WAROMA 1 - Bibilia Kui Mdedie fo Kimochi

¹ Nyio inyi Paulo njii isinga lya Yesu Kristo msu msambuṟe nji-mdahuye Ndumi ya Ruwa ya Sia ya okiio.

² Nyiyo aweiteṟie na mweeke fo waikimbi walya wake ipfo Maṟehyonyi Maele.

³ Ya mana chu oke apaṟikie osharinyi lo Dawidi kui nyama.

⁴ Ambike-ho Mana o Ruwa Menyi pfinya kui Mumuyo mosumba wuele likawa kui iṟuka wapfunyi, nyio Yesu Kristo Mndumii odu.

⁵ Nao nyio alelusaṟya kaluinenga wudumi wohendelishya rina lyo lyake wuidiki ipfo mkambonyi ya wandu yose.

⁶ Mpfondo nanyo muipfo mui wasambuṟe wa Yesu Kristo.

⁷ Ngamwiṟikiṟa nyo mukeri ipfo Roma mose mui wakunde wa Ruwa, wasambuṟe waele. Wutonga wukae nanyo na ofoṟo luwukie ipfo ko Ruwa Nde yadu na ko Mndumii Yesu Kristo.

Mwano ko Ruwa

⁸ Kya kuwoka ngaana Ruwa oko njikuwawie na Yesu Kristo kimaduma kyanu mose kyamba wuidiki wonu wukeri ihambo wuyana kose.

⁹ Kyamba Ruwa chu njimṟundia kui mrima fose foko njechionguo Ndumi ya Sia ya Mana chu oke nyio awa mṟingishi oko moṟingishia ke njimukumbwo nyo kitsitsi.

¹⁰ Orio mandi njiterewa njikeri iwesa Ruwa kulako njechiwonyo mwaanya foshika konu.

¹¹ Kyamba njiwodo macha hewonana nanyo njimwendie kemuwanza kii-kiwike nyi Mumuyo.

¹² Nalyo nyilyo liwe nyi iwanzana iidikia lyanu linjiwanze na iidikia lyako lyimbanze nyo.

¹³ Indi njikundi mumanye, wanawawama, ke njiwelangie kafoi icha na ipfo konu cha ipfo mkambonyi iya ingi, kya indi ngaimo shika inu.

¹⁴ Inyi na njii mosile o Wagriki na o wa mdedie mhenu, o waṟango na o walai waṟango.

¹⁵ Nyi wudo njilangie ionguo Ndumi ya Sia ya okiio na konu ipfo Roma.

Pfinya ya Ndumi ya Sia

¹⁶ Kyamba inyi njilapfia sonu kya Ndumi yo ya Sia ya okiio, kyamba nyi ikeri pfinya ya Ruwa yewonya orio mwidiki oletso iasie na mndu Myuda na mndu Mgriki.

¹⁷ Kyamba kotambahaluyo nayo wuhoṟotsu wuwukye ko Ruwa wokuwada kundo kuwode wuidiki wochiduo mndu wuidikinyi, chando kikiṟehie, ke Mndu mhoṟotsu nyi echikaa awode moo fuṟukie wuidikinyi.

Deko lya mndu

¹⁸ Kyamba tuuke ya Ruwa yahenda imanyisho ichee ruwehu yechiolokya orio wukika wo wandu na wutahachi wowo iwo wekeshingya wukilohi wulya njia kui tewe lya wutahachi.

¹⁹ Kipfa isho sha Ruwa shewa imanya na shiwataṟambukye kyamba Ruwa nyi alewatambaṟuya.

²⁰ Kyamba isho shake shilawa yambuya sho shekewono wokia awikie wuyana shishiwike nyio wehanahana kyasho; nasho nyi shiile, pfinya yake ilunganyi ikaa na mkaike foke fui fo Ruwa amonyi kikaenenga walawonyo mwaanya fokapa nene.

²¹ Kitewe nyi kipfa ili waweichi Ruwa, indi walawemwindya cha Ruwa manya imwaana, kya indi wakahenda ihanahana na wuṟango wo wongo, na mdo fowo fukatushia fukawa meema.

²² Ipfo kundo wakutanye walaanyi mpfondo watondoke.

²³ Wusuṟi wu wo Ruwa alechisia wo wakawuilacha na mfano fofanana na mndu o wandu ekesia na fo malehe na fo mando na fo shindo shekekupupurwo.

²⁴ Nkyo kitewe Ruwa alewalekia wahende dao nyi lango tsawo tsewaduo ngafunyi washike yendye mbihu yawo wusutsu kowo wawenyi.

²⁵ Wo walekuilachya wukilohi wo Ruwa na wongo, wakawikya kitsane wuindi na ikiterewa wakada mtsanyi mokiwika ai moidapfumo mlungana. Amenyi.

²⁶ Nkyo kimaduma Ruwa alewalekia wahende iwado nyi wulanga wuendie wusutsu; na waka wawo wakailacha mbutie fulya fuwaṟi na sa fulawaṟi.

²⁷ Na womi na wudo wakaweda ikaa na waka wawo chando kiwaṟi wechiaka-aka na ilangana wo wenyi na wenyi, womi wakawewuta na womi mbutie fulai na sonu, wakakuwonya wueri wusumhanyi wo wunyamaṟi wowo kowo wawenyi.

²⁸ Nawo chando wawepiṟye ikaa na Ruwa ipfo kundo akuwatambaṟuye na wudo o Ruwa nyi alewalekia wahende furunjikya mhie yawo wechiwuta shilya ishiwuta.

²⁹ Wakaichuo wutahachi wo orio mbaṟi na wunyenyi na wuwahi na isohuo mondu na yoka mtambo na maupahapaha na maweweda.

³⁰ Nyi wekeduo wandu aaṟu, wesuo Ruwa, wai waami, wechumia useṟeṟi wai wa mtengelele, wandu wasumi, wepiṟa wafee.

³¹ Kindo kilai nawo nyi osaṟe, nyi wuhendeli, kindo kilai nawo nyi sonu, kindo kilai nawo nyi iichio mndu wukiwa.

³² Ma ili waichi kilya Ruwa awikye-ho ke wewuta wadi ate wawoho. Nawo naa wekewuta wado chi wo wawenyi tupupfo kyaindi wekeichika na walya wekewuta wado.