WALEWI 1 - Bibilia Kui Mdedie fo Kimochi

Shidaso shemaya modonyi

¹ Mndumii-Ruwa kalaha Mose, kadeda nao kuwuka kulya ihemenyi lyesanzia, kambia,

² “Deda na wana wa Waisraeli, nowawie, mndu o konu ili echiinenga Mndumii-Ruwa shiinengo, mochilekia shiinengo shanu sha shuma, kiidi kya mmbe na kiidi kya machondi.

³ “Shiinengo shake kokoya nyi kidaso kemaya modonyi kya mmbe, nechilekia pung'a njiheṟemtsu; nechiende na alya mongo fo ihema lyesanzia, kundu naidikio oshangunyi lo Mndumii-Ruwa.

⁴ Numa nahekie owoko loke huya mdo fo kidasokyo kemaya modonyi; nakyo kechiidikio kipfa kyake, iwika kisanza kipfa kyake.

⁵ Nao nashinje mmbeyo oshangunyi lo Mndumii-Ruwa; numa wana wa Aroni wakohanyiwo wechiende samuyo hafui, na iolyia samuyo mbai ya rasio lii o mongo fo ihema lyesanzia.

⁶ Numa nashinje kidaso kemaya modonyi na imanyamanya njohawi tsakyo.

⁷ Numa wana wa mkohanyi Aroni, wechiwika modo huya rasio, wawike ngu huya modo,

⁸ numa wana wa mkohanyi Aroni, wechiachikia njohawi tsilya tsa nyama, mdo foyo, na mafuda hayo huya ngutso tsii huya modo fui huya rasio.

⁹ Kyaindi maula hayo, na masasio hayo nechishisanja na mṟinga; na mkohanyicho nechishikoṟa shose huye ya rasio, kundu shiwe kidaso kemaya modonyi, kidaso keseheṟia kui modo, kya opfamo luchihiṟie Mndumii-Ruwa.

¹⁰ “Kiinengo kyake kokoya nyi kyauka iponyi lya machondi ang'u lya mburu, kiwe kidaso kemaya modonyi; nechilekia kya kisoṟo kiheṟemtsu.

¹¹ Nao nechishinjia o ora lo rasionyi luambuye mtsudu oshangunyi lo Mndumii-Ruwa; na wana wa Aroni, wakohanyiwo, wechiolyia samu yakyo huya rasio njora tsose.

¹² Numa nechimanyamanya njohawi tsakyo, handu hamu na mdo fokyo, na mafuda hakyo numa mkohanyi naachikie njohawitso huya ngu tsii huya modo fui huya rasio;

¹³ Kyaindi maula hakyo, na madende hakyo, nechisanja na mṟinga; na mkohanyicho nechishiseheṟia shose ishirumatsia rasionyi; nyi kidaso kemaya modonyi; nyi kidaso keseheṟia kui modo kya opfamo luchihiṟie Mndumii-Ruwa.

¹⁴ “Shiinengo shake echiinenga Mndumii-Ruwa, shiwe shidaso shemaya modonyi, ko koya nyi shilehe, nlyondi echiende mwano foke kui mbeta ang'u malea ha mbeta.

¹⁵ Numa mkohanyi nechikiende kufui na rasionyi, nao nechikiochohuo mdofo, na irumatsa na modo rasionyi, na samu yakyo yechiletsekia mbai ya rasio;

¹⁶ numa nawutepfo nduuyo yakyo, handu hamu na mbosha tsiipfo natsikumbe mbai ya rasio ora lo ngamenyi, handu hai mafu.

¹⁷ Numa napahuo makungoho hakyo, kyaindi nalamanjuo njohawi tsiwi; numa mkohanyi nairumatse modonyi huya rasio, huya ngu tsii huya modo; nyi kidaso kemaya modonyi, kidaso keseheṟia modonyi kya opfamo luchihiṟie Mndumii-Ruwa.”