WALEWI 19 - Bibilia Kui Mdedie fo Kimochi

Mapfundo ha wuele na wusumuhanyi

¹ Ruwa Menyipfinya kawia Mose,

² “Wia mkambo fose fo Waisraeli kudi: Nkimuwaṟi muwe waele kipfa Inyi Ruwa Menyipfinya, Ruwa onu njii mwele.

³ Orio umu onu kimbaṟi naindie mae na ndeye, na iindia mfiri yako ya Ruwa, Inyi nyio Ruwa Menyipfinya, Ruwa onu.

⁴ Mulahalukie mfanano ya maruwa, manya mulakusungusie mfanano ya ruwa lyesalaṟa lya menya. Inyi nyio Ruwa Menyipfinya, Ruwa onu.

⁵ “Kiheri mochinjiendie Inyi Ruwa Menyipfinya shidaso sha ofoṟo mochinjiendie chando kiwaṟi kundu muidikio.

⁶ Kidasokyo nkiwaṟi ilio mkonufo ifo kechiendo ang'u ili lya ngama. Ikyo kyose kechitsuhaa tane ili lya kilalau nkiwaṟi kirumatsio modonyi.

⁷ Kokoya mtsuhaṟo fo nyama yakyo yalio mfiri fo kaṟuṟu, kindokyo nkiwicho; na kidasokyo kechiidikiopfo,

⁸ na icho molya nyamayo kimbaṟi naduo wuwicho woyo cha kipfa nateṟefutsa kindo kiele kya Ruwa Menyipfinya. Mnducho nechiletsano na wandu wake.”

⁹ “Koshika isambuo shilimu sha orukenyi lopfo, kulasambuo nakamu tane mṟasenyi fo dema manya kulawuye na numa isanyia mtsuhaṟo (maroti).”

¹⁰ Mulawuye isanyia orio kindo demenyi lya msabibu, ang'u kuladoduo ndunda tsiolokie wanda; nochideeya wakiwa na wahenu. Inyi nyi Ruwa Mndumii-Ruwa onu.

¹¹ “Mulaiwe, mulalembe manya iwiana sha wongo.

¹² Mlalye nyamu ya wongo kui rina lyako tane moisalucha rina lya Ruwa onu. Inyi nyio Ruwa Menyipfinya.

¹³ “Kulalembe wamṟasa opfo manya imiiwia. Wueri wo mndu ambike kiṟundionyi wulakae kopfo kio taṟaṟaa tane ngamenyi.

¹⁴ Kulasese mndu mpfu madu manya iwikia mpfu meso ndeheka ya njienyi, kya indi india Ruwa opfo. Inyi nyio Ruwa Menyipfinya.

¹⁵ Kiheri uidumbuo mondu dumbuo kya sungusihu kulakundie; kyaindi kiwaṟi idumbuya mndu o mṟasa kya sungusihu.

¹⁶ Kulaideide kochiṟiingia wandu wa mbaṟi yapfo manyale. Kulatwaaṟe mndu o mṟasa opfo kui madedo hapfo. Inyi nyi Ruwa Menyipfinya.

¹⁷ “Kulawikie odoo kiṟaache mrimenyi fopfo, indi orio kiheri uidikiane na wamṟasa opfo kundu kulashike iwuta wunyamaṟi.

¹⁸ Kulatae kiṟaache iyo kumonyi ang'u iwadia wandu wapfo nyashi mrimenyi indi kunda wamrasa opfo chandu ukukundi iyo kumonyi. Inyi nyio Ruwa Menyipfinya.

¹⁹ “Kikuwaṟi ihendelia mawawaso hako. Kulalekie shuma shapfo shiorio nyi mando ha mbaṟi ingi. Demenyi lyapfo kulawaayepfo mbeu tsa mbaṟi tsiwi. Kulaṟae ṟao lyilipfumie mbaṟi tsiwi tsa nguo.

²⁰ “Mndumsoṟo kalaa na mndumka kisinga sa aikoso nyi msoṟo ungi, kyaindi alamelekio na iinengo ikuachia watiichio necha. Walawooho kipfa mkacho awemelekiopfo.

²¹ Msoṟocho nechiende isuwa na ihemenyi lyekusanza mwano foke fowuto deko lyake nanjiinenge Inyi Ruwa Menyipfinya.

²² Mkohanyi nambutie mṟumo fo kisanza kui isuwalyo oshangunyi lo Ruwa Menyipfinya kipfa kya wunyamaṟiwo awewuwutie, Nao nechihooṟio wunyamaṟi alewuuta.

²³ “Mukameshika kulya orukenyi lo Kanaani na iwaya mbaṟi tsose tsa mashidi ha ndunda, ndundatso mochitsilyapfo; mochiinengo momu fotsilyapfo ko maka iṟaṟu.

²⁴ Maaka fo kaana ndunda tsaho tsose tsechiwa njiele, tsechiwuto tsiwe kidaso keana Ruwa Menyipfinya.

²⁵ Kyaindi ndunda tsa maka fo katanu tso mochikuliia, na shilimu shanu shechiengeṟeka. Inyi nyi Ruwa Menyipfinya, Ruwa onu.

²⁶ “Mulalye nyamayo yose iwode samu. Mulalashe manya iwuta wusawi.

²⁷ Mulawehie njui tsanu mbai na mbai manya ioda ngerero tsanu.

²⁸ Manya mulakuwike ngoru yose mbihunyi yanu kipfa kya kilio ang'u ikuwehaweha mbihu ang'u ikusaṟa saṟa. Inyi nyio Ruwa Menyipfinya.

²⁹ “Kulafanyitse mana opfo o kika ko imtana kisaya, oruka loose lulache ihoyo nyi wuṟuhui na iichuo wuwicho.

³⁰ Mochiindia mfiri yako ya Ruwa na ihendelia handu hako haele. Inyi nyio Ruwa Menyipfinya.

³¹ “Mulahendie walashi wa waṟumu manya wasawi kundu muwaterewe wamulashie na kudo mkakuteṟefutsa. Inyi nyio Ruwa Menyipfinya, Ruwa onu kundu nomwindie; na iyo noadapfume Ruwa opfo. Inyi nyio Ruwa Menyipfinya.

³² Kiheri ui oshangunyi lo mndu mku nkikuwari uhoroke.

³³ “Kiheri kuwode mhenu ipfo orukenyi lopfo manya kulambutie wuwicho.

³⁴ Mhenucho ai na iyo nechiwa kopfo cha menyikanyi na iyo nochimkunda chandu ukukundi iyo kumonyi, kyamba na iyo nuwewei mhenu kulya orukenyi lo Misri. Inyi nyio Mndumii-Ruwa, Ruwa onu.

³⁵ “Kulatehie manyale idumbuo kya sungusihu, shiheshia sha uleshe, sha ulemeri, na sheichuṟa.

³⁶ Kimuwaṟi muheshie kya sungusihu, shiheshia sha wulemeri shishiteṟie sha lohi. Inyi nyio Mndumii-Ruwa, Ruwa onu, njilemuuta orukenyi lo Misri.

³⁷ Kimuwaṟi iwada na iawutsia mawawaso hako na shiteṟio shako. Inyi nyio Mndumii-Ruwa.”