WALEWI 3 - Bibilia Kui Mdedie fo Kimochi

Shidaso sha ofoṟo

¹ Na shiinengo shake kokoya nyi mwano fo ofoṟo kokoya naiinenga kui mmbe, pung'a ang'u taho nechilekia iyo njiheṟemtsu ilawode tewe oshangunyi lo Mndumii-Ruwa.

² Nao nechihekia owoko loke o mdohu fo mmbe yo aiilekia, na imshinjia o mongo fo ihema lyesanzia; na wana wa Aroni, Wakohanyi wo, wechiolia samu yakyo alya rasionyi njora tsose.

³ Nao nechisembeṟa kidasokyo kya ofoṟo, odambiko lo Mndumii lochiwuto kui njia ya modo, onga lushikie ndeu na mafuda hose hai ndewunyi,

⁴ na shiho tsake tsiwi na mafuda hawodanyi natso, hai kufui na kitsi, na onga lo kii dimenyi, handu hamu na shihotso; isho shose nechishiwutapfo.

⁵ Na wana wa Aroni wechishirumatsia modonyi huya rasio na modo, huye ya kidaso kemaya modonyi, kii huya ngu tsii modonyi; nyi odambiko losembeṟia kui njia ya modo opfaamo luchihiṟie Mndumii-Ruwa.

⁶ Na shindo shake shelekia mwano fo ofoṟo nechishinjia Mndumii, kokoya nyi sha mfiṟihenyi fo machondi; masuwa ang'u nyi ha kika, nechilekia ikyo kii kiheṟemtsu.

⁷ Kalekia ihuṟuwi lyiwe kiano kyake, nlyondi echiinenga Mndumii-Ruwa;

⁸ nao nechihekia owoko loke huya mdo folyo ilyo lyaendo, na ilishinjia oo mongo fo ihema lesanzia. Na wana wa Aroni wechiolia samu yalyo alya rasionyi njora tsose.

⁹ Nao nechisembeṟa kidaso kyo kya ofoṟo rasionyi lya Mndumii-Ruwa, kechiwiko kui njia ya modo; mafuda halyo, na mhasi folyo fui mafuda fose, nechifuwutaho kui ifudumbuoho oo kufui na fuo lya mhongo; na onga lo na mafuda ha ndewunyi,

¹⁰ na shiho tsalyo tsiwi, na mafuda hawodanyi natso, hai kufui na kitsi kyalyo, na kiwelewele kii dimenyi, handu hamu na shihotso; isho shose nechishiwutapfo.

¹¹ Nao mkohanyi nechishirumatsa na modo huya rasio; nyi kelio kya odambiko lotikiria Mndumii-Ruwa, kui njia ya modo.

¹² Na wuleki woke, kokoya nyi mburu, nlyondi echiiende oshangunyi lo Mndumii;

¹³ Nao nechihekia owoko loke mdohu foyo, na imshinjia oo osehu lo ihema lyesanzia; na wana wa Aroni wechiolya samu yayo rasionyi njora tsose.

¹⁴ Nao nechisembeṟia kiidi kya kidasokyo wuleki woke, odambiko ko Mndumii kui njia ya modo; ke onga lushikie mawula, na mafuda hose ha ndewunyi,

¹⁵ na shiho tsayo tsiwi na kiwelewele kii dimenyi handu hamu na shihotso tsiwi; isho shose nechiwutaho.

¹⁶ Nao mkohanyi nechishirumatsa modonyi huya rasio; nyi kelya kya odambiko losembeṟia kui njia ya modo, luwe opfaamo luchihiṟie; mafuda hose nyi ha Mndumii.

¹⁷ Idedolyi lechiwa iwawaso lya mlungana, ipfo shisharinyi shanu shose, kiidi kya mba tsanu tsose, ke mochilya mafuda manya samu manyalepfo.