WALEWI 4 - Bibilia Kui Mdedie fo Kimochi

Mwano fo wunyamaṟi ulakusirie

¹ Mndumii kadeda na Mose, kambia,

² “Dedang'u na wana wa Waisraeli, nowawie, kokoya mndu awuta wunyamaṟi alakusirie, kiidi kya idedo lyo lyose Mndumii aliikimbie lyilawuto, na iwuta idedo lyo lyose lya madedoho;

³ kokoya mkohanyi mshimbuo kawuta wunyamaṟi kaendie wandu mti; nalekie kipfa kya wunyamaṟi woke alewuuta pung'a ntutu njiamtsu nasembeṟie Mndumii iwe mwano fo wunyamaṟi.

⁴ Nao nechiende pung'a yo naiwike alya mongo fo ihema lesanzia oshangunyi lo Mndumii; nao nechehekia owoko loke huya mdo fo pung'a yo, na iishinjia oshangunyi lo Mndumii.

⁵ Numa mkohanyi cho amshimbuo nechiduo samu njiangu ya mmbe yo, naende na ipfo mba ya ihemalyo lyekusanzia.

⁶ Mkohanyi nawike kimnyo kyake ipfo samunyi naolye samuyo ka mfungade oshangunyi lo Mndumii-Ruwa.

⁷ Numa mkohanyi nawike samu njiangu huya ndumba tsa rasio ledutsia uvumba wucha oshangunyi lo Mndumii, likeri ihemenyi lyekusanzia; numa samu yo ingi yose ya ipung'alyo nechiipusuya wanda o shi ya rasio ya kidaso kemaya modonyi, likeri mongonyi fo ihema lekusanzia.

⁸ Na mafuda hose ha ipung'alyo lya kidaso kya wunyamaṟi nechihawutapfo; mafuda hose ha onga, na mafuda hose ha ndewunyi,

⁹ na shiho tsayo tsiwi, na mafuda hawodanyi natso, hai kufui na kitsi kyayo; na kiwelewele kii dimenyi, handu hamu na shihotso, isho shose nechishiwutapfo,

¹⁰ na chandu shilewewuto kiidi kya mmbe tsileshinjo tsa shidaso sha ofoṟo; numa mkuhanyicho naharumatsie huya rasio lya kidaso kemaya modonyi.

¹¹ Numa njonyi ya ipung'alyo, na nyama tsalyo tsose, handu hamu na mdo folyo, na masasio hayo, na ndewu yayo, na mṟa foyo,

¹² kyamba, pung'ayo yose nechiiduo nja ya mṟi tane handu hecha, oo handu wekepusuya mafu, nao nechiikoṟa modonyi huya ngu; yechikoṟo na modo oo handu wekepusuya mafu.

¹³ “Na kokoya mamiingi fose fo Waisraeli fowuta wunyamaṟi, na kindo kyo kilamanyike mesonyi ha kisanziokyo, nawo walewuta kindo kimuho kya shilya Mndumii aikimbie shilawuto, nawo wamekuwonyia mti;

¹⁴ ili wunyamaṟi wo wochimanyika ke womewuto, nlyondi mamiingifo wechilekia pung'a njikoho iwe kidaso kya wunyamaṟi waiende sumhana na ihema lesanzia.

¹⁵ Numa wameku wa mamiingifo wahekie mawoko hawo mdohu fo pung'ayo oshangunyi lo Mndumii,

¹⁶ numa pung'a ishinjo oshangunyi lo Mndumii. Nahong'u mkohanyi amshimbuo nechiira samu njiangu ya pung'a yo naiitse na ihemenyi lesanzia;

¹⁷ numa mkohanyi nakape kimnyo kyake ipfo samunyi, naolie oshangunyi lo Mndumii, sumhana na isulialyo ka mfungade.

¹⁸ Numa samu ingi naiwike ndumbenyi tsa rasio lii oshangunyi lo Mndumii liliwike ipfo ihemenyi lesanzia, numa samuyo yose naipusuye wanda shia rasio lya kidaso kemaya modonyi, lii o mongo fo ihema lyesanzia.

