WAKOLOSE 3 - Bibilia Kui Mdedie fo Kimochi

¹ Mukameṟutso kimu na Kristo ke-walyenyi shiipfo huye, ipfo kundo Kristo ai adamye owokonyi lo kulyo lo Ruwa.

² Muwe mohia sha ipfo huye chi ishi shii sha wanda iipfo.

³ Cha kipfa nyo mompfa na moo fonu fui mṟike kimu na Kristo ipfo ko Ruwa.

⁴ Mandi Kristo chu moo fonu echimanyika matika naho mochimanyika nanyo kimu nao wuitoṟinyi.

Moo fo kacha na moo mhya

⁵ Kyo kimwitike muhende iwaha mamlungia halya hanu hai ha wuyana: wuṟuhui, wungafu; wukuwu; wulanga wuwicho, sanza-ho na wuehi ili wukeri wuindi woindya maruwa ha wongo.

⁶ Shindo cha isho shatewa nyashi ya Ruwa icheye iwo wose waimleha.

⁷ Kuwewode kiheri nanyo muweichumia modao nyisho, nyi matika halya mlechilio nyisho.

⁸ Indi wulalu nanyo kimuwaṟi muhendekuatuo isho shose, nyashi, lango wuwicho, mkuchu, wusutsu, madedo ha sheeṟe halawukye dumbunyi lyanu.

⁹ Mulawiane wongo nyo muwenyi na wenyi ili momaa ikushikuo wumndu wu wo kacha ham na mawuto hawo hose.

¹⁰ Muṟae na wumndu wuhya; echiwiko kui wuhya nyi Ruwa, momuumba. Mfano fo mtsanyi oke kundu nammanye necha Ruwa.

¹¹ Mpfondo kulawode ai Mgriki na Myuda, mdine na alamdine, o mtsudu na o nuka, isinga na isumba, indi shose nyi Kristo, o akuwode nasho shose.

¹² Nanyo ili mui wasambuṟe wa Ruwa waele na wakunde wake Ruwikyenyi wucha woichio mndu wukiwa kui ngoo na wukesi, wo oshangu na ikunyiṟa na wuhoo na woloṟu.

¹³ Muhoyane muwenyi na wenyi mochihoṟyana kokoya kwipfo awode kyededya ungi. Chando nao Mndumii alemuhorya nyo nanyo kimuwaṟi muwute mudo-ng'u.

¹⁴ Indi mwengeṟia fo isho shose nyi kikunda, kipfa kikunda nkyo kilunga kya orio mbika ikawa imu itoṟikye.

¹⁵ Na ofoṟo lo Kristo luchilie ngoo tsanu, ilu mui walahie kyalo muwe mbihu fumu. Nkyo kimnenge mochimwaana.

¹⁶ Dedo lya Kristo likae ipfo konu na mfeṟa folyo fose, Muwe mochifundana na iikimbana wuṟango wose. Mochiimbya Ruwa ipfo ngoo tsanu shiimbo sheterewa na sheṟumisha na shiimbo shi shiamtse nyi Mumuyo shehamba wutonga wu.

¹⁷ Na orio kindo muiwuta kui ideda ma kui iṟunda mukiwute mochisenda-ho rina lya Yesu Mndumii mowikya Ruwa Wande mwaano na mweke foke.

Chando kiwaṟi orio kamba lya wandu kiidi kya moo mhya

¹⁸ Nyo waka, kuwikenyi shi ya wamii wanu kipfa chando kiwaṟi kisumhanye chando Mndumii akundi.

¹⁹ Nyo womi, kundenyi waka wanu mulawapufukye.

²⁰ Nyo wana idikyenyi wafee wanu kya shindo shose, kipfa iki kichihianyi na Mndumii.

²¹ Nyo mui wafee, mulapfulutse wana wanu, kundu walawuko madima ihutsa na macha.

²² Nyo masinga, idikyenyi wanene wanu iya wuyana kya shindo shose, chi kui wuindi wo oshangu kya ichiana na wandu-pfo, kya indi kui ngoo yose mochiowuo Mndumii.

²³ Orio kindo mochikiṟunda, mukiṟunde kui mrima fose cha ili kiikya Mndumii ma chi kya mndu o wandu-pfo.

²⁴ Mochimanya ke mochiambya wueri wuwukie ko Mndumii, nawo nyi kyoṟa kilya. Ṟundienyi Kristo Mndumii!

²⁵ Cha kipfa ichu anyamaṟa echitao kya kilya awenyamaṟie. Ruwa ekyekundia-pfo.