵ Kyasia, wanawawama, njikundi mukae mulaichi kyama kikoomepfo, mulawone mokusirya na wuṟango wonu wuwenyi kipfa wuumu wokuumiṟa wo Wayuda waweny wo wulemhoya Israeli nyi wo oweṟe, kyayo itane wandu wa mkambo mhenu washikia Ruwa na mkambo mhenu yamhenda ishika iwonyo okiio.

²⁶ Kikamewa kido na Israeli yose yechihenda ikiṟo, chando kuu-kuṟehye, “Nyi kulya Sioni kochiwuka-ho mkiṟa. Nyio sa echiletsa Yakobo wulemeshi wulya.

²⁷ Nyifo mkundano foko njiwada nawo ilindi njechiwuta-ho manyamaṟo hawo.”

²⁸ Kipfa kya ili waileha Ndumi ya Sia. Wayuda wai wakituwa wa Ruwa kui kiira kyanu, mkambo ingi lyo limanyikya konu, indi sumuhana na msambuṟye fulya wai wakunde wa Ruwa, lyo limanyikye ko waku wawo.

²⁹ Kyamba shisumbo sha wutonga wo Ruwa na ndaho yake, sho sheteṟeshukasho.

³⁰ Kyamba chando nyo muwelemye Ruwa ili kacha, indi wulalu momeenengo osaṟio loke iliindi wo wakaa welema.

³¹ Nyi wudo nawo nyi walemba walemeshi wulalu kipfa mohenda isaṟyo nyo, kundu wahende isaṟyo nawo wokia wulalu.

³² Kyamba Ruwa nyi asunguwanye wose ipfo kundo walemanyi nao kundu nawawonye wose osaṟio loke.

Ruwa naṟumisho

³³ Apa wuleshe wo wusuṟi wo Ruwa na wo wuṟango woke na wulaanyi. Mdumbuye yake yedumbwo mondu chando shilechiwa isonjokoṟa chando tsilechiwa ihesho chandu kuikuṟehie.

³⁴ Nyi o ku alememanya mahio ha Mndumii? Ang'u nyi wu awei mnjama oke?

³⁵ Ang'u nyi o ku alesongwo imnenga kindo nawede echiwihiṟyo?

³⁶ Kipfa nyio ai kimaenyi kya shindo shose, nao ai moshiwanzya mkaenyi, na koke shechikaa shiinukie shose. Wuitoṟi nyi woke wokaa mlungana. Amenyi.