WALEWI 21 - Bibilia Kui Mdedie fo Kimochi

Mchumiefo wukohanyi wuele wo Wakohanyi

¹ Ruwa Menyipfinya kawia Mose, “Wia Wakohanyi wana wa Aroni, ke kulakae ma mndu oose kiidi kyawo echikuteṟefutsa echipaya mnying'a ya wandu wa kishari kyake,

² sile kokoya nyi mnying'a fo manomae o kufui: cha mae, ndeye, mana oke o kisoṟo ang'u o kika, manomae,

³ ang'u mshiki oke (ai o mofeo kimu) nao alamealiko.

⁴ O kokoya namsambuṟe iwada kidembo nalakuteṟefutse.

⁵ Wa mba ya Aronyi walaode ohaa ili wapfiiyo, manya walaode itengetia ngerero tsawo manya ikusaṟasaṟa saṟe tsa mbihu.

⁶ Wechiwa waele ko Ruwa owo; manya walarume rina lya Ruwa owo, kyamba wo nyiwo wekedambika shiano shekeinengo Mndumii-Ruwa, Ruwa kui modo kelya kya Ruwa ko ikyo kiwawaṟi wawe waele.

⁷ Kipfa kya ili mkohanyi amshimbuo nyi Ruwa oke nalaalike mka mṟuhui manyale, manya mndumka alai mkeha manya mnduka amsame nyi mii.

⁸ Nochimanya mkohanyi ke namshimbuo, kyamba nyio ekeambia mwano fo mkate fo Ruwa opfo, nochimmanya ke namwele, kyamba Inyi Mndumii-Ruwa, Ruwa njikushimbuo iyo njii mwele;

⁹ mana o kika oose o mkohanyi kakuteṟefutsa kui uruhui, nechirumatso modonyi kipfa nasutsa ndeye, kamteṟefutsa.

¹⁰ “Mkohanyi oose ang'anyi kiidi kya wodoe, nao nang'anyie wodoe, nao namshie mafuda hakaletsio mdohu foke, kashimbuyo kundu naṟae maṟao maele, nalade njui tsake tsiwe owicho manya nalaranduo nguo tsake ikapa kilio.

¹¹ Nalasembeṟie kufui na mnying'a ma ikuteṟefutsa kui mnying'a ma kokoya nyi fo ndeye ang'u mae.

¹² Cha kipfa namshimbuo kui ishio mafuda ha Ruwa oke mdohu, koikyo nalakure handu haele manya nalahateṟefutse. Inyi nyio Mndumii-Ruwa.

¹³ Mkohanyi Ang'anyi nechiidima ialika mana o waka tupu sa ai mkeha.

¹⁴ Awode momu foalika mka mkusupfo, ma mndu alai mkehapfo, ma mṟuhuipfo. Nkimbaṟi naalike mana mkeha o ipfo ko wandu wake amonyi,

¹⁵ nalashike iteṟefutsa wana wake amonyi. Inyi nyio Mndumii-Ruwa, Ruwa njilemshimbuo.”

¹⁶ Mndumii-Ruwa nalewia Mose.

¹⁷ “Wia Aronyi kudi: Luwa lyapfo lyose lya ipfo shisharinyi shapfo shose shechicha msa awode wufafa mbihunyi foke, awode momu fonjitikiria inyi Ruwa oke najiendie mwano fo mkatepfo.

¹⁸ Mndu oose awode wufafa, ampfu meso, atiliwanyi shiwungo, awode kyamu kiwehewehe, awode kiwungo kilesheleshe kota,

¹⁹ awode kudende ang'u owoko lulemeeduka,

²⁰ msa awode kisombe, mndu mfui kota, elekewona necha, awode nduṟuwe, msa awode uhee ang'u mndu ai ndeembe, nalasemberie Ruwa imnenga mkate foke.

²¹ Sa amfee nyi mkohanyi Aroni awode ufafa nalatikirie injiendie kidaso kekoṟa modonyi; kipfa kya ili awode ufafa, kyasia nalanjitikirie Inyi Ruwa kechinjiendie mkate foko.

²² Mnducho nechiidima ikuliia mkate fo Ruwa oke shindo shiele na shindo shiele mnu.

²³ Kyaindi nalatikirie isulia lilya manya alya rasionyi kyamba nawode ufafa, nalashike iteṟefutsa handu haele; cha kipfa Inyi Mndumii-Ruwa, Ruwa nyio njekemushimbuo.”

²⁴ Mose kaongoya Aroni na wana wake na Waisraeli wose mbonyitso tsose.