WAFILIPI 4 - Bibilia Kui Mdedie fo Kimochi

¹ Nanyo wanawawama wako njimkundi, ngawewado nanyo nyi meṟeṟuko nyo mui msiha foko na otariche loko, kaenyi muhoroki chimu kui Mndumii, wakunde wako.

² Ngatutuma Euodia ngawetutuma Sintike ke wawe wechihia mhie fumu kui Mndumii.

³ Na iyo-se Sinzigo oko msalari, ngakuterewa na iyo uwaikanye nyiwo wawerianyi na inyi ikapanya ndumi ya sia ya okiio handu hamu na Klemensi na wakyando wako walya wengi wai-waṟehye marina hawo ipfo kitapunyi kya moo.

⁴ Kechihiyonyi shiheri shose ngawuya ihamba chihiyonyi mui-walunge na Mndumii.

⁵ Wuho wonu wumanyike ko wandu wose Mndumii nyi afui nache.

⁶ Mulakuinadye kya kindo ma kida, indi shilya mushiwuṟye muwe moshisendya Ruwa kui wuindi na kui kifuhyo na kui mwaano.

⁷ Na ofoṟo lo Ruwa ilu lung'anye mahio hose nyilo lochiringa ngoo tsanu na makusaṟo hanu mui-walunge na Kristo Yesu.

⁸ Lyefurumia, nyo wanawawama, orio kii kya lohi, orio kii na sonu njicha, orio kii kihorotsu, orio ki kiharami, orio kichihianyi orio kisongowia, maa kui-ho kya opfudi na wuhoneri kyasho muhane-hane necha.

⁹ Ishi mulekupfunda nasho koko mukashiwada kui iicho na iwona sho muwe mochishiwuta, na ofoṟo lo Ruwa lochikaa nanyo.

Paulo aana Wafilipi kipfa kya wuleki wowo

¹⁰ Inyi njii mchihie mnu kui Mndumii cha kipfa ohido lonu mokenjihidya nalo lomitika-se ileheka ipfo kundo muweikunda kya indi mukawewuṟa mwaanya.

¹¹ Chi ngadeda njidi njiiwuṟapfo, kyamba inyi njikuloshye ikutsia na shilya njii nasho.

¹² Ngamanya ikaa njewuṟa ngamanya ikaa njiwode sha mweena. Njii mtsane njiichiwiane na shose kui kimu kui kimu, kui ikaa njii mwihutsu kui ikaa njelio n njaa, kui iwuṟa na kui iwona.

¹³ Ngakuidimya njido shose njii na ichu monjikapya owanzo.

¹⁴ Ma kikamba kido na momtana kya wucha ili mulewada kyando na shiwira shi shako.

¹⁵ Nanyo Wafilipi, muichi muwenyi mandi halya ndumi ya sia ya okiio ilewoka yongoyo ilindi njilewuka ipfo Makedonyia nyi kulaweipfo siṟi ingi iwode kyando na inyi kui itala lya tsecha na tsehenda shile nanyo mbenyi tupu.

¹⁶ Na lyandi njiwei ipfo Tesalonyikye mulenjidikya tseluya moo ma limu na kawi lang'u?

¹⁷ Chi njiipfula kitarama inyipfo, kya indi njiipfula mwengeṟya fuhendetalio fonu.

¹⁸ Na ngambona shose shamba sha mfeṟa. Nyi njilemsuṟyo njido iliindi ngamwambya osano lonu lomendo nyi Epafrodito. Lo opuo lopfama mnu necha, nyilo odambiko lukundikye luchihiana na Ruwa.

¹⁹ Na Ruwa chu oko echimsumba nyo ishi muwuṟye shose kui wusuṟi woke womanyisha wuitoṟi wu wui na Kristo Yesu.

²⁰ E-wo Ruwa chu ai na Ndeyadu nyio akaa-pfo echiwikyo wuitoṟi maheri hose halunganyi mlungana Amenyi.

Shiiṟikiṟo sha ifurumia

²¹ Kenjiiṟikienyi orio mwele ai-msanze na Kristo Yesu. Wanawawama wa wai na inyi na wamwiṟikiṟa.

²² Waele wo wamwiṟikiṟa wose, sa wasonguo-ho nyiwo wa mbenyi tsa Kaisari.

²³ Wutonga wo Mndumii Yesu Kristo wukae na mumuyo ya mrima yanu.