WAKOLOSE 2 - Bibilia Kui Mdedie fo Kimochi

¹ Kipfa njikundi mumanye ngapano njiwode nyi njiki yemukapanya nyo, na wa ipfo Laodikia na walya walalemewone oshangu loko na meso.

² Njiiṟunda njidi kundu ngoo tsawo tsihendekarisho tsilungana kikundenyi tsiwefeṟyo mfeeṟa fo welu ya wutiichi wose wo imanya kyama kikoome kya Ruwa nkyo Kristo amonyi.

³ Ipfo koke shisa sha wuṟango na wulaanyi shii shiṟike-pfo shose.

⁴ Ngahamba iki kundu kulawone mndu echimlemba na mbonyi tsa wongo ma kokoya tsenongowya mdonyi.

⁵ Kipfa ili njilai konu kui mbihu indi kui mumuyo njii konu njechichihio njewona osenge lonu na owanzo lo ikuihetsa lyanu na Kristo.

Mhendekie fuawukie kiidi kya Kristo

⁶ Na wulalu chando muleambya Kristo Yesu Mndumii muhendeke mukuwode nao.

⁷ Mukapie-ho mri kiidi kyake mui wailikie-ho na iwanzio wuidikinyi chando mulemlosho mochikusuṟa kiidi kyawo kui mwaano.

⁸ Kuṟisenyi mulawone mndu echimduo wapfunguo kui wulaanyi wulya wo kiwandu na wulembi wo mbonyi tsa wulya tsiduana na ṟungusu tsa wandu, tsa shiwundo sha wuyana wu shiladuanyi na Kristo amonyi.

⁹ Cha kipfa mfeṟa fo Wuruwa futsindye na Kristo fose fuwonekie nao kui mbihu.

¹⁰ Nanyo mui wafeṟe mfeṟa fo moo fumu nao ichu ai mdo fo orio wuitoṟi na wunene.

¹¹ Ili mlekulunga na Kristo muledino kimu nao, odinonyi lulali lo wandu lowuta-ho kinyama kya mbihu, nyi odino lo Kristo amonyi kui iletso lyiwukye Wumdunyi wo wunyamaṟi.

¹² Kipfa mulemṟiko kimu nao ipfo wupatisonyi mukaweṟutso kimu nao kui wuidiki wo mwamtsie fo Ruwa alemṟutsa Kristo wapfunyi.

¹³ Kawemtana nanyo muwade moo fumu kimu nao nyo muwei wapfu kui manyamaṟo na kui wundaka wo nyama tsanu echimhoṟya manyamaṟo hanu hose.

¹⁴ Nyi aleangatsa kiṟehio kilya kiweekiṟehie kui owoko kiwei sile hima yadu, nkyo mawiko halya nakyo kiweluanduya kakiwuta ipfo kiidi echikikapya msalabenyi.

¹⁵ Kristo Kahenda yatuo waitoṟi nao waapfinya no Waṟufu kewaloṟa na pata echiwamanyisha wai wawinze ewaduo wapfungo amonyi.

¹⁶ Wulalu manya mndu nalamdedye kya kindo kelya ang'u kyenyo ang'u kya mkonu mnene mweri fudeṟkye ang'u kya msabato.

¹⁷ Isho nyi shikeri mṟishe tupu fuisongoro nyi kilya kikeri yafukia nakyo nyi mbihu fo Kristo.

¹⁸ Manya mndu oose nalamuwonyie mti echikundya wutindili na wuindi wo mbaṟi ya wasu wa ruwehu aikushela kya shilya amewona echikutimbisha kui mhie ya nyama tsake alawode mweke Mndu o mbari ii amtondoshe nyi wulembi wo wuyanawu.

¹⁹ Nakuletsana na Kristo ma alakuwada na mdo fu. Kiidi ya Kristo mpfo kundo mbihu fokehawio pfinya na owanzo fose folungo kui mapayano na mapfungano foching'ana mng'ano chando Ruwa akundi.

Ipfa na iwada moo kimu na Kristo

²⁰ Kokoya momepfa hamu na Kristo ipfa lyemletsa na pfinya tsa waṟufu wechilia wuyana-wu. Nyi kili muichumiase cha ili mui-se wa wuyana?

²¹ Nki ili muiwikio mawawaso weehamba manya kulapaye iki; ma kulasonje kilya ma kulawde kilya!

²² Isho shose shelya shihendesia shii shiwawasye shiwetungo nyi wandu.

²³ Shindo cha isho shihambo shii wuṟango kui wuindi woindya Ruwa njia yawo wawenyi na kui mkununye na kui yotoya mbihu nasho shiwode ma wusuṟi woihutsa nyamapfo.