WAFILIPI 2 - Bibilia Kui Mdedie fo Kimochi

¹ Itutumo kui Kristo na yanjaṟyo kui ikunda na ipfungana kui Mumuyo na ililia mndu na imwichio wukiwa kokoya ho hakuwode-se nanyo.

² Ke-kundenyi chuṟa msiha foko mochikaa na mhie fumu, muwode mkundie fumu, mui na mrima fumu na kilya kimu muwe mochikikumbuo.

³ Ma mulawone moamtsa shida ya nda mulakunyashe nekushela, kya indi orio onu natane odoe msongoru muwe mokunyiiṟa mudi mose.

⁴ Kulakae echitukuya kilya kii kyake kii-kyenyi kya indi mutaramane iringa kii kya odoya.

⁵ Muwe mokumbuo kimu na kilya kiwewode Kristo Yesu.

⁶ Nao mandi awei o mkao fo Ruwa alehamba ke ikaa kimu na Ruwa liwechiwa na irakuopfo.

⁷ Kya indi alekuatuo amonyi kawada mkao fo mndu isinga kawao mfananyie fo wandu kawekoyo ai o mbuka ya mndu.

⁸ Awekunyiiṟye amonyi kawewa moidikya itane ashika opfunyi nalo luwei opfu lo msalabenyi.

⁹ Nkyo kimaduma nao Ruwa amng'anyishye adi kamsumba rina ling'anye orio rina lingi lyose.

¹⁰ Kundu orio ndi tsikuleme kui rina lya Yesu na tsa waruwehu na tsa wawanda ii na tsa wai shi.

¹¹ Na orio olimi luonguo ke Yesu Kristo nyio ai Mndumii kyewikya Ruwa Wande kiṟumi.

Saa ya Wuyana

¹² Nkyo kimwenenge nyo, mui wakunde wako, chando muwei waidiki mfiri yose chi mandi halya njiwei konu tupupfo kya indi wulalu kya ngoseṟa njii aleshe nanyo ke pfuṟukanyenyi wo okiio lonu kui wuowu na idedema.

¹³ Kyamba nyio Ruwa aitana kimu nanyo iteseheṟa na iṟunda shilya shichihianyi.

¹⁴ Kewewutenyi shindo shose mulechinunuwa ma ipfio nyi mdo.

¹⁵ Kundu muwe watechi na wasalari mui wana wa Ruwa walawode paṟi kiidi kya mbaṟi ya wandu ilee kipfuṟi ipfulukye, ipfo kiidi kyawo muiwaa cha nyenyeri tsii aa wuyana.

¹⁶ Ili muidunganyitsa dedo lilya liende moo njiwone-ho iwikyo kiṟumi kyenjiwiia mkonu fulya fo Kristo kehamba ke njilawekuwiwitya njia kya mai ma njilawekuṟohya kya wulya.

¹⁷ Kya indi ma kokoya samu yako yashika ihenda yoolo yechidasyo wuidiki wonu na iwupfuṟukanya na ngachihio ngawechihio hamu nanyo mose.

¹⁸ Na wudo nanyo kimu kewechihionyi mbechihio-wo hamu na inyi.

Timoteo na Epafrodito

¹⁹ Ngakusirya na Mndumii Yesu ke njidume Timoteo ipfo konu mkonu fo afui, kundu na inyi njihende iwihiṟyo m moo njechimanya oloho lo konu.

²⁰ Kyamba njilawode ai kyandonyi kimu na inyi echihendelya itonga kyanu chaopfo.

²¹ Kyamba waiwinya wose shilya shii shawo chi shilya shii sha Kristo Yesu.

²² Indi ichu mumwichi wutechi woke ili awei na inyi cha mana na ndee echipfuṟukanya ndumi ya sia ya okiio.

²³ Kyasia nyio njikusihye njimdume oweṟe na lulya njemanya kilya kenjidumbukya.

²⁴ Kya indi njekusirya na Mndumii ke nao inyi njechikaa njiche njimonyi mkonu fo afui.

²⁵ Kya indi ngamhamba nyi kinjiwari kyemdumya manowama chu Epafrodito ai mokyando na mongao oko kawewa msu onu monjiendie shilya sheluya moo.

²⁶ Nyi kipfa awodo m macha kyanu mose kawuko m madima nyi ili momwicho ke nyi amluo.

²⁷ Kyakyo na kya lohi aweluo kakiṟa henda ipfa, kya indi Ruwa kawuya imsaṟya. Manya chi o amonyi lesaṟyapfo nao inyi, kundu njilahoyo mbadiko na mbadiko.

²⁸ Nakyo kyanjiitika kya ngoseṟa njimdume kundu muhendechihio ili mowonana nao, nao inyi njiwihiṟyo-ho moo.

²⁹ Kyasia muambyane nao necha kui Mndumii muwodo nyi sia yose. Na wandu wai wado chao muwahonerye mnu.

³⁰ Cha kipfa nyi alekoyana na opfu echipfuṟukanya Kristo kakumba moo kundu naengeṟye-ho kilya kilewuṟika-se ipfo maikanyenyi mulenjiikanya naho.