WAKOLOSE 1 - Bibilia Kui Mdedie fo Kimochi

¹ Inyi Paulo njii msu o Kristo Yesu njimbike nyi Ruwa, so na Timoteo, manowama.

² Lomuiṟikiṟa wanawawama mui Kristo-hu wa ipfo Kolosai wandu wa Ruwa waidiki; wutonga wukae nanyo na ofoṟo-lu luwikie ko Ruwa Ndeyadu.

Kiterewo kyeana

³ Loana Ruwa Nde o Mndumii odu yesu Kristo kiheri kyose luimterewya koke.

⁴ Ili lomwicho kya mwidikie fonu kiidi kya Kristo Yesu na kya kikunda kilya kyanu ko wandu wa Ruwa wose.

⁵ Kimaduma kya kilya muiwedie muiwasuṟumye ipfo ruwehu. Nakyo nyi momsonguo ikiicho kui idedo lya wulohi wurie Ndumi ya Sia ya okiio.

⁶ Iya ishikye na konu. Kyamba chando ikeri wuyana kose yechikumbia mecha na ipfumbuka na wudo na ipfo konu, wokia mkonu fulya mleicho kya wutonga wo Ruwa mukawemanya wulohi woyo.

⁷ Nyi wudo mulelosho osaṟio lu lo Ruwa nyi Epafra mokyando chu odu mkunde ai mṟundi o Kristo momhendelya nyo.

⁸ O nalelumanyisha na kikunda kyanu mulesumbo nyi Mumuyo.

⁹ Nkyo kitewe wokia mkonu luleicho naso luimterewya kitsitsi lochiomba kundu Ruwa namuinenge wuṟango wose wo kilya akundi, namuichuṟe osaṟe na wuṟango wo Mumuyo foke.

¹⁰ Kudo mochiidima ichumia mchumie fuchihianyi na Mndumii na iwuta mecha hamchihiṟie kiheri kyose. Moo yanu yechikumbia ndunda njicha. Cha ikidi liwikie ndunda mualuke na ipfumbuka mochimanya Ruwa.

¹¹ Ruwa namsumbe owanzo lose lusumhanye pfinya ya wuitoṟi woke imwendie itirisia na ikukarishia lyose.

¹² Mochiana kui sia Wande chu alelutsana lusumhanye ohawi lo kyoṟa Ruwa aleteseheṟia Wandu wake ipfo kidembonyi kya sa.

¹³ Nyio aleluletsa eluwuta wuaapfinyienyi wo meema kyechiluteteṟa kaweluwika wumanginyi wo Mana oke mkunde.

¹⁴ Lui nao lukuwude na ndalai, mfo mhoṟie fo manyamaṟo.

Kristo na iṟunda lyake

¹⁵ Kristo nyio mfano fo lohi fo Ruwa chu elekewono, ai Mowee o kuwoka mnene o shiumbe shose.

¹⁶ Kipfa ishi shose shiipfo maruwehu na kunu wuyana, shilya shiwonyio na shilya shilawonyio shilewiko ku mweke foke, manya shifumbi sha wuitoṟi, manya menge tsa wusuṟi manya wuwawa manya wuaapfinya. Ishi shose shilewiko nyio kundu shiwe shake.

¹⁷ Kristo naweipfo shiwumbe shilamekaa-pfo, shikukerye-ho kui o, orio kimu handu hakyo.

¹⁸ Nao ai mdo fo mbihu foke mfo siṟi. O ai moasa, mboki o moo fo mbihu fo. O nyi Mana mbee aṟukiye wapfunyi, kundu nawe mosongoya shose o amonyi.

¹⁹ Kyamba Ruwa amonyi aledumbuo ke Mana nawode mfeṟa fo kiruwa fose fukukaye nao.

²⁰ Kui samu ya Kristo msalabenyi Ruwa nalekunda isanza wuyana-wu nao. Ruwa kawika-ho oforo, kechisanza shose sha ruwehu na sha wuyana-wu nao.

²¹ Nanyo ili kacha muwei mbaṟinyi njihenu kuleshe na Ruwa na ya kituwa nao kui mhio yanu yekuhamba mawutonyi halya hanu mawicho.

²² Indi kui opfu lo Mana oke awei na moo iya wuyana; Wulalu Ruwa amembuta owingo ipfo mbihu-hu fo nyama Ruwa amemusanza nao kundu namhoṟotse oshangunyi loke mui waele, wecha mulawode tewe manya imwanduya.

²³ Kimuwaṟi nyo ikaa mukuwode tupu wuidikinyi mukuilikie-ho mui na kidembo kiwanzi mulechiwa iteshuo ipfo owedionyi lo Ndumi ya Sia, ii momwicho iwemwongoyo mbika iikeri shi ya ruwehu yose; na inyi Paulo ngamba mṟundi o Ndumi ya Sia.

Iṟunda lya Paulo ipfo siṟinyi

²⁴ Wulalu ngachihio ipfo mawawiṟonyi halya njiiwawyo kipfa kyanu ngawemarisa shiwira sha Kristo ipfo mbihuhu foko ishi shiwekundi yengeṟyo-ho sha mbihu fu foke, mfo siṟi.

²⁵ Na inyi njimbike mṟundi-oyo kui wuiṟichi wu wo Ruwa njilewudambikio wo kiira kyanu, kundu njiawutsie necha imwongoya idedo li lya Ruwa.

²⁶ Kyo kyama kikoome kiwei kiowishe wandu wokia kacha, indi kikawewonesio wandu wake wulalu.

²⁷ Nyiwo-ng'u Ruwa alekunda iwamanyishya wandu wake wusuṟi-wu wo kyama kyo kiele kikoome chando kisuṟie. Nakyo nkyo Kristo kiidi kyanu mosuṟa mowedyo.

²⁸ Nyio Kristo luimhamba lochitutuma orio mndu ose na ipfunda orio mndu ose kui wuṟango wose kundu luhoṟotse-ho orio mndu ose oshangunyi lo Ruwa natoṟikye Kristo toṟi.

²⁹ Nakyo nyi ngakiwinya njekapana kui wuitiki wu wo Kristo wuiṟunda kiidi kyako na pfinya ing'anyi.