WALEWI 23 - Bibilia Kui Mdedie fo Kimochi

Mkonu mnene ya Waisraeli

¹ Mndumii-Ruwa, nalewia Mose,

² “Wia Waisraeli kudi: Kiidi kya mfiri yako ing'anyi Inyi Mndumii-Ruwa, injisambuṟe mochiwada kisanzio kiele. Mkonu njisamburie nyiyo ii:

³ Kochikaapfo mfiri iṟandaṟu yeṟunda. Kyaindi mfiri fo mfungade nyi fo sabato: nyi mfiri fosiamoo, mochiṟundapfo, na machiwada kisanzio kiele. Mkonufo fo mfungade mochiṟundapfo, iyo nyi sabato sa injishimbuo ke yako Inyi Mndumii-Ruwa, kiidi kyanu mose.

⁴ Mkonu yako ingi ing'anyi Inyi Mndumii-Ruwa, sa mochiwada kisanzio kiele nyi ii.”

Mkonu mnene fo Pasaka na ya mkate ilang'tarang'ashe

⁵ “Kyukanyi kya mfiri fo ikumi na kaana fo meri fo kuwoka mochifuindia kui wuindi woko Inyi Mndumii-Ruwa, mfiri mnene fo Pasaka.

⁶ Mkonu fo ikumi na katanu fo merifo ifo, mfiri mnene fo mkate ilantarang'ashe fuiwoka. Mkonu mfungade mochilya mkate ilantarang'ashe.

⁷ Mkonu fo kuwooka mochiwada kisanzio kiele. Mkonufo mulaṟunde kindo.

⁸ Mkonuyo yose mfungade mochinjiinenga Inyi Mndumii-Ruwa, mwano yemaya modonyi. Mkonuyo mfungade mochiwada kisanzio kiele. Mulaṟunde maṟunda.”

⁹ Mndumii-Ruwa, nalewia Mose,

¹⁰ “Wia Waisraeli kudi: Ilyi mochiida na ipfo orukenyi sa njechimuinenga mukasambuo shilimu shalo, mochiendie mkohanyi mhanda fo shilimu sha kuwoka.

¹¹ Mkohanyi nechiwika nayo kichano kenjiinenga ili lya ngama kundu muidikio.

¹² Mkonufo ili mochiwika kichano keinengia mhandafo oshangunyi loko mochinjiinenga Inyi Mndumii-Ruwa, kidaso kekoṟa kya kichondi kya kisuwa kya maka fumu kilawode tewe.

¹³ Handu hamu na kidasokyo mochilekia mwano fo mso shilo shiwi sa mso mmamiri fumlongelonge na mafuda sa mochinjiinenga Inyi Mndumii-Ruwa, kui modo, na mpfaamo fofo fochinjichihiṟa. Mwano foyo fo kindo kenyo nyi mpfinyo lita imu.

¹⁴ Mulamenjiendie Inyi Ruwa onu mwanofo mfirifo, muwode momu folya shilimu sha kuwoka sha isho mulesambuopfo, kokoya shiwishi ang'u shishikaange ang'u shishikahaṟe shiwe mkate. Iwu nyi wuikimbi woringa mlungana, kiidi kya shishari shanu handu hose mochikaa.”

Mkonu mnene fo shilimu

¹⁵ “Mochiitala mfungade mfungade wokia mfiri foituma sabatoyo mochiende mhanda ya mwano fo kichano fonjiendie Inyi Mndumii-Ruwa.

¹⁶ Mkonu fo makumi hatanu mfiri fo kawi fo sabato ya mfungade, mochinjiendie Inyi Mndumii-Ruwa, mwano fo mso mhya.

¹⁷ Orio kishari kechiende mkate iwi walekie mwano fo kichano oshangunyi loko Inyi Mndumii-Ruwa. Orio mkate kiwaṟi fusungusio fo shilo shiwi sha mso mmamiri fumbike kitarang'asha; nafo mochinjiendie Inyi Mndumii-Ruwa, fui nyi wuleki wonu wo kilimu kya kuwoka.

¹⁸ Hamu na ikyo, mochilekia mahuṟuwi mfungade ha maka fumu, ipung'a litutu limu, na masuwa hawi. Shumasho shechiwa kidaso kemaya modonyi handu hamu na mwano fo mso na mwano fo kindo kenyo. Mpfaamo fo mwano ii fochinjichihia Inyi Mndumii-Ruwa.

¹⁹ Mochilekia kioṟo kimu mwano fowuta wunyamaṟi, na masuwa hawi ha maka fumu kipfa kya mwano fo ofoṟo.

²⁰ Mkohanyi nechishiitsa oshangunyi loko Inyi Mndumii-Ruwa, shiwe mwano folekia fo kichano handu hamu na mkate fo shilimu sha kuwoka na shisuwa shilya shiwi. Shindosho shii shiele ko Mndumii-Ruwa. Nasho shechilio nyi wakohanyi tupu.

²¹ Mkonu na ifo mochiwika kisanzio kiele; mulaṟunde iṟunda. Ilyi nyi iwawaso lyeindio mlungana ipfo shisharinyi shanu shose, na handu hose mochikaa.

