WALEWI 15 - Bibilia Kui Mdedie fo Kimochi

Ndaṟe tsa kichomba tsa wasoṟo

¹ Kiidima Mndumii kadeda na Mose na Aroni kawawia,

² “Kededenyi na wana wa Israeli muwawie mndu cho oose echiwado nyi ode lya kichomba kechimbuka mbihunyi foke, nechiteṟefuka kipfa kya ode lya kichomba kyake.

³ Na iteṟefuka lyake kiidi kya ode lya kichomba kyake nyi ili; kokoya mbihu foke fuitonyika ode lya kichomba kyake, ang'u kokoya ode lya kichomba kyake kikitirimishe mbihunyi foke nyi iteṟefuka lyake.

⁴ Kitaṟa kyo kyose echikilaya msa awodo ode lya kichomba kechiteṟefuka; na kindokyo kyose echikidamilia kechiteṟefuka.

⁵ “Mnducho oose echipaya kitaṟa kyake nechisanja nguo tsake, na isamba mbihu foke na mṟinga, nao nechiteṟefuka mṟasa kyukanyi.

⁶ Na mndu echidamia huya kindo kyo kyose mndu awodo ode lya kichomba aledamilia, nechisanja nguo tsake, na isamba na mṟinga nao nechiheṟefuka mṟasa kyukanyi.

⁷ Na mndu echipaaya mbihu fo mndu awodo nyi ode lya kichomba nechisanja nguo tsake, na isamba na mṟinga, nao nechiteṟefuka mṟasa kyukanyi.

⁸ Kingise kokoya mndu awodo nyi ode lya kichomba kapuchia mndu mheṟemtsu mada; nechisanja nguo tsake, nawesamba na mṟinga, nao nechiteṟefu mṟasa kyukanyi.

⁹ Na nguo yose yelaaya ikalaayo nyi mndu awodo nyi ode lya kichomba yechiteṟefuka.

¹⁰ Mnducho oose echipaaya kindo kyose kikileṟie wanda ya nguoyo mnducho nechiteṟefuka mṟasa kyukanyi; na msa echiiṟa shindosho nechisanja nguo tsake, na isamba na mṟinga, nao nechiteṟefuka tane kyukanyi.

¹¹ Na mnducho oose echipaayo nyi mndu awodo nyi ode lya kichomba, alasambie mawoko hake na mṟinga nao nechiteṟefuka tane kyukanyi.

¹² Na kihia kya teri kikapaayo nyi mndu awodo nyi ode lya kichomba kechipaṟopaṟo, na kihia kya kidi kechisanjo na mṟinga.

¹³ “Na icho awodo nyi ode lya kichomba kamemarisa iheṟemka lya odelyo kyake nechikuitalia mfiri mfungade ya iheṟemtsolyo lyake; nasanje nguo tsake; nao nasambe mbihu foke na mṟinga fo medenyi; nao nechiheṟemka.

¹⁴ Nao mfiri fo nyanya nawone mbuna tsiwi, ang'u maalea hawi ha mbeta, nahende oshangunyi lo Mndumii mongonyi fo ihema lyesanzia, nainengie mkohanyi shilehesho,

¹⁵ na mkohanyi nashisembeṟie, kimu kiwe nyi mwano fo wunyamaṟi, na kya kawi nyi kidaso kekoṟa; nao mkohanyi nechiwika kisanza oshangunyi lo Mndumii kipfa kya odelyo kyake.

¹⁶ “Na mndu maachi hake hakambuka; nlyondi echisamba mbihu foke fose na mṟinga, nao nechiteṟefuka tane kyukanyi.

¹⁷ Na orio nguo, na handu hawode maachiho, kochisanjo na mṟinga, nayo yechiteṟefuka tane kyukanyi.

¹⁸ Mndu mkacho nao mndu msoṟo alaa nao kamshia maachi, wo wawawi wechisamba na mṟinga, nawo wechiteṟefuka tane kyukanyi.

¹⁹ “Mndumka oose, kawuko nyi kindo, na kindo kyo kimbuka ipfo mbihunyi foke kokoya nyi samu, nechidamia amletsane mfiri mfungade; na mndu oose kampaaya nechiteṟefuka tane kyukanyi

²⁰ Kalaaya kindo kyose ai mletsane kechiteṟefuka; na orio kindo akidamilia kechiteṟefuka.

²¹ Mnducho oose echipaaya kitaṟa kya mkacho nechisanja nguo tsake, na isamba mbihu foke na mṟinga, nao nechiteṟefuka tane kyukanyi.

²² Mndu oose echipaaya kindo kyose mkacho alekidamilia nechisanja nguo tsake, na isamba mbihu foke na mṟinga, nao nechiteṟefuka itane kyukanyi.

²³ Kokoya nyi kitaṟenyi ang'u kindo kyose mndumkacho alekilaaya, mndu echikipaaya kindokyo nechiteṟefuka tane kyukanyi.

²⁴ Na mndu msoṟo oose echilaa na mkacho kakuteṟefutsa, nechiteṟefuka ko mfiri mfungade; na orio kitaṟa echikilaaya kechiteṟefuka.

²⁵ “Na mndumka kokoya samu yambuka mfiri ifoi, nayo chi ya kiheri kyake kya merinyipfo angu kokoya samu yambuka ikaidia mfiri iya yake yeletsano; mfiriyo yose yewuka samu ya iteṟefuka lyake, nechiwa chandu awei mfiri iya ya iletsano lyake; nateṟefukie

²⁶ Orio kitaṟa echikilaaya mfiriyo yose yewuka samu kechiwa cha kitaṟa kya kiheri kya merinyi lyake; na orio kindo echikilaaya kechiteṟefuka cha iteṟefuka lya merinyi lyake.

²⁷ Na mndu oose echipaaya shindosho nechiteṟefuka, nao nechisanja nguo tsake, nasambe kose na mṟinga, nechiteṟefuka tane kyukanyi.

²⁸ Kyaindi mndumkacho kameheṟemtso kipfa kya iwuka samu iya yake, nlyondi echiitala mfiri mfungade, numa nechiheṟemka.

²⁹ Mkonu fo nyanya naende mbeta tsiwi, ang'u maalea hawi ha mbeta, naendie mkohanyi, oo mongo fo ihema lyesanzia.

³⁰ Mkohanyi nasembeṟie imu iwe mwano fo wunyamaṟi na ya kawi iwe kidaso kekoṟa; nao mkohanyi nawike kisanza kipfa kya mkacho oshangunyi lo Mndumii, kipfa kya iwuka samu ya iteṟefuka lyake.

³¹ “Nyi wudi mochiwaletsana wana wa Waisraeli na mteṟefutsie yawo; kundu walapfe wai mteṟefutsienyi yawo, ili wechiteṟefutsa handu hako kiidi kyawo.

³² Ili nlyo iwawaso lya mndu awodo nyi ode lya kichomba na ekeuko nyi maachi, kateṟefuka kipfa kyasho

³³ na lya mndumka sa amletsane; na lya mndu awodo nyi ode lya kichomba, kokoya nyi mndumsoṟo ang'u mndumka, na lya icho alaa na mndumka akuteṟefutsie.”