WALEWI 26 - Bibilia Kui Mdedie fo Kimochi

Mboṟa kipfa kya wuindi

¹ “Mulakusungusie mfanano ya maruwa ha wongo, mulawade masanamu hawo hepacha manya ngo, manya masanamu ha maho matsane orukenyi lonu na ishiindia; kipfa Inyi nyio Mndumii-Ruwa, Ruwa onu.

² Wadenyi sabato tsako na iindia handu hako haele. Inyi nyio Mndumii-Ruwa.

³ “Kokoya moindia mawawaso hako na iwada mawawaso hako,

⁴ njechimwendie mvuo kiheri kisumhanyi, oruka luidime ikumbia mfoeṟa fo shilimu, na ndunda tsa mashidinyi ha mademenyi.

⁵ Wechiweha mbeke tane wahaa msabibu; wechihaa msabibu tane kiheri kewaya mbeu. Mochiwada kelya kiingiki na ikaa kipuo orukenyi lonu.

⁶ Njechimuinenga ofoṟo orukenyi tane molaa kulawode kindokyo kyose kechimuowesha. Njechiwuta mando ha nja malang'a orukenyi na oruka lonu kochikaapfo shidapfo.

⁷ Mochifuna wakituwa wanu na iwawaha kui oshu.

⁸ Wandu wanu watanu wechifuna wakituwa ihana lyimu; na wandu wanu ihana lyimu wechifuna wakituwa shiku ikumi. Wakituwa wanu wechiarisikia oshangunyi lonu kui oshu.

⁹ Njechimuichio makulili na imusaṟia muwade wana wafoi na imupfumbutsa; na Inyi njechiwanza mkundana foko nanyo.

¹⁰ Kiheri kya shilimu mochikoya molya shilimu shilya sha kacha mutsuhaṟie; kechimukoya iwuta mtsuhaṟo fo kacha shikumbinyi muwone maanya fowika shilimu shihya.

¹¹ Njechiwika handu hako hekaa ipfo konu, manya njechimudapfo.

¹² Njechichumia kiidi kyanu na iwa Ruwa onu nanyo mochiwa wandu wako.

¹³ Inyi nyio Mndumii-Ruwa, Ruwa onu njilemwuta orukenyi lo Misri kundu mulawe masinga ha Wamisri. Inyi njilefunja shitemba shilya muwewapfungie nzingonyi tsanu na imlekia muchumie necha.”

Oseso

¹⁴ “Kyaindi kokoya mulanjiicho na iosha mawawaso hako,

¹⁵ mkamina wuikimbi woko, na isuo mrimenyi mawawaso hako, mkada mulaindie mawawaso hako hose, mukafunja mkundana foko,

¹⁶ kyasiang'u nyi udi njechiwika: Njechimukapa na imuendie wuowu wung'anyi peṟeseng'u ndaaṟe ya kipeeta na isemu lyechiwaha meso na imupootsa. Mochiwaya mbeu tsanu mulechihuyo kyamba wakituwa wanu nyiwo wechitsilya.

¹⁷ Njechikoyana nanyo, nanyo mochikapo nyi wakituwa wanu; mochichilio nyi walya wamsuo. Mochikangaṟika na idicha ma kokoya kulawode mndu oose aimuwingia.

¹⁸ Na manya numa ya ikapo mudo, mochinjiichopfo, kyasiang'u njechimukapa ka mfungade ngoseṟa kipfa kya manyamaṟo hanu.

¹⁹ Orikiiki lonu njechilufunjia kuleshe njihaluo ngina tsa huye tsiume cha menya, na oruka lonu lulawade mvuo luume cha aṟeṟa.

²⁰ Mochikuhoda kui pfinya tsanu kya wulya cha kipfa madema hanu heende shilimupfo na oruka lonu lochikumbia ndundapfo.

²¹ “Mukaengeṟa injikaṟuo na ileha injiicho, njechiengeṟase ngapo tsanu ka mfungade chandu wunyamaṟi wonu wufoi.

²² Njechidika mando ha nja malang'a konu sa hechirakuo wana wanu, ilya shuma shanu, na ianguṟa iitala lyanu tane njomongo tsanu tsawa cha nuka ilawode mṟinga.

²³ Kokoya manya numa ya ngapoyo mulanjihalukia Inyi, indi mukaengeṟa iwingana na Inyi,

²⁴ kyasia, na Inyi njechiwingana nanyo na imuengeṟia ngapo ka mfungade ngoseṟa kipfa kya wunyamaṟi wonu.

