WALEWI 9 - Bibilia Kui Mdedie fo Kimochi

Aroni na wana wake wawuta mwano

¹ Nahong'u kuwei mfiri fo nyanya, Mose kalaha Aroni na wana wake, handu hamu na wameku wa Waisraeli;

² kawia Aroni, “Ira ichache lya mmbe lya ipung'a lyiwe kidaso kya wunyamaṟi, na isuwa lya kidaso kekoṟa, nosembeṟie Mndumii.”

³ Na iyo nochiwia wana wa Waisraeli, nowawie, “Endenyi kioṟo kiwe kidaso kya wunyamaṟi na ihache, na ihuṟuwi hose ha maka fumu, haawukie, shiwe kidaso kekoṟa;

⁴ na ipung'a na isuwa shiwe shidaso sha ofoṟo, kundu shishinjo oshangunyi lo Mndumii; na kidaso kya mso fumlongelonge na mafuda, kyamba, inu kudi tichi Mndumii nechimuwonekia.”

⁵ Nawo wakaende isho shose shilewawaso nyi Mose wakashileṟia alya ihemenyi lyesanzia, naho mamiingi wakatikiria hafui wakahoṟoka oshangunyi lo Mndumii.

⁶ Numa Mose kahamba, “Idedo Mndumii alewawasa muliwute nyi ili; na mng'anofo fo Mndumii fochimuchea.”

⁷ Mose kawia Aroni, “Tikiria rasio, nowute kidaso kyapfo kya wunyamaṟi na kidaso kyapfo kekoṟa, nowike kisanza kyapfo iyo kumonyi, na kya wandu; na iyo nowike kidasokyo kya wandu, nowike kisanza kipfa kyawo, chandu Mndumii alewawasa.”

⁸ Nahong'u, Aroni katikiria alya rasionyi, kashinja ihachelyo lya kidaso kya wunyamaṟi lilya lyiwei kipfa kya mrima foke.

⁹ Numa wana wa Aroni wakasembeṟia Aroni samu iya nao kawika kimnyo kyake kulya samunyi, na ishia kulya ndumbenyi tsa rasionyi, kawuya kapusuya samuyo o wanda ya rasionyi;

¹⁰ kyaindi mafuda, na shiho, na onga lulewuka alya dimenyi lya kidasokyo kya wunyamaṟi, kashirumatsia alya rasionyi, chandu Mndumii awewawasie Mose.

¹¹ Na nyama, na njonyi kashikoṟa na modo nja ya kichumi.

¹² Nao kashinja kidaso kekoṟa; na wana wa Aroni wakamsembeṟia samu iya nao kailetsia rasionyi njora tsose.

¹³ Nawo wakamwendie kidaso kekoṟa ora kui ora, na mdo, nao kashirumatsia huya rasio.

¹⁴ Kiidima kasanja maula, na masasio, kashirumatsia huye ya kidasokyo kekoṟa rasionyi.

¹⁵ Lyefurumia kaseheṟia kidaso kya wandu, kaira mburu ya kidaso kya wunyamaṟi cha iya ya kuwoka.

¹⁶ Numa kasembeṟa kidaso kekoṟa, na chandu kiwei sumhana na iwawaso.

¹⁷ Numa kasembeṟa kidaso kya mso, kairaho ohi, kalurumatsia rasionyi, handu hamu na kidaso kerumatsa kya ngamenyi.

¹⁸ Kaweshinja na ipung'alyo, na isuwalyo daa, shiano sha shidaso sha ofoṟo shiwei kipfa kya wandu; na wana wa Aroni wakamsembeṟia samu iya, nao kaiolia rasionyi njora tsose,

¹⁹ Na mafuda ha ipungalyo; na ha isuwalyo, na mhasi folyo fo mafuda, na onga lo ndewunyi, na shio tsalyo na onga lo dimenyi;

²⁰ nawo wakawika mafudaho huya shidari, nao karumatsia mafudaho alya rasionyi;

²¹ na shidari shilya, na masasio ha kulyo, Aroni kashikuchakucha kunu na kunu shiwe kidaso kekuchakucha oshangunyi lo Mndumii; chando Mose alewawasa.

²² Kiidima Aroni kairia mawoko hake kuambuyana na wanduwo, kawawikia ona; numa kasoka ammaa isembeṟa kidaso kilya kya wunyamaṟi, na kidaso kilya kekoṟa, na shidaso shilya sha ofoṟo.

²³ Numa Mose na Aroni wakaida na ihemenyi lyekusanza, numa wakawuka na nja, na iwikia wandu ona; na mng'anofo fo Mndumii fukawonekia wandu wose.

²⁴ Nahong'u modo fukowoka alya oshangunyi lo Mndumii, fukarumatsa kidaso kilya kekoṟa, na mafuda halya hai rasionyi; wandu wose wekiwona modo fulya wakafunja kisangalale wakaho wanda na shamu.