WAKOLOSE 4 - Bibilia Kui Mdedie fo Kimochi

¹ Nyo wanene, muwonye masinga kilya kisumhanyi na wuleheṟi mochimanya ke nanyo mui na Mndumii ipfo ruwehu.

Shitutumo

² Mutsinde kiterewyonyi; mulae nakyo chowe mochiaana Ruwa.

³ Muweluterewya naso kundu Ruwa naluṟuhuye kichumi kyeonguo dedo lyake li lyehamba kirikye kya Kristo kipfa njiipfunge kimaduma kyalyo.

⁴ Terewenyi kundu njiidime ikimanyisha chando kinjiwaṟi ideda.

⁵ Chumienyi mochikaya walya walaidikie kui wuṟango muikurohya na orio mwaanya muwode.

⁶ Dedo lyanu liwe lyenongowya mdonyi kiheri kyose likae lyelodaloda mbala, mumanye chando kimuwari ihaluo orio mndu kiheri kyose.

Shiiṟikiṟo shefurumia

⁷ Kya oloho lo koko nyi Tikiko echimwongoya shose. Nyio mwanowama mkunde, mtarami mhendeli, mokyando odu kiṟundionyi kya Mndumii.

⁸ Kitewe ngamduma konu, nyi kundu mumanye oloho loko nawekarisha ngoo tsanu.

⁹ Naicha arianyi na Onesmo, mwanowama ichu mhendeli mkunde nao akeri o ipfo konu. Wo wechimuongoya shose shiwutika kunu.

¹⁰ Aristariko lui nao kipfungyonyi nyi amwiṟikiṟa wai, na Mariko manamae o Barnaba. (Kyake momemwambya na shiwawaso, mandi echicha na konu mumwambye.)

¹¹ Na Yesu chu esendo Yusto, namuiṟikiṟikira. Wo wakeri kiidi kya wayuda waidikie, nawo wawenyi watarami wako waiṟundya wumangi wo Ruwa, nawo walenjiwiia kitarama king'anyi mnu.

¹² Odoyanu Epafra amwiṟikiṟa ai o konu, na isinga lya Kristo Yesu echimkapanya nyo kiheri kyose ipfo shiterewonyi shake kundu muhoṟoke-ho mutimie mui wawanzie orio kindo Ruwa akundi kyose.

¹³ Na inyi ngamṟingishia ke nyi aikuwinyisha mnu kipfa kyanu na kya wa Laodikia na kya wa Hierapoli.

¹⁴ Luka amwiṟikiṟa mhanga ichu odu mkunde, na Demasi.

¹⁵ Iṟikiṟenyi wanawawama wa Laodikia na mana mshiki Nyimifa na siṟi yo ipfo wekesanzia ipfo kanyi koke.

¹⁶ Kombona momsomyo paruo ii mutambahane kundu isomyo na siṟinyi ya Walaodikia, na iya iledikyo Laodikia kundu nanyo muweisomyo.

¹⁷ Muwie na Arikipo, ambuya wai kundu uinutsye oṟundo lulya ulewada kui Mndumii.

¹⁸ Aiki kiṟikiṟo kii kya owoko loko inyi Paulo. Muwe monkumbuo na mshe i njimpfunge nayo. Wutonga wo Ruwa wukae nanyo.