WALEWI 20 - Bibilia Kui Mdedie fo Kimochi

Ihoṟwo kya mawicho

¹ Ruwa Menyipfinya kawia Mose,

² “Wia Waisraeli kudi: Mndu oose kiidi kya Waisraeli ang'u mhenu ai kiidi kyanu, kalekia mana oke oose nawe kidaso ko ruwa lyelaho Moleki kimbaṟi mnducho nawoho. Wandu wa handuho wechimbaha na maho.

³ Inyi njimonyi njechikoyana na mnducho njimletsane na wandu wake kipfa kya ili alekia umu o wana wake kidaso ko ruwa Moleki na kudo kafanyitsa handu hako haele handu hamu na rina lyako.

⁴ Kokoya wandu wa oruka lo walamkapa na imbaha,

⁵ Inyi njimonyi njechikoyana na mnducho na wa kanyi koke. Njechiwaletsana na wandu wawo, o amonyi na iwo wose wechida walanjiindia wakaosha ruwa Moleki.

⁶ “Kokoya mndu oose ekehenda ko walasha wa waṟumu na wasawi kaṟuhuya nawo kada alanjiindia Inyi njechikoyana nao meso ko meso na imletsana na wandu wake.

⁷ Ko ikyo kudambikienyi ko Mndumii-Ruwa Ruwa muwe waele; kyamba Inyi njii Mndumii-Ruwa, Ruwa onu.

⁸ Wadenyi mawawaso hako na ihaawutsia. Inyi nyio Mndumii-Ruwa, Ruwa njekemuheṟemtsa.

⁹ Mnducho oose ekesesa ndeye ang'u mae kimbaṟi nawoho. Mosesa ndeye ang'u mae nechikudika ipusuo samu yake o amonyi.

¹⁰ “Kokoya mndumsoṟo aṟuhuya na mka o mndu o mṟasa oke, na ate wawoho wawawi.

¹¹ Mndumsoṟo kalaa na umu o waka wa ndeye, nasutsa ndeye; wose wawawi kiwaṟi wawoho. Msoṟocho na mkacho wechikudika ipusuo samu yawo wawenyi.

¹² Mndumsoṟo oose kalaa na malyi o mana, wose wawawi kiwaṟi wawoho. Wawuta wuṟuhui wo wandu wa mbaṟi imu; wechikudika ipusuo samu yawo wawenyi.

¹³ Kokoya mndumsoṟo oose alaa na mndumsoṟo odoe cha ili kee nyi mndumka, nahong'u wose kiwaṟi wawoho kipfa wawuta kindo kipfulutsie kiṟatsie; wechikudika ipusuo samu yawo wawenyi.

¹⁴ Kokoya mndumsoṟo aalika mka kaalikase mamka, iwo nyi wuwicho; wose wawaṟaṟu na ate wakombetso na modo kipfa wawuta wuwicho. Mochiwuta mudo kundu mutoromishe wuwicho kiidi kyanu.

¹⁵ Kokoya mndumsoṟo oose alaa na indo na ate nawoho na indolyo lyiwewaaho.

¹⁶ Kokoya mndumka atikiria indo kalaa nalyo kiwaṟi mkacho nawoho na indolyoda; wechikudika ipusuo samu yawo wawenyi.

¹⁷ “Kokoya mndumsoṟo oose aalika mshiki oke, mana o kika o ndeye ang'u mae na manacho o kika kaidikiana na msoṟocho ai nyi msacha oke, kalaa nao, nyi kindo kipfulutsie, kiwaṟi waletsano na rika lyawo kipfa wawuta kindo kya sonu. Kiwaṟi msoṟocho nakudike wuwicho woke.

¹⁸ Kokoya mndumsoṟo alaa na mndumka ai merinyi, wose wawawi kiwaṟi waletsano na wandu wawo; msoṟocho nalaa na mndumka ai merinyi na mkacho ai merinyi nalaa na mndumsoṟo.

¹⁹ “Kulalae na mshiki o mayo manya mshiki o ndeyo, kipfa iwo nyi wa kisharinyi. Wose wekewuta isho wechiwuwuyo wuwicho wowo.

²⁰ Kokoya mndu alaa na mka o ndeye, ang'anyi ang'u mtutu, nasutsa ndeye ang'anyi ang'u mtutu; wose wawawi wechiwuwuyo wunyamaṟi wowo; wose wawawi wechipfa walawode wana.

²¹ Kokoya mndumsoṟo aalika mka o manomae, nasutsa manomae kudo nyi ikuteṟefutsa; wose wawawi wechipfa walawode wana.

²² “Kimuwaṟi iwada na iawutsia mawawaso na wuikimbi woko wose; shile wudo oruka lulya njimuduo lochimudaika.

²³ Mlaoshe mwichiwie fo mkambofu njifufuna oshangunyi lonu; kyamba walewuta isho shose, na Inyi ngawasuo mnu.

²⁴ Kyaindi, ngamemaa imuwia, “Mochioṟa oruka lowo, Inyi ngamuinenga orukalo muluitoṟie, oruka luisoka maruwa na wuki.” Inyi nyio Mndumii-Ruwa, Ruwa onu njilemuletsana na mkambo ingi ya wandu.

²⁵ Ko ikyo kimuwaṟi muletsane indo lyiheṟemtsu na lyiteṟefukie, na kilehe kiheṟemtsu na kiteṟefukie. Mulakuteṟefutse mochiwada indo ang'u kilehe ang'u ikyo kyose kekekukuruo wanda iya wuyanenyi sa njilekiletsana kii kiteṟefukie.

²⁶ Kyamba Inyi Mndumii-Ruwa, Ruwa njii mwele, na Inyi njilemusahuo nyo kiidi kya mkambo ingi kundu muwe saa lyako, mochiwa waele.

²⁷ “Mndumsoṟo ang'u mndumka oose ekeloha ang'u msawi, na ate nawoho kekapo na maho. Woose wechiwuwuyo samu yawo wawenyi.”