²⁵ Njechimwendie oshu lochitaa kiṟache kipfa kya mkundano mulefufunja. Mochidichia mṟinyi yanu, kyaindi njechimudikia ndaṟe njiwicho njimuwike mawokonyi ha wakituwa wanu.

²⁶ Kyelya kyanu njechikitachuo, waka ikumi wechikahaṟa mkate rikonyi lyimu. Wechimuhawia kui kiheo. Ma mukamemarisa ilya shelya na mochiwado nyi njaa tupu.

²⁷ “Na ma numa ya isho shose mlamenjiadanyie mukaengeṟa injikaṟuo,

²⁸ kyasia na Inyi njechiwingana nanyo kui nyashi ing'anyi, njimukape Inyi njimonyi ka mfungade ngoseṟa kipfa kya njonyamaṟo tsanu.

²⁹ Nlyondi mochilya wana wanu wa kiumi na wa kika.

³⁰ Na Inyi Njechinyamaṟa handu hanu ha mwindie mafumvuhu, njechiwunduo rasio tsanu tsedutsia ubani, njechikumba mnying'a yanu huya masanamu ha maruwa hanu. Mrima foko fochimusuo mnu nakamu.

³¹ Mṟi yanu njechiirumatsa, handu hanu haele njechihahaluo nuka ilawode mṟinga na njopfamo tsanu njicha tsa mwano yanu njechitsiidikia mantapfo.

³² Njechirumatsa oruka lonu handu ma wakituwa waisamiapfo wechiṟihio.

³³ Njechimupaṟatsana nyo kiidi kya wandu wa mbaṟi tsingi na isomuo oshu kipfa kyanu. Oruka lonu lochiwa mrapu na mṟi yanu yechiwa injisame.

³⁴ “Nanyo ili mochikaa mawokonyi ha wakituwa wanu nlyondi oruka lochichihiṟo nyi sabato tsalo kiheri oruka lochiwa wukiwa. Oruka lochisia moo na ichihiṟo nyi sabato tsalo.

³⁵ Chandu lochikaa wukiwenyi nyi wudo lochihuyo kota chandu muweipfo.

³⁶ Na iwo maata wanu wechikiapfo njechiwaenenga wuowu mrimenyi yawo; kulya orukenyi lo wakituwa wawo; manya iṟa likawiwito nyi otanu wechilidicha. Wechidicha cha ili mndu aidicha shida. Wechidicha na ioloka ma kokoya kulawode mndu aiwawingia.

³⁷ Wechiolokiana wo wenyi ko wenyi cha mndu aidicha shida, ma kokoya kulawode mndu aiwawingia. Mochiwada pfinya yewingana na wakituwa wanupfo.

³⁸ Mochiarisikia kiidi kya mkambo ya wandu na njoruka tsa wakituwa wanu tsechimumeṟa.

³⁹ Kokoya maata wanu wakiiya njorukenyi tsa wakituwa wanu wechipooka na iarisika kipfa kya wuwicho wowo na wo wafee wawo.

⁴⁰ “Kyaindi kokoya wadumbuya wuwicho wowo, na wo wafee wawo kya wupiṟi walenjiwutia Inyi, na chandu walewingana na Inyi,

⁴¹ wakakumbuo kitewe njilewingana nawo na iwaduo orukenyi lo wakituwa wawo; kokoya nyi kya lohi mrima yawo ikakunyiṟa na idumbuya wuwicho wowo,

⁴² nahong'u njechikumbuo mkundana foko na Abrahamu, Isaki na Yakobo, na ikumbuo oruka lulya njilewawikia kyasa.

⁴³ “Kyaindi Mandi wai nja ya oruka lowo, orukalo lochichihio nyi sabato tsalo, kiheri lochiwada wukiwa. Kiherikyo wechidumbuya wuwicho wowo wopiṟa mawawaso hako na ihasuo.

⁴⁴ Kyaindi kya isho shose, mandi wai orukenyi lo wakituwa wawo; Inyi njechiwakumba ma iwasuo na iwarumatsa nakamu na ikumba kuleshe mkundana fokopfo.

⁴⁵ Ote! Kipfa kyawo njechikumbuo mkundano njilefuwika na wameku wawo sa njilewawuta kulya orukenyi lo Misri, mkambo fo wandu fukaṟingishia, kundu Inyi njiwe Ruwa owo. Inyi nyio Mndumii-Ruwa.”

⁴⁶ Iho nyiho mawawaso, shiteṟio na wuikimbi sa Mndumii-Ruwa, aleinenga wana wa Waisraeli kulya fumvuhu lya Sinai kui owoko lo Mose.