WALEWI 16 - Bibilia Kui Mdedie fo Kimochi

Mkonu fo mhoṟie fo wunyamaṟi

¹ Mndumii kadeda na Mose, numa ya ipfa lya wanawo wawi wa Aroni, mandi walecha na oshangunyi lo Mndumii, wakapfa.

² Mndumii kawia Mose, “Deda na manomayo Aroni, ke nalaide kiheri kyo kyose na handu haele ipfo isulienyi, oshangunyi lo kidi kya osaṟio, kii huya isanduku, nalashike ipfa; kyamba njechikuloṟa kulya ipuchinyi huya kidi kya osaṟio.

³ Aronyi nechiida na handu haele arie shindoshi; pung'a ya mmbe njikoho mwano fowuto wunyamaṟi, na isuwa, kidaso kekoṟa.

⁴ Nechiṟaa kanzuya njiele ya kitani, aṟee suruwale tsilya tsa kitani mbihunyi foke, akupfungie ngometa fo kitani nao nechiraa mboṟohondo ya kitani; iho nyiho maṟao maele; nao nechisamba mbihu foke na mṟinga, na ihaṟaa.

⁵ Numa naambie shioṟo shiwi sha mburu sha mwano fowuto wunyamaṟi mawokonyi ha wana wa Israeli na isuwa lya kidaso kekoṟa.

⁶ “Aroni nechiwuta mmbe iya ya mwano fohoṟio wunyamaṟi, kui kipfa kya mrima foke, na iwika kisanza kyake amonyi na kya mba yake.

⁷ Numa naire mburu tsilya tsiwi natsiwike oshangunyi lo Mndumii mongo fo ihema lyesanzia

⁸ na Aroni nakapie mburu tsilya tsiwi kuṟu kuhya; imu nyi kipfa kya Mndumii; na ya kawi nyi kipfa kya Azazeli .

⁹ Na Aroni nechiende mburu iya yahoyo nyi kuṟu kuhya kya Mndumii, nambike mwano fo wunyamaṟi.

¹⁰ Kyaindi mburu iya ilehoyo nyi kuṟu kuhya kya Azazeli yechileṟio ii na moo oshangunyi lo Mndumii kundu nawike kisanza, kundu idiko nuka ilawode mṟinga kipfa kya Azazeli.

¹¹ “Na Aroni nechisembeṟia mmbe ya mwano fohoṟio wunyamaṟi, iyo ii kipfa kya mrima foke, na iwika kisanza kipfa kya mrima foke amonyi, na kipfa kya mba yake; nao nechishinja mmbe iya ya mwano fohoṟio wunyamaṟi ii ya mrima foke.

¹² Numa nechiira oliko luichwo makaa ha modo hauka rasionyi lii oshangunyi lo Mndumii, na mahi hawi ha uvumba wucha wuwuse necha mnu, mawokonyi hake, na nawuduo kiidi kya isulia.

¹³ Kiidima nawike uvumba wulya huya modo oshangunyi lo Mndumii, kundu mtsu fo uvumba wulya fuowishe kidi kya osaṟio kii huye ya wuṟingishi, nalashike ipfa.

¹⁴ Numa naire samu ntutu ya ipung'a lilya, naiole na kimnyo kyake huya kidi kya osaṟio ora lo kusonguo; na oshangunyi lo kidi kya osaṟio nechioliaho samuyo na kimnyo kyake ka mfungade.

¹⁵ Numa nechishinja mburu iya ya mwano fohoṟio wunyamaṟi, ii kipfa kya wandu, na iende samu yake na isulienyi, nawewuta nayo chandu alewuta na samu iya ya ipung'a, naiolie huya kidi kya osaṟio, na oshangunyi lo kidi kya osaṟio,

¹⁶ nao nechiwika kisanza kipfa kya handu haele, kya mbonyi tsa ngafu tsa wana wa Israeli, na kipfa kya madeko hawo, ee-daa kipfa kya manyamaṟo hawo hose; nao nawewuta ado kipfa kya ihema lyesanzia, lyii handu hamu nawo makidi hawi ha ngafu tsawo.

¹⁷ Manya kochikaapfo mndu ipfo ihemenyi lyesanziapfo, kiheri echiida napfo iwika kisanza handu haelepfo, mṟasa naide na nja, kammaa iwika kisanza kipfa kya mrima foke amonyi; na kipfa kya mba yake, na kipfa kya mkambo fose fo Waisraeli.

