WALEWI 2 - Bibilia Kui Mdedie fo Kimochi

Kidaso kya mso

¹ Na ili mndu echiinenga Mndumii-Ruwa, mwano fo kidaso kya mso, mwanofo foke fochiwa mso mmamiri, nao nechifuletsia mafuda, na ihekiaho ubani huyafo;

² numa nafuendie wana wa Aroni wakohanyiwo; nao naireho ohi lumu lo mso mmamiri na mafudaho hafo na ubani wo wose; nahong'u mkohanyi nafurumatse modonyi kiwe nyiyo ngumbuo yake rasionyi, nyi kidaso keseheṟia modonyi, kya opfamo luchihiṟie Mndumii-Ruwa.

³ Na ifo fotsuhaaho fo kidaso kya mso fochiwa fo Anoni na wana wake nyi kindo kiele mnu nakamu kiidi kya shidaso shileseheṟio ko Mndumii-Ruwa kui modo.

⁴ “Kingise, ili ochilekia mwano kidaso kya mso fumkahaṟe ngumienyi ya modo, yechiwa mkate ilantarang'ashe, ya mso mmamiri fumwundewunde na mafuda, ang'u maandasi halamawike mtarang'ao hamashie mafuda.

⁵ Kingise, shiano shapfo kokoya nyi kidaso kya mso fumkaange, shechiwa sha mso mmamiri fulambike mtarang'ao, fumwundewunde na mafuda.

⁶ Nochifudumbuo-dumbuo shipeṟengu, na ifushia mafuda huyafo; nyi mwano fo mso.

⁷ Kingise, mwano fopfo kokoya nyi kidaso kya mso fumkoṟe na kinungu, shechiṟeheṟo kui mso mmamiri handu hamu na mafuda.

⁸ “Na iyo nochiendie Mndumii-Ruwa kidaso kya mso fumsungusie na shindoshi; shechiendio mkohanyi, nao nyio echishiseheṟia rasionyi.

⁹ Numa mkohanyi nechiirapfo ngumbuo-yo ya kidaso kya mso, nao nechikikoṟia o rasionyi; nyi kidaso keseheṟia kui modo, kya opfaamo luchihiṟie Mndumii-Ruwa.

¹⁰ Na ikyo kechitsuhaa kiidi kya kidaso kya mso kechiwa kya Aronyi na wana wake; nyi kindo kiele mnu nakamu kiidi kya mwano ilemeseheṟio Mndumii-Ruwa kui modo.

¹¹ Mwano fo mso ifo fose fochiseheṟio Mndumii-Ruwa ilawiko mtarang'ao manyale; kyamba manya mochikoṟa mtarang'ao, maa wuki wo wosepfo kyamba nyi kidaso keseheṟia ko Mndumii-Ruwa kui modo.

¹² Shindoshi mochiseheṟia Mndumii-Ruwa ke nyi shisonguo; kyaindi shilawiko huya rasio nyi opfaamo luchihiṟie.

¹³ Kingise, orio kiinengo kya kidaso kyapfo kya mso nochikiwika monyo; manya kulalekie kidaso kyapfo kya mso kiwuṟe monyo. Monyo nyi kichano kya mkundano fo Ruwa na iyo; nochilekia monyo handu hamu na mwano yapfo yose.

¹⁴ “Na iyo ko koya noinenga Mndumii-Ruwa, mwano fo mso fo shilimu sha kuwooka sha mdeminyi nochilekia Ngano yo ii mahaenyi hayo hamakoṟe na modo, Ngano injihuo ya mahaa mawishi, nyiyo ochilekia shiwe mwano fo mso fo shilimu shapfo sha kuwoka sha mdeminyi.

¹⁵ Na iyo nochiletsia mafuda huyafo, nowike ubani lo opfaamo huyafo, nyi mwano fo mso.

¹⁶ Mkohanyicho nechikoṟa ngumbuoyo yakyo, kienga kya Nganoyo injihuo ya kidaso na kienga kya mafuda hakyo, handu hamu na ubani lo-lopfaamo lokyo loose, nyi odambiko loseheṟia Mndumii lo modonyi.”