WAROMA 10 - Bibilia Kui Mdedie fo Kimochi

¹ Ee-wo wanawawama, macha ha mrima hanjiwodye kyawo njiwaterewya ko Ruwa wahende wonyo okiio.

² Kyamba nyi ngawawikya kiṟingishyo ke nyi wekekapa mtambakira wechipfula Ruwa, indi chi kya osaṟefo.

³ Kyamba ili walaweichi wuhoṟotsu wo Ruwa wakawetambahanya ikulikisha-ho wowo wawenyi nkyo kiletewa walakutambe na wuhoṟotsu wu wo Ruwa.

⁴ Kyamba mtsitsyonyi fo wuwawaso nao Kristo moendie orio mwidiki wuhoṟotsu oshangunyi lo Ruwa.

Okiṟo ko wandu wose

⁵ Kyamba kilya Mose ahambye kya wuhoṟotsu oshangunyi lo wuwewonyo kui mweeke fo wuwawaso kikeri kiile ke, “Nyi mtanyi mowutana chandu mawawaso hahambie nyio mndu echiwada moo na mweeke fowo.”

⁶ Kya indi wuhoṟotsu-wu oshangunyi lo Ruwa wuṟukye wuidikinyi wo wuhambye wudi, “Kulawone koihamba, mrimenyi fopfo, nyi o ku echidoya ruvehu?” (Lyo liwewa isotsa Kristo na wanda.)

⁷ “Ang'u nyi o ku echisoka na kulya ko wapfu.” (Lyo liwewa idosa Kristo ipfo ko wapfu naendo na huye.)

⁸ Madedo Maele hahambye. “Idedo lyo lya Ruwa lii afui, naiyo nyi likukerye ipfo dumbunyi lyapfo na ipfo ngoonyi yapfo.”

⁹ Kipfa komkooya kohamba na dumbu lyapfo ke Yesu nyio Mndumii na iidikya koidikya ipfo ngoonyi yapfo ke Ruwa nyi alemṟutsa ipfo wapfunyi nyi ochikiṟo.

¹⁰ Kyamba lumwidikya kui mrima liende wuhoṟotsu oshangunyi lo Ruwa; na imhamba kui dumbu liwonye mndu okiio.

¹¹ Kyamba Madedo Maele hahambie, “orio mndu ose echimwidikya o echikaa nahoyo nyi sonupfo.”

¹² Nyiko wandu wose; kwiho mletsano foletsana Wayuda na Wagrikipfo. Kyamba ichu umu nyio Mndumii owo wose nyi aisuṟia iwo wechimterewa wose.

¹³ Kyamba Madedo Maele hahambie “orio mndu echiterewa kui rina lya Mndumii nyi echikiṟo.”

¹⁴ Aka wechiidima imlaha wada walamwidikye ngesa? Indi wamwidikye wada walandeshikio mbonyi tsake ngesa? Indi washikio wada mbonyi tsake kulaiho mowaongoya ngesa?

¹⁵ A wandu waongwo wada walaiwadume ngesa? Chando kiikiṟehye ke, “Apa ndifo tsa waende ndumi ya Sia chando tsaona.”

¹⁶ Kya indi chi wose waleambia Ndumi ya Siapfo. Kyamba Yesaya ahambye, “Hoi Mndumii, nyio-wu aleidikya ndumi yadu?”

¹⁷ Kyasia wuidiki nyi wokeamtso nyi ndumi, indi ndumi nyi ikurye na idedo lya Kristo.

¹⁸ Ang'u njiwesenyi njihambe, Ngesa nyi waleleicho ndumi-yo? Ee-ko. Waleicho Kuwukye mangelele hawo hakadung'ana wanda ii kose, na madedo hawo hakatana hashika kulyando mtsitsio fo wuyana.

¹⁹ Ang'u njiwese-se, Kulako Waisraeli walaweichi ngesa? Nao nyi Mose alemhamba, “Inyi njechimutewa muhende inyeng'a wandu walai mkambo, mhenu ineng'a mukunyashe kya mkambo-fu fulaweimpfunde.”

²⁰ Na Yesaya kawekaria kehamba, “Nyi njilekunda ikoyo nyi walya walawekenjipfula, ngawewonekya walya walawewesie mbonyi tsako.”

²¹ Indi Israeli kaiwia, “Njiwetsinda mkonu fose njechileshia mkambo hako mawoko fulanjiidikie fukawewa mlemeshi.”