²² “Kochisambuo shilimu demenyi lyapfo, kulasambuo shose manyale mṟasa mtsitsionyi fo dema lyapfo manya kulawuye numa isanyia maroti. Iho nochideeya wakiwa na wahenu. Inyi nyio Mndumii-Ruwa, Ruwa onu.”

Mkonu mnene fo maaka mhya

²³ Mndumii-Ruwa, nalewia Mose;

²⁴ “Wia wandu wa Waisraeli kudi: Mfiri fo kuwoka fo meri fo mfungade mochifuhaluo mfiri fosia moo, mfiri fo ngumbuo yechiedio kui ṟu lya maranda na iwada kisanzio kiele.

²⁵ Mulaṟunde kindo mfirifo na kimuwaṟi munjiendie Inyi Mndumii-Ruwa, kidaso kemaya modonyi.”

Mkonu fo matu matu

²⁶ “Mndumii-Ruwa, nalewia Mose,

²⁷ Mkonu fo ikumi fo merifu fo mfungade nyi mfiri fo kisanza. Mkonufo nyi mfiri fowika kisanzio kiele. Mochikuotoya na ilekia mwano sa fokeinengo Mndumii-Ruwa, kui modo.

²⁸ Mulaṟunde iṟundalyo lyose lya orio mfiri mfirifo, mfirifo nyi fo kisanza, mfiri fommbikia nyo kisanza oshangunyi lo Mndumii-Ruwa, Ruwa onu.

²⁹ Mnducho oose alechikuotoya mfirifo kimbaṟi naletsano, nawiko kuleshe na wandu wake.

³⁰ Mnducho oose echiṟunda iṟundalyo lyose mfirifo njechimrumatsia kuleshe na wandu wake.

³¹ Mulaṟunde kindo: ili nyi iwawaso lyehendelia mlungana shisharinyi shanu, na handu hanu hekaa hose.

³² Mkonufo fochiwa konu sabato yesiamoo na ikuotoya. Nyi mfiri fo ikumi fo merifo wokia kyukanyi tane kyukanyi kingi.”

Mkonu mnene fo matengo

³³ Mndumii-Ruwa, nalewia Mose,

³⁴ “Wia Waisraeli kudi: Wokia mfiri fo ikumi na katanu fo merifo fo mfungade mochiwikia Mndumii-Ruwa, mfiri mnene fo matengo ko mfiri mfungade. Ifo nyi mfiri mnene fo Mndumii-Ruwa.

³⁵ Mkonu fo kuwoka fo mfiriyo mfungade, mochiwika kisanzio kiele na ma mlaṟunde kindo.

³⁶ Ko mfiri mfungade mochilekia mwano yekeinengo Mndumii-Ruwa, ko modo. Mkonu fo nyanya mochiwika kisanzio kiele na iinenga Mndumii-Ruwa, kidaso kemaya modonyi. Kisanziokyo kii kiele. Mulaṟunde kindo mfirifo.

³⁷ “Ii nyiyo mfiri mnene ya Mndumii-Ruwa, ileachikio sa mochikapa ole muwade kisanzio kiele keinenga Ruwa- Menyi-wuitoṟi shidaso shemaya modonyi, shidaso shekoṟa, na mwano ya mso, kidaso na mwano fo shindo shenyo, orio kimu na mfiri fokyo.

³⁸ Shiinengosho nyi handu hamu na mwano iya mokenjiendie Inyi Mndumii-Ruwa, mfiri fo sabato; mwano yanu muichiwie, mwano yeawutsia shiasa shanu, na mwano yanu ya nnga mokenjiendie Inyi Mndumii-Ruwa.

³⁹ “Mkamemaa isambuo madema hanu mochiwika mfiri mnene ko mfiri mfungade, kuwokia mfiri fo ikumi na katanu fo meri fo mfungade. Mkonu fo kuwoka fochiwa fosia moo tane mfiri fo nyanya.

⁴⁰ Mkonu fo kuwoka mochiira ndunda tsa mashidiho hanu mecha, maṟamba ha makangachi, maṟamba hawode mara hafoi na maṟamba ha mashidi hekedo mbai ya meda, nanyo mochisungusia mfuho oshangunyi ko Ruwa-Menyi-wuitoṟi, Ruwa onu mfiri mfungade.

⁴¹ Orio maka kimuwaṟi iindia mfiri mnene ko mfiri mfungade iindia Ruwa Menyiwuitoṟi. Ili nyi iwawaso lyeindia mlungana shisharinyi shanu shose. Mochiiwuta meri fo mfungade.

⁴² Mfiri mfungade mochikaa matengonyi. Waisraeli wose wechikaa mtengonyi kiherikyo.

⁴³ Ikyo kechimanyisha shishari shanu ke kiheri njilewuta wandeanu kulya orukenyi lo Misri, njilewawika walae matengonyi Inyi nyio Mndumii-Ruwa, Ruwa onu.”

⁴⁴ Mose kaongoya Waisraeli mfiri mnene ya Ruwa Menyiwuitori injiteseheṟe.