WALEWI 8 - Bibilia Kui Mdedie fo Kimochi

Ishimbuyo lya Aroni na wana wake

¹ Mndumii kadeda na Mose, kambia;

² “Ira Aroni, handu hamu na wana wake, na maṟao halya, na mafuda heshia, na pung'a ya kidaso kya wunyamaṟi, na masuwa hawi, na kikapu kya mkate ilantarang'ashe;

³ numa nalahe kisanzio kya mamiingi fose o mongo fo ihema lyekusanzia.”

⁴ Kyasia Mose kawuta chandu alewio nyi Mndumii; na kisanziokyo kilesanzia mongo fo ihema lyekusanzia.

⁵ Mose kawia wanduwo, “Idedo Mndumii awawasia lyiwutike nyi ili.”

⁶ Kyasia Mose kaende Aroni na wana wake; kawasanja na mṟinga.

⁷ Numa kaṟika Aroni kanzu iya, na impfunga na ngometa, na imṟika iṟikano, na imṟika naivera, na impfunga ngometa fo iṟunda lya wuaria fo naivera, na impfunga naivera kui ngometayo.

⁸ Numa kammbikia kikuchu kya kipeeta, kawikapfo Urimu na Thumimu ipfo kikuchunyi kya kipeeta.

⁹ Kamṟika na kitambaa mdonyi foke; na huya kitambaa ora lo oshangunyi, kawikapfo kipeṟengu kilya kya sahabu, oṟo yo njiele; chando Mndumii alewawasia Mose.

¹⁰ Numa Mose kaira mafudaho maele heshimbuo, kashimbuo handu halya, na shose shiweipfo kashiheṟemtsa.

¹¹ Numa kaletsia mafudaho huya rasionyi ka mfungade, na iwika mafuda o rasionyi na shihia shake shose, na kimbela na mrihiyo folyo, ishiheṟemtsa.

¹² Numa kaletsa mafudaho heshimbuo kawika mdohu ko Aroni, kamshia mafuda kundu namheṟemtse.

¹³ Numa Mose kaende wana wa Aroni, na iwaṟika kanzu, na iwapfunga ngometa, na iwaṟika shitambaa chando Mndumii alewawasia Mose.

¹⁴ Kiidima kaende ipung'a lilya lya kidaso kya wunyamaṟi; Aroni na wana wake wakahekia mawoko hawo mdohu fo mmbeyo ya kidaso kya wunyamaṟi.

¹⁵ Nahong'u kaishinja; Mose kaira samu yayo kashia na kimnyo kyake ndumba tsa rasio lilya njora tsose, kaheṟemtsa rasio, numa kapusiya samuyo alya wanda ya rasio kaiheṟemtsa, kundu nawike kisanza kui kipfa kya ikyo.

¹⁶ Kiidima kaira mafuda hose hawei ndewunyi yalyo, na onga luwei dimenyi na shihonyi tsake tsiwi, na mafuda hakyo, Mose kaharumatsia alya rasionyi.

¹⁷ Kyaindi mmbeyo injenyi, na njonyi yayo, na nyama tsayo, na mṟa foyo kashikoṟia na modo nja ya mfiṟiha; chando Mndumii alewawasia Mose.

¹⁸ Numa kasembeṟa isuwa lilya lya kidaso kemaya modonyi; Aroni na wana wake wakahekia mawoko hawo mdohu fo isuwalyo.

¹⁹ Kiidima Mose kalishinja; na kaletsia samu iya yalyo alya rasionyi njora tsose.

²⁰ Numa kalimanya njohawi tsalyo; na Mose kakoṟa mdo na njohawi tsilya na mafuda.

²¹ Numa kasanja maula halya na masasio halyo na mṟinga; na Mose kakoṟia isuwalyo lyose alya rasionyi; lyiwei nyi kidaso kekoṟa kiwe opfamo luchihiṟie; kiwei nyi kidaso kiwekisembeṟie Mndumii kui modo; chando Mndumii alewawasia Mose.

²² Numa kasembeṟa isuwa lilya lya kawi, isuwa lyeheṟemtsa; Aroni na wana wake wahekie mawoko hawo mdohu fo isuwalyo.

²³ Kiidima Mose kalishinja; kaira samu yalyo, kaishia kimdohu kya kudu ko kulyo ko Aroni, na kimnyonyi kyake king'anyi kya owoko loke lo kulyo, na kimnyonyi king'anyi kya kudende koke ko kulyo.

²⁴ Numa wana wa Aroni wakaendo, Mose kashia samuyo mdohu ya madu ha kulyo, na shimnyonyi shing'anyi sha mawoko hawo ha kulyo, na shimnyonyi shawo shing'anyi sha madendenyi ha kulyo; numa Mose kaletsia samuyo rasionyi njora tsose.

²⁵ Numa kaira mafudaho, na mhasi fuwode mafuda, na mafuda hose hawei ndewunyi na onga lo dimenyi, na shiho tsiwi, na mafuda hatso, na kudende ko kulyo.

²⁶ Numa nechiira mkate fumu fulamtarang'ashe kikunjenyi kya mkate ilantarang'ashe kikeri alya oshangunyi lo Mndumii na mkate fumu fumsungusie na mafuda, na mkate fumu fulamtarang'ashe msise naiwike huya mafuda na huya sasiolyo lya kulyo;

²⁷ numa kawika shose mawokonyi ha Aroni, na mawokonyi ha wana wake, nashikuchekuche kunu na kunu shiwe kidaso kekuchakucha oshangunyi lo Mndumii.

²⁸ Numa Mose kashiwutase mawokonyi hawo, na ishikombetsia modonyi alya rasionyi ya shidaso shemaya modonyi; shiwei shewatana washimbuo, nyi opfamo lucha, kiwei odambiko losembeṟia Mndumii kui modo.

²⁹ Kiidima Mose kaira kidari kilya, kakikuchakucha kunu na kunu, kiwe kidaso kekuchakucha oshangunyi lo Mndumii; nyi ohawi lo Mose kiidi kya isuwalyo lyewashimbuo; chando Mndumii alewewia Mose.

³⁰ Numa Mose kaira mafuda maata heshia na samu iwei alya rasionyi, kaolia Aroni na maṟaonyi hake na wana wake, na maṟao hawo; koikyo naleshimbuo Aroni na wana wake, na maṟao ha wana wake, handu hamu nao.

³¹ Mose kawia Aroni na wana wake, “Koṟienyi nyamayo o mongo fo ihema lyesanzia, muliie alya alya na mkateyo ikeri ipfo kikunjenyi keheṟemtsa, chandu njilewawasio ke, Nyi Aroni na wana wake wechiilya.

³² Na isho shechitsuhaa nyamayo na mkatefo mochikoṟa na modo.

³³ Manya mulaide na nja ya ihema lyesanzia ko mfiri mfungade, itane mfiriyo yanu yeheṟemtso yashika; kyamba nechimushimbuo ko mfiri mfungade.

³⁴ Na wudo chandu kyawutika inu; nyi wudo Mndumii alewawasia kiwuto, kiheri kewika ishimbuo lyanu.

³⁵ Nanyo mochikaa o mongo fo ihema lyesanzia ko mfiri mfungade mfiri na kio, na iringa wuringi wo Mndumii, mlashike ipfa; kipfa nyi wudo njilewawasio.”

³⁶ Nahong'u Aroni na wana wake wakawuta mbonyitso tsose Mndumii aletsiwawasia kui owoko lo Mose.