WALEWI 18 - Bibilia Kui Mdedie fo Kimochi

Mawuto mawicho ha walyi

¹ Mndumii-Ruwa kadeda na Mose, kambia,

² “Deda na wana wa Waisraeli, nowawie, Inyi nyi Mndumii-Ruwa, Ruwa onu.

³ Nanyo mulawute mawuto cha halya wekewuta orukenyi lo Misri kundu muwei; manya mulawute mawuto cha walya wa orukenyi lo Kanaani kundu njimuduo. Manya mulaoshe mawawaso hawo.

⁴ Mochiwuta mdumbuye yako, mochiwada mawawaso hako kundu muchumie kiidi kyaho; Inyi nyi Mndumii-Ruwa onu.

⁵ Kui kipfa kya isho mochiwada mawawaso hako na mdumbuye yako; sa mndu echihahendelia nawade moo, Inyi nyi Mndumii.

⁶ “Mndu oose o ko Waisraeli nalatikirie afui na odoe o kisharinyi kundu nalae nao, Inyi nyi Mndumii-Ruwa.

⁷ Kulashukuo kitaṟe kya ndeo, manya kitaṟe kya mayo, kulamshukuo, kyamba nyi mayo; kulashukuo kitaṟe kyake.

⁸ Kulashukuo kitaṟe kya mka o ndeo nolae nao kyamba nyi kitaṟe kya ndeo.

⁹ Kulalae na mshiki opfo, mana o waka o ndeo, ang'u mana o waka o mayo, kokoya namfeeye ipfo kanyi konu ang'u kokoya nalefeeyo kundu kungi.

¹⁰ Kulalae na mchuku opfo o kika, o mana opfo o kisoṟo, ang'u mchuku opfo o kika o mana opfo o kika, cha kipfa nyi kitaṟe kyapfo iyo kumonyi.

¹¹ Kulalae na mshiki opfo.

¹² Kulalae na mshiki o ndeo, kipfa o nyi mbaṟi ya ndeo;

¹³ manya kulalae na mayo mtutu; cha kipfa o nyi mbaṟi ya mayo.

¹⁴ Kulalae na mka o ndeo mtutu ang'u anganyi o ndeo; kulasembeṟie mkacho oke; o nyi mka o manomayo o ndeo.

¹⁵ Kulalae na malyi o mana; o nyi mka o mana opfo.

¹⁶ Kulalae na mka o manomayo; kyamba nyi mka o manomayo.

¹⁷ Kokoya olaa na mndumka, kulalaese na mana oke o kika manyale, manya wachuku wake, iwo nyi kishari. Iwalongalonga nyi iwuta wuwicho.

¹⁸ Kulaalyike warisinda mandi mka opfo ai na moo manyale; iwuta kudo nyi iende wunyenyi.

¹⁹ “Kulalae na mndumka mandi ai merinyi manyale.

²⁰ Kulalae na mka o wamṟasa opfo, manyale, kudo nyi ikuteṟefutsa iyo kumonyi nao.

²¹ “Kulalekie mana opfo oose nawe kidaso ko ruwa Moleki, cha kipfa iwuta kudo noisalucha rina lyako Inyi Ruwa opfo. Inyi nyi Ruwa Menyipfinya.

²² “Kulalae na mndumsoṟo odoo manyale cha ili nyi mndumka. Ikyo nyi kiwicho.

²³ Kulalae na indo manyale kulacheteṟefuka; mndumsoṟo ang'u mndumka oose nalae na indo nalawute ado manyale; iwuta kudo nyi wuwicho.

²⁴ “Mulakuteṟefutse kui iwuta shindosho kyamba kui kipfa kya ikyo njikeri ifuna mkambo ya wandu wai oshangunyi lonu; kipfa wekewuta isho na ikuteṟefutsa.

²⁵ Oruka lowo luleteṟefutso na Inyi ngaluanduya, nalo lukawaleha-wo, welukaa.

²⁶ Indi nyo na wahenu wai kiidi kyanu kimuwaṟi iwada mndumbuye na mawawaso hako manya mulawute isho shipfulutsie.

²⁷ Wandu walesonguo ikaa orukenyi lo Kanaani walewuta isho shipfulutsie, nawo wakateṟefutsa orukalu.

²⁸ Kyasiang'u, nanyo, manya mulawute isho, shile wudo orukalo lochimudaika chando luledaika walya wawemusongoe ikaapfo

²⁹ Wandu wose wechiwuta shindosho shipfulutsie na kikaki wechiwiko kuleshe waletsano na wandu wawo.

³⁰ Ko ikyo ringenyi kui wuhendeli isho shose njimuwawasa; mulaoshe miichiwieyo yose yepfulutsa ilewuto nyi walya walekaa orukalu mulamecha, mulacheiteṟefutso nyisho. Inyi nyi Ruwa Menyipfinya, Ruwa onu.”