WALEWI 12 - Bibilia Kui Mdedie fo Kimochi

Iilisho lya mndu mka ataramo mana

¹ Kiidima, Mndumii-Ruwa, kadeda na Mose, kambia,

² “Deda na wanawo wa Israeli, nowawie, Mndu mka kakupfunga, kafee mana o kisoṟo, nechikaa akuteṟefukie mfiri mfungade; cha mfiri iya ya kiheri ai merinyi, nyi wudo echikaa ateṟefukie.

³ Mkonu fo nyanya mana nechidino njonyi ya kitaṟe kyake.

⁴ Na mndu mkacho nechikaa kiidi kya samu ya isanjika lyake mfiri makumi haṟaṟu na iṟaṟu (33), nalapaaye kindo kyo kyose kiele manya nalaide na handu haele, na mtano mfiri ya iheṟemka lyake yechisia.

⁵ Indi kokoya nafee mana o kika, nechikaa ateṟefukie mfungade iwi, cha mfiri yake ya meri; nao nechikaa kiidi kya samu ya isanjika lyake mfiri makumi haṟandaṟu na iṟandaṟu (66).

⁶ “Numa mfiri ya isanjika lyake ikamesia; kipfa kya mana o kisoṟo, ang'u mana o kika nechiende huṟuwi lya maka fumu lyiwe kidaso kekoṟa, na ialea lya mbeta, ang'u mbuna lyi kidaso kya wunyamaṟi nashiende na oo mongo fo ihema lyesanzia, nainengie mkohanyi;

⁷ nao mkohanyi nashisembeṟie oshanguny lo Mndumii na iwika kisanza kipfa kyake; nao nechiheṟemka. Ilyi nlyo iwawaso lya icho afee, kiwe nyi mana o kisoṟo ang'u nyi o kika.

⁸ “Kokoya masaa ha mndu mkacho halashikie wuhuru, wo ihuṟuwi, o nlyondi echiende mbeta tsiwi, ang'u malea hawi ha mbuna; limu lya kidaso kekoṟa, na lya kawi lya kidaso kya wunyamaṟi; nao mkohanyi nechiwika kisanza kipfa kyake, nao nechiheṟemka.”