WALEWI 22 - Bibilia Kui Mdedie fo Kimochi

Wuele wo mwano

¹ Mndumii -Ruwa, kawia Mose,

² “Wia Aroni na wana wakohanyi waindie shindo Waisraeli wameshinjishimbuya walashike iruma rina lyako liele. “Inyi nyio Ruwa.”

³ Wawie kudi, “Kokoya umu o iwo wai wafee konu ipfo shisharinyi shanu shose atikiria shindo shiele sa Waisraeli wameshinjishimbuya Inyi Mndumii-Ruwa owo, ateṟefukie, nechiletsano na Inyi. Inyi nyio Mndumii-Ruwa.

⁴ Mndu oose o kisharinyi kya Aroni kokoya nawodo nyi ndaaṟe ya saka ang'u nyi yewuka ofia nalalye shindo shiele mṟasa naheṟemke. Mndu oose kapaya mndu ateṟefukie kui ipaya mnying'a ang'u mndu aiwuka maachi,

⁵ ang'u kapaya ikyo kyose kekekukuruo wanda sa kekeendie mndu iteṟefuka ang'u mndu eidima imteṟefutsa kui njia yo yose,

⁶ mnducho, nechiteṟefuka tane kyukanyi, na awode momu folya shelya, shielepfo mṟasa nasambe kose.

⁷ Mnengeṟi fukameolokia nlyondi echiwa mheṟemtsu. Kombuka oo neidima ilya shelya shiele kipfa ikyo nyi kelya kyake.

⁸ Mkohanyi nalalye nyama ya indo lyapfa lyilienyi ang'u lyawaaho nyi indo lya ngeṟenyi, nalashike ikuteṟefutsa. Inyi nyi Ruwa Menyipfinya.

⁹ Koikyo kiwaṟi wakohanyi wawade iwawaso lyako, walacheiwuta wunyamaṟi na iwoho. Inyi Ruwa Menyipfinya nyio njilewashimbuo.”

¹⁰ “Mndu alai o kishari kya wakohanyi awode momu folya kelya kielepfo. Manya mhenu ko mkohanyipfo ang'u mṟundi oke awode momupfo.

¹¹ Kokoya mkohanyi ahuṟie isinga lyikawa masaa hake, kyasia isingalyo lyiwode momu folya na walya wawafeeye ipfo kanyi kokeda.

¹² Kokoya mana o kika o mkohanyi amwalyike nyi mndu alai mkohanyi awode momu folya shelya shielepfo.

¹³ Kyaindi kokoya manacho o waka o mkohanyi nyi mkusu, ang'u nalesamo na paruo nyi mii nao awode manapfo, nao nalewuya na ko ndeye, nakae nao cha lilya kuwoka ai mrika, oo keidimika nalye kelya kya ndeye. Manya kudo, mhenu awode momu folya shelyashopfo

¹⁴ Kokoya mndu ungi alya shelya shiele alaichi, kyasia nechitaa kienga kya makumi hawi kya kelya kyo alya nawihiṟie mkohanyi.

¹⁵ Mkohanyi nalateṟefutse shindo Waisraeli waendie Mndumii-Ruwa,

¹⁶ na itewa wandu wawuwuyo wuwicho na wunyamaṟi kya ilya shindo shawo shiele. Inyi Mndumii-Ruwa, Ruwa-Menyipfinya nyio njileshimbuo shindosho.”

¹⁷ Mndumii-Ruwa, nalewia Mose,

¹⁸ “Wia Aroni na wana wake wakohanyi na Waisraeli wose kudi: Kokoya mndu oose kidi kyanu ang'u mhenu oose ekekaa kiidi kya Waisraeli kalekia kidaso kyake koya yeawutsia kyasa, ang'u nyi ya kiinengo ko Mndumii-Ruwa, fomaya modonyi,

¹⁹ kundu naidikio, nalekie pung'a ang'u kioṟo ang'u isuwa lilawode tewe.

²⁰ Nkikiime nakamu ilekia ikyo kyose kiwode tewe kipfa kechiidikio ko kiira kyanupfo.

²¹ Mndu oose ili ekeinenga Mndumii-Ruwa, mwano fo ofoṟo kundu nainutsie kiasa, ang'u mwano fo nnga awuta mfiṟihenyi foke fo shuma, nkiwaṟi nalekie kiuma kiheṟemtsu; kiuma kyo kilawade tewe yose.

²² Kulainenge Mndumii-Ruwa, kiuma kya mbaṟi yose ki kipfu meso, kilema, kifunjikie handu, kiwuko nyi ofia, kiwode uhee ang'u okuru, manya kulashiwute shiwe kidaso kemaya modonyi rasionyi lya Mndumii-Ruwa.

²³ Ipung'a ang'u huṟuwi liwode kiungo kimu kilesheleshe ang'u kifui kota nochiidima imlekia mwano fo nnga; indi kulamlekie mwano foawutsia kyasa.

²⁴ Kiuma sa kiungo kyakyo kya kulyo kikiwike kifaṟe, kilepoṟipotso, kifunjikie ang'u kikidumbuo kilainengo Mndumii -Ruwa manyale manya imbika kidaso orukenyi lopfo.

²⁵ Manya kulaambie kuwuka ko wahenu shuma sha mbaṟiyo na injiinengya Inyi Ruwa opfo cha kela. Shumasho shiwode tewe kipfa kya ili shishidumbuo wechiidikio ko kiira kyanupfo.”

²⁶ Mndumii-Ruwa, nalewia Mose,

²⁷ “Kukoshao ipunga, isuwa ang'u kioṟo kechikaa na mae mfiri mfungade. Wokya mfiri fo nyanya keidima iinengo Mndumii-Ruwa cha kidaso kemaya modonyi.

²⁸ Kyaindi manya kulashinje mmbe ang'u ichondi mfiri fumu handu hamu ihache lyayo.

²⁹ Kiheri ochinjiinenga Inyi Mndumii-Ruwa, kidaso keana nochilekia chando kechiidima sikutana noadanyio.

³⁰ Kiumakyo kiwaṟi kilio kyose mfirifo ifo; manya mulatsuhaṟe mṟasa ili lya ngama ngamenyi. Inyi nyio Mndumii-Ruwa.

³¹ “Koikyo mochiwada na iinutsia mawawaso hako, Inyi nyio Ruwa.

³² Mularume rina lyako liele, kyamba kiwaṟi njiindio kiidi kya wandu wa Israeli. Inyi nyio Mndumii-Ruwa, njilemuheṟemtsa.

³³ Nyio Inyi njilemuwuta orukenyi lo Misri kundu njiwe Ruwa onu. Inyi nyio Mndumii-Ruwa.”