¹⁸ “Numa nawukepfo nahendie rasio lyii oshangunyi lo Mndumii nawike kisanza kipfa kyake; nechiira samu ntutu ya ipung'alyo na ya mburu iya, na iiwika ndumbenyi tsa rasionyi njora tsose.

¹⁹ Kingise nechiolia samu ntutu huya rasionyi na kimnyo kyake ka mfungade na iiheṟemtsa na iitana njiele, kundu ngafu yose ya wana wa Israeli iwukeho.”

Mburu yekudika mawicho ha wandu

²⁰ “Nao kamemarisa iwika kisanza kipfa kya handu haele, na ihema lyesanzia, na rasionyi, nechiende mburu iya ii na moo.

²¹ Na Aroni nechihekia mawoko hake hawi huya mdo fo mburu iya ii na moo, na itochia huyayo mawicho hose ha wana wa Israeli, na madeko hawo, ee-da njonyamaṟo tsawo tsose; nao nahawike huya mdo fo mburu iya; numa naiduo nahende nayo nuka ilawode mṟinga kui owoko lo mndu akuṟeheṟie.

²² Na mburuyo yechikudika wuwicho wowo wose mṟasa oruka lulawode wandu; nao nechida mburuyo ipfo nuka.

²³ Na Aroni nechiida na ihemenyi lyesanzia, nao nakuatuo maṟao hake ha kitani, sa aleṟaa mandi aleida na handu haele, nao nahadepfo,

²⁴ nao nechisamba mbihu foke na mṟinga handu haele, na iṟaa nguo tsake, na iwukapfo, na isembeṟia kidaso kekoṟa kyake amonyi, na kidaso kekoṟa kya wandu, nao nawike kisanza kipfa kya mrima foke, na kipfa kya wandu.

²⁵ Na mafuda ha mwano fo wunyamaṟi hechikoṟio huya rasionyi.

²⁶ “Na mndu ulya molekia mburu ya Azazeli ikuhendie nechisanja nguo tsake, na isamba mbihu foke na mṟinga, na numa naide na mfiṟihenyi.

²⁷ Na pung'a iya ya mwano fo wunyamaṟi; na mburu iya ya mwano fo wunyamaṟi, tsilya samu yatso ileendo na mba iwike ngumbuo handu halya haele; tsechidao nja ya mfiṟiha; njonyi tsatso tsechikoṟo na modo, na nyamatso, na mṟafo.

²⁸ Na icho moshikoṟa na modo nechisanja nguo tsake, nawesamba mbihu foke na mṟinga na numa naide na mfiṟihenyi.”

Miindie ya mkonu ya kisanza

²⁹ “Iwawasolyi lyechiwa iwawaso lya mlungana; kiidi kya meri fo mfungade mfiri fo ikumi fo meri, mochikuwinyisha mrimenyi yanu, mulaṟunde iṟunda lya mbaṟi yose, msa amfee kiidi kyanu na mhenu ai kiidi kyanu.

³⁰ Kyamba mfirifo kisanza kechiwiko kipfa kyanu, kundu muheṟemtso; nanyo mochiilisho njonyamaṟo tsanu oshangunyi lo Mndumii.

³¹ Nyi sabato ya sia ya osaaṟe kiidi kyanu, nanyo mochikuwinyisha mrimenyi yanu, nyi iwawaso lya mlungana.

³² Na mkohanyi amshie mafuda na amshimbuo handu ha ndeye, nechiwika kisanzakyo, nao nechiṟaa maṟao ha kitani, maṟao halya maele.

³³ Nao nechiwika kisanza kipfa kya handu haele, nao nechiwika kisanza kipfa kya ihema lyesanzia, na kipfa kya rasio; nao nechiwika kisanza kipfa kya wakohanyi, na kipfa kya wandu wose wa kikumbuhanyionyi.

³⁴ Na iwawasolyi lyechiwa iwawaso lya mlungana kiidi kyanu, kundu muwike kisanza kipfa kya wana wa Israeli kipfa kya manyamaṟo hawo hose, lyimu ko orio maka.” Nao Mose kawuta ado chandu Mndumii alembawasa.