WALEWI 27 - Bibilia Kui Mdedie fo Kimochi

Mawawaso kya wuleki ko Mndumii-Ruwa

¹ Mndumii-Ruwa nalewia Mose;

² “Wia Waisraeli kudi; Mndu kawika kiteṟio keinenga Mndumii-Ruwa mndu o wandu, mnducho neidima iawutsia kiteṟiokyo kyake kui itaa kiheo kya pesa chandu kikiteṟie:

³ Mndumsoṟo o maka makumi hawi tane makumi haṟandaṟu nechitalao na pesa shekeli makumi hatanu tsihianyi na kiheo kya handu haele.

⁴ Kokoya nyi mndumka, nechitalao na pesa shekeli makumi haṟaṟu.

⁵ Ko koya mnducho nyi o maka wokia maka itanu tane makumi hawi nechitalao na pesa shekeli makumi hawi ko manake, na shekeli ikumi ko mana o waka.

⁶ Kokoya nyi mana o kisoṟo o meri fumu tane maka itanu nechitalao na shekeli tsitanu, na mana o kika nyi shekeli tsiṟaṟu.

⁷ Kokoya mnducho nyi msoṟo o ngoseṟa ya maka makumi haṟandaṟu wuhuru woke wochiwa shekeli ikumi na tsitanu; na kokoya nyi mndumka nyi shekeli ikumi.

⁸ Kokoya mnducho mowika kyasakyo nyi mkiwa aleidima itaa wuhuruwo, kyasiang'u mndu nechidao ko mkohanyi. Mkohanyi nechimnenga wuhuru woke wuhianyi na wuidimi wo icho mowika kiteṟio.

⁹ “Kokoya kiteṟiokyo nyi kya shuma sa wandu wekewutia Mndumii-Ruwa mwano, kyasia kiumakyo kechiwa kindo kiele.

¹⁰ Kuwode momu foilacha kiumakyo na kingi kyosepfo, mcha ko mbicho ang'u mbicho ko mchapfo. Kokoya ailacho kiumakyo; shose shishiwi shechiwa shiele.

¹¹ “Kokoya kiteṟiokyo nyi kiuma kiteṟefukie; kii nyi mbaṟi ilawaṟi iendie Mndumii-Ruwa; mnducho alewika kiteṟio, nechiendie mkohanyi,

¹² na mkohanyi nahambe wuhuru woke wuhianyi na wucha ang'u wuwicho woke. Chandu mkohanyi echidumbuo nyi wudo kechiwa.

¹³ Kyaindi kokoya nyio amonyi akundi imtalaa, kyasia nechilekia wuhuruwo na kienga kya makumi hawi ngoseṟa.

¹⁴ “Mndu kashimbuo mba yake iwe njiele ko Mndumii-Ruwa, mkohanyi nechiteṟia wuhuru woyo wuhianyi na wucha ang'u wuwicho woyo. Chandu echiteṟia, nyi wudo kechiwa.

¹⁵ Kokoya mnducho alekunda ishimbuo kakunda iitalaa mbayo; kyasia nechiengeṟa kienga kya makumi hawi kya wuhuru wo mbayo; nayo yechiwa nyi masaa hake.

¹⁶ “Mndu kawika teri yake, ii nyi kyoṟa kyake kaishimbuo ko Mndumii-Ruwa, kyasia wuhuru woyo wochiteṟio wuhianyi na shilimu sho shekedemo o demenyi; orio shilo makumi hawi sha Ngano wuhuru woke nyi shekeli makumi hatanu sha pesa.

¹⁷ Ko koya ashimbuo dema lyake kiidi kya maka fo ngumbuo ya maka makumi hatanu, wuhuru wolyo kiwaṟi wuhiane na shiheo shanu.

¹⁸ Kyaindi kalishimbuo makafo fomeida; mkohanyi nechidumbuo wuhuru wolyo wuhianyi na maka itsuhee kushike maka fo ngumbuo ya aka makumi hatanu na wuhuru wolyo wunyiiṟo.

¹⁹ Na Kokoya menyi akunda ilitalaa, nkiwaṟi naengeṟe kienga kya makumi hawi kya wuhuru wo demalyo, na numa lyiwe masaa hake.

²⁰ Kyaindi kokoya alakundi ilitalaa ang'u kakumbia mndu ungi, kyasia, demalyo lyilatalaose manta.

²¹ Kiidi kya maka fo ngumbuo maka makumi hatanu, demalyo lyechideo lyiwe liele lya Mndumii-Ruwa mlungana. Lyechiwa lya Mkohanyi.

²² Kokoya mndu ashimbuo dema alyihuṟie, lilai lyake lya kioṟa,

²³ mkohanyi nechiteṟia wuhuru wo demalyo wuhianyi na maka itsuhee kushike maka fo ngumbuo ya maka makumi hatanu, na mnducho kiwaṟi natae wuhuru wolyo cha nyi kindo kiele ko Mndumii-Ruwa.

²⁴ Kyaindi kiidi kya maka fo ngumbuo ya maka makumi hatanu, demalyo nkiwaṟi liwihiṟio mndu alelikumba.

²⁵ Orio wuhuru wochihesho kui kiheo kya wulemeri wo shekeli wuhianyi na kiheo kya handu haele: Wulemeri wo gera makumi hawi wuhianyi na wulemeri wo shekeli imu.

²⁶ “Kuwode momu foshimbuo mshao ya kuwoka ya shumapfo; kui kido nyi ha Mndumii-Ruwa kiwe nyi mmbe angu nyi machondi.

²⁷ Kokoya nyi kiuma kiteṟefukie; menyi okyo nechikihuṟa ko kiheo kihianyi na chandu mochimhesha, nao nechiengeṟa kienga kya makumi hawi kya wuhuru wo kiumakyo. Kokoya alatalao, kyasia nechikumbo wuhuru chandu shiheo shanu shii.

²⁸ “Kyaindi kindokyo kyose kikishumbuo ko Mndumii-Ruwa, kokoya nyi mndu, ang'u shuma, ang'u kindo kiwukanyi na kyoṟa shechikumbo manya italaopfo. Ikyo kyose kikishimbuo ko Mndumii-Ruwa nkikiele nakamu.

²⁹ Mndu oose aimshimbuo ko Mndumii-Ruwa kundu narumatso, nalatalao; kiwaṟi nawoho.

³⁰ “Shiano sha shilimu kokoya nyi mbaṟi ya mso, ang'u ndunda tsa mashidinyi shose nyi masaa ha Mndumii-Ruwa; nyi shishiele ko Mndumii-Ruwa.

³¹ Kokoya mndu akunda italaa mwano foke, nechitaa wuhuru woke naengeṟe kienga kya makumi hawi kya wuhuru wo mwanofo.

³² Kya shuma, shikameitalo, orio kya ikumi kii kiele ko Mndumii-Ruwa.

³³ Mndu oose awode momu fowesa kokoya kiumakyo kikicha ang'u kikiwichopfo; kiumakyo kilailacho na kingi manyale. Kokoya kyailacho na kingi, shose shishiwi shechiwa shiele; shechitalaopfo.”

³⁴ Iho nyiho mawawaso sa Mndumii-Ruwa aleitika Mose kundu nawie Waisraeli, kulya fumvuhu lya Sinai.