WALEWI 24 - Bibilia Kui Mdedie fo Kimochi

Taa tsa ihema liele

¹ Mndumii-Ruwa, nalewia Mose,

² “Wawasa Waisraeli wakuendie mafuda mecha kipfa kya taa kundu taayo iake kiheri kyose.

³ Aroni nechiwika taayo ihemenyi lyekusanzia, kya nja ya isulia lya isanduku lya mma kundu iake oshangunyi loko kio taṟaṟaa. Ilyi nyi iwawaso lya mlungana ipfo shisharinyi shanu.

⁴ Nechiwika taatso huya kimnaṟa kya taa kya sahabu njicha tsiake oshangunyi lo Mndumii-Ruwa, kiheri kyose.”

Mkate ya ihema liele lya Mndumii-Ruwa

⁵ “Ira mso mmamiri, shilo ikumi na shiwi nokahaṟe mkate ikumi na iwi.

⁶ Mkateyo iwiko njotasa tsiwi mesenyi ya sahabu njicha, orio otasa mkate iṟandaṟu.

⁷ Orio otasa nohekieho ubani wucha kundu wuwadane na mkateyo, iwe kienga kya kidaso kekoṟa na ngumbuo ko Mndumii-Ruwa.

⁸ Orio mfiri fo sabato Aroni nochiiachikia necha otasa oshangunyi loko Inyi Mndumii-Ruwa, handu ha Waisraeli cha mkundana fo mlungana.

⁹ Aroni na oshari loke wawenyi nyiwo wawainenge momu folya mkateyo kipfa iinjiele mnu kyamba nyi kienga kya mwano njekeinengo Inyi Mndumii-Ruwa, kui modo. Iki nkiwawaṟi mlungana.”

Ngapo isumhanyi

¹⁰ Mkonu fumu kukocha kituṟu kulya mfiṟihenyi; Mwisraeli umu kaloyana na manake umu mae nyi Shelemothi Mwisraeli na ndeye nyi Mmisri.

¹¹ Mkonu fumu manake ulya mae Shelemothi mana o Dibri o kisharinyi kya Dani, naleruma na isesa rina lya Ruwa. Kyasia wandu wakamduo manakecho ko Mose,

¹² wakambika kipfungonyi mṟasa wechiloṟo mdumbuye fo Mndumii-Ruwa.

¹³ Kyasia, Mndumii-Ruwa kawia Mose,

¹⁴ “Wuta manakecho aleruma na nja ya mfiṟiha na walya wose waleicho kechiruma wahekie mawoko hawo huya mdo foke, na wandu wose wambahe wechimkumbia maho.

¹⁵ Naiyo nowie Waisraeli ke mndu oose echisesa Ruwa oke kimbaṟi nakudike wunyamaṟi woke.

¹⁶ Mnducho oose nawe nyi menyikanyi ang'u nyi mhenu echiruma Mndumii-Ruwa, wandu wose wechimbaha wechimkapa na maho.

¹⁷ Mndu oose echiwaha mndu ungi kimbaṟi nao nawoho.

¹⁸ Mndu oose echiwaha kiuma kya mndu ungi kimbaṟi kiṟaache kingi; kii na moo ko kii na moo.

¹⁹ Mndu oose echiwika odoe kifaṟe, kiwari nao nawewiko kifaṟe kihianyi na kilya alewika ulya ungi,

²⁰ nalemfunja fuo nao nawefunjo fuo, riso ko riso, iheho ko iheho. Orio mndu awawiṟa odoe kimbaṟi nao nawewawiṟo kihianyi na mawuto halya hake.

²¹ Msa awaha kiuma kimbaṟi nalekie kingi; kyaindi mndu oose kawaha mndu ungi nkiwari nao nawewoho.

²² Iwawasolyi lyiwaṟi ko mhenu na menyikanyi. Inyi nyio Mndumii-Ruwa, Ruwa onu.”

²³ Nahong'u Mose kawia Waisraeli mbonyitso tsose. Wakaduo mndu ulya aleruma Mndumii-Ruwa, nja ya mfiṟiha, wakambaha wechimkapa na maho. Nyi wudo Waisraeli walewuta chandu Mndumii-Ruwa, alewawasa Mose.