WAGALATIA 3 - Bibilia Kui Mdedie fo Kimochi

¹ Nyo Wagalatia, mfurunjikye ihia! Niwu alemtondosha? Nanyo muweloṟoloṟo Yesu Kristo itane ambonekya mesonyi hanu chando awemkapye msalabenyi.

² Na kindo kimu tupu ngakunda iwesana nanyo, ke muleambya Mumuyo Mwele kui iwuta mawiko halya ang'u iidikya na ikusirya na kilya muleongoyo ngesa?

³ Mfurunjikye ihia lohi? Kilya muweasye kui Mumuyo nyi mokunda iinutsya wulalu mbaṟi ya kiinyama ngesa?

⁴ Kiweṟihishye kidi nanyo momekihoyo wulya mboe? Na lohi kiwe kya wulya?

⁵ Kyasia ichu amsumba Mumuyo kaweamtsa pfinya njele ipfo mrimenyi yanu kitewe nyi mawuto muwesongwo iwinya naho mawiko halya ang'u iidikya na ikusirya na kilya momeongoyo mboe?

⁶ Chando nao Abrahamu aweidikye na ikusirya na Ruwa kawesendo nalyo lyembiia wusumhanzo.

⁷ Nahondo mukuwutye-ho imanya ke iwo wakuwode-ho wekusirya na Ruwa nyiwo-ng'u wana wa Abrahamu.

⁸ Nayo bibilia iwesongwo iwona ke Ruwa asumhanza wa mkambo ya wandu kui wuidiki wulya wokusiṟya nao. Nkyo kitewe alesongoṟya Abrahamu ndumi ya sia ya okiio kembia, Mkambo ya wandu ikae yechiwikyo ona luwukye kopfo lose.

⁹ Kyo kyaenenga wekuihetsaho wo wechiwikyo ona hamu na Abrahamu mkuihetso.

¹⁰ Indi walya wewinya mawiko halya wo wekaa shi ya oseso. Kyamba kii kiṟehye ke orio mndu ose alechikaa na shilya shii shiṟehye kitapunyi kya mawiko nawe moshiwuta o naseso.

¹¹ Kilya kimanyikye-ho na pata kikeri kiile, ke mawiko halya hewa hewikya mndu ngaya nasumhanzyo Ruwa-ho, cha kipfa ichu ai msumhanze o etsinda na moo akeri iwonyo kui wuidiki wokusirya na Ruwa.

¹² Kya indi mawiko haichi wuidiki wupfo, ho hehenda na kilya kehamba, ke moawutsya ishi shii shiwawase echikuwonya moo kui mweke fosho tupu.

¹³ Nahong'u Kristo amelutalaa so oseso loluwukya mawikonyi halya kachekuwika shi ya oseso lo kelukaya-ho so kikawehendeka na wuitiki wo kilya kii kiṟehye, ke momasyo kidi-hu o ai msese.

¹⁴ Kikawa kido kundu mkambo ya wahenu iwonyo ona lo Abrahamu kui mweke fo Kristo luweambya mumuyo fu fuwei mteṟye lochimwidikya na ikusirya nao.

Uwawaso na Kyasa

¹⁵ Wanawawama, njidede kya kiiwandu. Ma mbukaho ya mndu iya ii mṟingishye necha kwipfo echifurunja manya iilachapfo.

¹⁶ Kyasia nyio Abrahamu kawesendyo shiteṟyo shilya wo na mombeu oke. Chi ahamba, na wambeu cha ili nyi wafoi, kya indi nyi adeda kya umu, na mombeu opfo nao nyio Kristo.

¹⁷ Kilya ngahamba na iki, ke mbukaho ii injilikye mengenyi nyi Ruwa yechiwa iwuto nyi mawiko halya haleitso-ho numa ili maka ilemsia mahanahaana na makumi haṟaṟupfo cha ili haweangatsa kiteṟyo kilya.

¹⁸ Cha kipfa kima wuhawi wulya wuwewa na mweke fo mawiko wuwekiwonekya-se kui kiteṟyopfo. Kya indi Ruwa alemsumba Abrahamu wo nga kisumhanye kiteṟyo kyake.

¹⁹ Kokoya na wudo kii nyi wuda kya mawiko halya? Hoo nyi haleengeṟyo-ho kui kimaduma kya matahachyo halya itane mombeu acha ichu ai msende na kiteṟyo kilya, wasu wa Ruwa waweiho kiidi wehadambikya owokonyi lo mosanza.

²⁰ Kya indi mosanza akeri o ora lumupfo, indi Ruwa ai umu amonyi.

Kiira kya Uwawaso

²¹ Wulalu nyi wuda? Mawiko halya na halehanyi na shiteṟyo shilya sha Ruwa ngesa? Ote ko! Kima mawiko haweipfo haweidima yende moo wusumhanzo na wuwechiwiko-ho kui kimaduma kya mawiko.

²² Indi bibilia ikaweshingya wose wunyamaṟinyi kundu kilya kii kiteṟye kishike isumbo, kiwe kisumbo kiidikyanyi na wuidiki wokusirya na Kristo kyesumhanya walya wakuwode nao.

²³ Kya indi maheri halya ha wuidiki wokuwada nao halawendeshike luwei washingye nyi mawiko halya haweluringa itane wuidiki wulya wokuwada nao wushike iwonesyo.

²⁴ Na wudo mawiko halya haweluwiia molutoṟishya Kristo, kundu luhendesumhanzo wusumhanzo wo wuidiki wo ikusirya nao.

²⁵ Na wokia kiheri kilya wuidiki wo ikisirya nao womewonesyo okikaa-se lochitoṟyo nyi mtoṟishi ulyapfo.

²⁶ Nanyo mose mui wana wa Ruwa kui wuidiki wu wokusirya na Kristo Yesu.

²⁷ Cha kipfa nyo ilindi mulempatisyo Kristo nyio Kristo mukawemtana mṟaae yanu.

²⁸ Nkwipfo-se kohambo, ichu m Myuda na ichu m Mgrikipfo, ma isinga na isumba, ma msoṟo ma mkapfo. Kyamba nyo mui wamu mose mulunganyi na Kristo.

²⁹ Shi wudong'u mukalungana na Kristo nyi mowang'u mbeu ya Abrahamu mochiwa wenyi kyaasa kilya kiwekiteṟye muwe weduo kyoṟa.