WALEWI 10 - Bibilia Kui Mdedie fo Kimochi

Wunyamaṟi wo Nadabu na Abihu

¹ Na Nadabu na Abihu, wana wa Aroni, wakaira orio mndu na oheko loke, wakawikapfo modo, wakahekiaho uvumba, nawo wakaende modo mhenu oshangunyi lo Mndumii, sa walewawasio.

² Kiidima modo fukowuka o oshangunyi lo Mndumii fukawakombetsa, nawo wakapfa oshangunyi lo Mndumii.

³ Nahong'u Mose kawia Aroni, “Kindoki nyi kilya Mndumii adedie, kehamba, ‘Inyi njechiheṟemtso kiidi kya iwo waitikiria koko, na Inyi njechiichiko oshangunyi lo wanduwo wose.’” Aroni katsia sau.

⁴ Mose kalaha Mishaeli na Elisafani, wana wa Uzieli washidie o Aroni, kawawia, “Njonyi na afui, muire mnying'a yawana wa wama wanu, muwaire a oshangunyi lo handuha hekaa, muwaduo nja ya oṟiho.”

⁵ Kyasia, wakacha na kufui, wakaira mnying'a iya waweṟee nguwo tsawo, wakawaduo nja ya oṟiho; chando Mose alehamba.

⁶ Numa Mose kawia Aroni na wana wake Elieseri na Ithamari, “Mulade njui tsa mdohu yanu tsinjitaṟafuo, manya mularanduo maṟao hanu; kundu mulache ipfa; na iendie mamingifu, nyashi ya Mndumii-Ruwa na kingise, kulasuuye chilayo yose; kyaindi wana wa mayanu, wa mba yose ya Israeli wakape kilio kipfa kya modofo Mndumii alewaatsia.

⁷ Manya mochiida na nja ya mongo fo ihemalyo lyesanziapfo, mulashike ipfa; kipfa mafuda heshimbuo ha Mndumii hai, huyanu.” Nawo wakawewuta chando idedo lya Mose lyiwei.

Mawawaso ha Mndumii ko wakohanyi

⁸ Kyasia, Mndumii kadeda na Aroni; kemmbia,

⁹ “Kulanyo mpfinyo manya wunanzi wo wose, iyo manya wana wapfo handu hamu na iyo, ili mochiida na ipfo ihemenyi lyesanzia, kundu mulashike ipfa; iwawasolyi lyechiwa iwawaso lya mlungana ipfo shisharinyi shanu;

¹⁰ numa muidime idambuo ipfo kiidi kya shii shiele na isho sha orio mfiri, na isho shiteṟefukie na isho shiheṟemtsu;

¹¹ kingise, muidime ilosha wana wa Waisraeli mawawaso ha hose Mndumii amuwia kui owoko lo Mose.”

¹² Kyasia, Mose kadeda na Aroni, na Elieseri, na Ithamari, wanawo wake waletsuhaa, “Irenyi kidasokyo kya mso fuletsuhaa fo shidaso sha Mndumii shilewuto kui modo, mulye fulambike mtarang'ao, alya kufui na rasionyi; kipfa shii shiele mnu.

¹³ Nanyo mochiilia kiidi kya handu haele, kyamba nyi kiinengo kyapfo, na kya wana wapfo, kiidi kya shidasosho shekesembeṟio Mndumii kui modo; kyamba nyi wudo njilewawasa.

¹⁴ Na kidari kekuchakucha, na isasio lyeiria, mochishilya handu hecha, iyo na wana wapfo, handu hamu na wana wapfo wa kika, kyamba shilelekio shiwe nyi shapfo shisumhanyi, nyi wusumhanyi wopfo, kiidi kya shiano sha shidaso sha ofoṟo, sha wana wa Waisraeli.

¹⁵ Isasio lyeiria na kidari kekuchakucha wechishiende hamu na shidaso shekesembeṟio modonyi sha mafudaho, kundu shikuchakucho shiwe kidaso kekuchakucha oshangunyi lo Mndumii; numa shechiwa nyi shapfo iyo, na sha wana wapfo hamu na iyo, nyi wusumhanyi wonu mlungana, chandu Mndumii alewawasa.”

¹⁶ Kyasia, Mose kapfula mnu mburuyo ya kidaso kya wunyamaṟi, ambuya nayo iwemmaa ikoṟo modonyi, na kasukio mnu kya woko Eliezeri na Ithamari wanawo wa Aroni, iwo waletsuhaa, kawawia,

¹⁷ “Nki ili mulalya kidasokyo kya wunyamaṟi kiidi kya handu haele, kipfa kii kiele mnu, nao namuinenga nyo, kundu mukudike wuwichowo wo mamiingifo, muwawikie kisanza oshangunyi lo Mndumii?

¹⁸ Ambuyenyi, samuyo yakyo ileendo na handu haelepfo; kiwemuwaṟi muilye mmbenyi handu haele chandu njilemuwawasia.”

¹⁹ Aroni kawia Mose, “Ambuya, inu kudi wamesembeṟa kidaso kyawo kya wunyamaṟi; na kidaso kyawo kekoṟa oshangunyi lo Mndumii; na mbonyi cha itsi tsamenjikoya; na kingise ko koya njilelya kidasokyo kya wunyamaṟi inu kudi, ngesa na kiwechiwa kindo kicha oshangunyi lo Mndumii?”

²⁰ Nao Mose kekiicho isho shikamchihia.