WALEWI 25 - Bibilia Kui Mdedie fo Kimochi

Isia moo lya madema maka fo mfungade

¹ Mndumii-Ruwa, nalewia Mose kulya fumvuhu lya Sinai,

² “Wia Waisraeli kudi: Ilyi mochishika kulya orukenyi njimuinenga nyo Inyi Mndumii-Ruwa; orio maka fo mfungade madema hechilaṟo halechidemo kui wuindi chandu Mndumii-Ruwa ahamba.

³ Ko maka iṟandaṟu mochidema madema, mochiwaya, mochirawuya msabibu yanu na isambuo shilimu shanu.

⁴ Kyaindi maka fo mfungade nyi fo sabato yesiamoo; nyi sabato ya Mndumii-Ruwa. Mulawaye kindokyo kyose manya irawuya msabibu yanu.

⁵ Ikyo kyose kechido kikenyi mulakisambuo ang'u itowa ndunda tsa msabibu kuwuka mashidinyi halamarawuye. Ifo fochiwa maka folaṟa madema halademo.

⁶ Manya kudo makafo folaṟa madema fochimwinenga shelya nyo muwenyi, masinga hanu ha kisoṟo na ha kika, waṟundi wanu, na wahenu wai kiidi kyanu.

⁷ Oruka lochiihutsa shuma shanu na mando ha nja hai kiidi kyanu.”

Mkonu fo lekia

⁸ “Mochiitala maka mfungade ka mfungade yechiwa maka makumi haana na kenda (49).

⁹ Numa mfiri fo ikumi fo meri fo mfungade fui nyi mfiri fowikio kisanza, mochiduma mndu nakape iranda orukenyi kose.

¹⁰ Maaka fo makumi hatanu mochifuindia mochionguo ikuachia masinga hose orukenyi. Makafo fochiwa mnene fokumbuo maka makumi hatanu (50). Orio umu onu nechiwuuya masaa hake na wa kanyi koke.

¹¹ Kipfa makafo, nyi fo mfiri mnene fo ngumbuo ya maka makumi hatanu (50) mkonu fo Yubile, mulawaye mbeu ang'u isambuo ikyo kyose kidoye kikenyi manya ihaa msabibu kuwuka mashidinyi mulaiwaaye.

¹² Makafo nyi fo Yubile konu; fochiwa maka mwele. Kudo mochilya shilya shidooye shimenyi ipfo mademenyi.

¹³ “Kiidi kya makafo fo Yubile orio kindo kilekumbo kiwaṟi kiwihiṟo na ko menyi.

¹⁴ Ilyi uihuṟa ang'u uikumbia wamṟasa opfo dema kulamlembe.

¹⁵ Wuhuru wo teri kiwaṟi wuhiane na maka ilamewihiṟio menyi oyo.

¹⁶ Kokoya makayo iwaṟi nyi ifoi nochiengeṟa wuhuru na kokoya makayo intutu nochianguṟa wuhuru, cha kipfa wuhuru wolyo wochihesho kui shilimu shilya aikukumbia.

¹⁷ Mulalembane kyaindi indienyi Ruwa onu. Inyi nyio Mndumii-Ruwa, Ruwa onu.

¹⁸ “Ko ikyo, mochiosha mawawaso hako na iawutsia shilya njiambawasia, kundu muidime ikukaya na kupuo kunu orukenyi.

¹⁹ Oruka lochialutsa shilimu shalo nanyo mochikuliia na ikuihudia na ikukayapfo na kipuo.

²⁰ Kyaindi kofia mochikusaṟa “Nkiki lochilya maka fo mfungade; kokoya lulawode momu fodema manya isambuo shilimu shadu?”

²¹ Ambuya, Inyi njechiwikia oruka mboṟa kiidi kya maka fo kaṟandaṟu nalo lochimuinenga shilimu shimushikie ko maka iṟaṟu.

²² Kiheri mochiwaaya maka fo nyanya mochikoya molya shilimu sha kacha na mochilungana ilya tupu tane maka fo kenda ili mochiwookase isambuo.”

Wuhendelyi wotalaa teri

²³ “Manta teri ilakumbo manyale kipfa teri nyi masaa hako nanyo nyi wahenu na wakyaṟo wekuidia orukenyi loko.

²⁴ Nkyo kimaduma kiidi kya orukenyi kose mochiwada wuhendelyi wotalaa teri.

²⁵ “Kokoya manomayo nawa mkiwa, kakumba teri yake, kyasia manomae oke o hafui asumhanyi iitalaa nechitalaa.

²⁶ Kokoya mnducho alawode mndu asumhanyi iitalaa, indi lyefurumia kawa msuṟi na iwada pfinya yetalaa teri iya yake,

²⁷ kyasia, nechiitala maka iya iwaṟi wokia mandi alelikumba, natae wuhuru wose; na mndu ulya alelihuṟa kimbaṟi nambihiṟie.

²⁸ Kyaindi kokoya alawode pfinya yelitalaa, demalyo lyechikaa mawokonyi ha ulya alelihuṟa tane maka fo mfiri mnene fokumbuo maka makumi hatanu Maakafo nkiwaṟi demalyo lyiwihiṟio ulya menyi molyikumba.

²⁹ “Kokoya mndu akumba mba yake yekaa injiwike mṟinyi fumwiṟihie na omombo, nechiidima iitalaa ko kiheri kya maka fumu wokia aleikumba. Nawode momu foitalaa ko makafo fumu.