¹⁹ Numa naire mafuda hayo hose naharumatsie oo rasionyi.

²⁰ Nyi wudo echiwutia ipungali chandu alewutia pung'a ya kidaso kya wunyamaṟi na wudo echiwutia ipung'ali, nao mkohanyi nechiwawikia kisanza, nawo wechihoorio.

²¹ Numa naduo ipungalyo nja ya mfiṟiha, naikoṟe na modo daa chandu alekoṟa iya ya kuwoka; nyi kidaso kya wunyamaṟi kipfa kya mamiingi.

²² “Ilyi mchili echiwuta wunyamaṟi, kawuta alakusirie idedolyo lyose kiidi kya iho Mndumii-Ruwa oke, aikimbie halawuto, na nawonyio mti;

²³ kamanyishio wunyamaṟi wo woke alewuuta, nechiende kioṟo kiheṟemtu kiwe mwano foke,

²⁴ numa nahekie owoko loke mdohu fo kioṟokyo, na ikishinjia alya handu wekeshinjia kidaso kemaya modonyi oshangunyi lo Mndumii; nyi kidaso kya wunyamaṟi.

²⁵ Numa mkohanyi nechiira samuyo ya kidaso kya wunayamaṟi na kimnyo kyake naiwike ndumbenyi tsa rasio lya kidaso kemaya modonyi; na samuyo yakyo naipusuye oo shia rasio lya kidaso kemaya modonyi.

²⁶ Na mafuda hakyo hose naharumatsie oo rasionyi, chandu alerumatsa mafuda ha shidasosho sha ofoṟo; nao mkohanyi nechimbikia kisanza kipfa kya wunyamaṟi woke; nao nechihoṟio.

²⁷ “Na mndu oose kiidi kya wandu wa orukenyi kawuta wunyamari alakusirie; kawuta idedolyo lyose kiidi kya isho Mndumii aimie shilawuto, nao nakuwonyia mti;

²⁸ nao kamanyisho wunyamaṟi wo woke alewuta nlyondo echiende mburu suwana njiheṟemtsu iwe mwano foke kipfa kya wunyamari woke alewuta.

²⁹ Nao nahekie owoko loke mdohu fo mwanofo fo wunyamaṟi na ishinja kidasokyo kya wunyamaṟi oo handu ha kidaso kemaya modonyi.

³⁰ Naho mkohanyi naire samuyo yakyo na kimnyo kyake, naiwike ndumbenyi tsa rasio lya kidaso kemaya modonyi, na samu yakyo yose naipusye shia rasio.

³¹ Numa naire mafuda hakyo hose, chandu mafuda halya halewuto kiidi kya shidaso shilya sha ofoṟo; numa mkohanyi naharumatsie alya rasionyi, kiwe opfamo luchihiṟie Mndumii; na mkohanyi nawike kisanza kipfa kyake nao nechihooṟio.

³² “Nao kaende ichondi litutu lya kidaso kya wunayamaṟi, nechiende huṟuwi liheṟemtsu.

³³ Nao nahekie owoko loke mdohu fo kidasokyo kya wunyamaṟi, numa namshinje nawe kidaso kya wunyamaṟi, oo handu wekeshinjia kidaso kemaya modonyi.

³⁴ Numa mkohanyi naire samu ya kidasokyo kya wunayamaṟi kemaya modonyi na kimnyo kyake nawike ndumbenyi tsa rasio lya kidaso kemaya modonyi, numa napusuye wanda samu yatsuhaa yose shia rasio.

³⁵ Numa naire mafuda halyo hose, chandu mafuda ha ihuṟuwi hekewuto kiidi kya kidaso kya ofoṟo; naho mkohanyi naharumatsie rasionyi huya kidaso kekoṟa, kui chandu kiwari shidaso sha Mndumii shileseheṟio modonyi, na mkohanyi nechiwika kisanza kipfa kya wunyamaṟi woke alewuuta, nao nechihoṟio.”