³⁰ Kokoya mbayo injiwike mṟinyi fumwiṟihie na omombo ilatalao ko maka fumu, kyasia mbayo yechiwa masaa ha ulya aleihuṟa mlungana shisharinyi shawo shose; manya yechiwihiṟo kiheri kya maka fo mfiri mnene fokumbuo maka makumi hatanupfo.

³¹ Kyaindi mba tsii nja ya mṟi fumwiṟihie na omombo; tsechikaa kiidi kya mdumbuye fulya fulya fo madema; mbatso tsechiidima italao ko maka fumu; kyaindi nkiwaṟi tsiwihiṟio wenyitso kiheri kekumbuo maka makumi hatanu.

³² Manya kudo mba tsinjiwike mṟinyi injiikolonyie nyi Walewi; tsechiidima italao kiherikyo kyose.

³³ Kokoya umu o Walewi alakunda iosha sungusihu yake yetalaa, kyasia mbayo ilekumbo na ate iwihiṟio menyi kiheri kya maka fo ngumbuo ya maka makumi hatanu; kyamba mba tsinjiwike mṟinyi injiikolonyie nyi Walewi waleinengo cha kiheo kyawo nyi Waisraeli.

³⁴ Kyaindi madema hawodo nyi Walewi wose, halakumbo, kyamba ikyo nkyo kyooṟa kyawo kya mlungana.”

Iakuya wakiwa

³⁵ “Kokoya odoo nai mkiwa alaidima ikuambuya amonyi; nao nai na iyo kikuwaṟi nomwambuye nakae na iyo; mṟundie cha mhenu ang'u mokyaṟo ai ipfo kopfo.

³⁶ Kulakunde nakutae ngoseṟa ya mbaṟi yose. Indi india Ruwa, na odoo naengeṟe ikaa na iyo.

³⁷ Kulamwakuye pesa kui isuhuṟa ang'u imnenga kelya kundu nakutae ngoseṟa.

³⁸ Inyi nyio Mndumii-Ruwa, Ruwa opfo, njilekuwuta orukenyi lo Misri kundu njicheikuinenga oruka lo Kanaani na kundu njiwe Ruwa opfo.”

Iinenga masinga mkuachie

³⁹ “Ko koya odoo ekekaa kufui na iyo awa mkiwa, kakukumba kopfo, kulambade nakusingie cha isinga.

⁴⁰ Nechikaa naiyo cha mṟundi ambike kiṟundionyi ang'u cha mokyaṟo. Nechikuṟundia tane maka fokumbuo maka makumi hatanu.

⁴¹ Maka fo kikuwaṟi nomsame nawuye na ko wandu wake, na kyoṟenyi kya wafee wake; mlekie nakae na wandu wake.

⁴² Cha kipfa Waisraeli nyi waṟundi wako jilewawuta orukenyi lo Misri, nahong'u walakumbo cha masinga.

⁴³ Kulachilie odoo kui pfinya, indi india Ruwa opfo.

⁴⁴ Kya masinga ha kika na ha kisoṟo, noidima iwahuṟa kuwuka ko wandu wa mbaṟi tsingi tsa mṟasenyi.

⁴⁵ Nocheidimase ihuṟa masinga kuwuka ko wahenu wai kiidi kyanu na wandu wawo wafeeyo orukenyi lonu; nawo wechiwa masaa hanu.

⁴⁶ Masingaho noidima idambikia wana wapfo wawe masaa hawo mlungana. Iwo noidima iwahaluo masinga hapfo, kyaindi kya manomayo Mwisraeli, kulamchilie kui pfinya.

⁴⁷ “Kokoya mhenu ang'u mokyaṟo ekekaa kiidi kyanu awa msuṟi; na manomayo kawa mkiwa kakukumba ko mhenucho ang'u mokyaṟocho ang'u ko umu o wandu wawo,

⁴⁸ neidima italao amemaa ikukumba; umu o wana wa mae neidima imtalaa.

⁴⁹ Washidie-daa neidima imtalaa, ang'u manamae, ang'u o kisharinyi-daa neidima imtalaa; o amonyi-daa neidima ikutalaa kokoya awa msuṟi.

⁵⁰ O handu hamu na momhuṟa, neichiitala maka wokia mandi alekukumba tane maka fo ngumbuo ya maka makumi hatanu. Wuhuru wo ilekio lyake wochihiana na maka alemsingia. Kiheri alesingia mndumii oke kechiitalo cha mṟundi ambike kiṟundionyi.

⁵¹ Kokoya iitala lya maka mṟasa maka fo ngumbuo ya maka makumi hatanu yafo ngoseṟa; nechiwihiṟio kilya kiengeṟekieho.

⁵² Kokoya makayo intutu ilameshikia maka fo ngumbuo ya maka makumi hatanu nechiitala wuhuru wo wutsuhae wuhianyi na makayo namtae kya ngoseṟa.

⁵³ Kiheri kyose ai ko mndumii oke nechiwado cha mṟundi o wueri orio maka. Icho alemhuṟa nalambade cha isinga.

⁵⁴ Kyaindi kokoya mnducho na wa kanyi koke alaletalao ko njia tso, kyasia nainengo ikuachia maka fo ngumbuo ya maka makumi hatanu o na wana wake.

⁵⁵ Waisraeli nyi waṟundi wako, kipfa njilewawuta orukenyi lo Misri. Inyi nyio Mndumii-Ruwa, Ruwa onu.”