WAFILIPI 1 - Bibilia Kui Mdedie fo Kimochi

¹ So Paulo na Timoteo lu masinga ha Kristo Yesu loiṟikiṟa waele wai Kristo-hu Yesu wa ipfo Filipi wose wai-wasanze na watarami weambuya siṟi.

² Wutonga wukae nanyo na ofoṟo lu luwukye ko Ruwa Ndeyadu na Mndumii Yesu Kristo.

Kiterewo kipfa kya Wafilipi

³ Orio mandi ngamkumbuo nyo njekeana Ruwa.

⁴ Na orio mwaanya ngaterewa njekemterewya nyo mose njewa mohamba na sia ipfo kiterewonyi.

⁵ Nyi kimaduma kya mlungie fonu muwode mokulungya ndumi ya sia ya okiio wokia mkonu foasa itane wulalu.

⁶ Nakyo nyikyo kinengye ikusirya ke ichu aweasye imbika nyo mbika iya njicha nyi echiimarisa ishikemarisika mkonu fulya fo Kristo Yesu.

⁷ Nakyo nyi kinsumhanye njiwe mokumbuo njido kyanu mose kyamba njikuwode nanyo ngoonyi momba wakyando wako wa wutonga nyo mose ipfo mshenyi njiimpfunge nayo ma ipfo kundo njekapanya ndumi ya sia na iiwanza-ho.

⁸ Kipfa Ruwa akuichye chando njiwodo nanyo mmacha mose kui mweṟeṟukye fo Kristo Yesu.

⁹ Na kindo njiimterewya na iki tupu ke, kunda lyanu lihende ifeṟyo mwengeṟya fo wulaanyi fo orio mtambahaluye fose.

¹⁰ Kundu mushike iletsana shindo shilaidikyanyi, mukae mui-waheshe senyi imu ileewa ihutso itane mkonu fulya fo Kristo.

¹¹ Muwe mui-wasuṟie owiko lo msumhanzie fuu-mbike nyi. Yesu Kristo fowikya Ruwa wuitoṟi na kiṟumi.

Ikaa na moo nyi Kristo

¹² Indi, wanawawama, njikundi mumanye ke mondu fulya foko fombuya iwiia ndumi ya sia ya okiio mweeke.

¹³ Nyi ili ipfungo lyo lyako lyamshika imanyikya wa kaisari-hu wose na walya wengi wose ke nyi lyamba kimaduma kya Kristo.

¹⁴ Na wanawawama wafoi-ho wakuwanzie na Mndumii wakaitika ikarya wechionguo dedo lya Ruwa kipfa kya ipfungo lyako walai na wuowu.

¹⁵ Kala na kwipfo wekehamba wadi Kristo wai-waamtse nyi wunyenyi na isohuo mondu kya indi kwipfo na wekemhamba kui wuheki.

¹⁶ Iwo weonguo kui ikunda wo waichi njilee-ho kekapanya ndumi ya sia ya okiio,

¹⁷ iwo wa isohuo mondu naa weonguo Kristo kya indi chi kui wuhendelipfo, nyi wakumbuo ke wafeṟye pfungo lyako wukiwa.

¹⁸ Kake kuwode monduko! Nanga Kristo nahende yongoyo njia tsose iwe ya kui ngoto iwe ya kui wusalari, inyi njii mchihie kyakyo. Na njekaa njechichihio.

¹⁹ Kyamba njiichi ke iki kyechinjinukya kya oletso kui iterewa lyanu na iteteṟa lya Mumuyo o Yesu Kristo.

²⁰ Kilya njikilangye ipfo ngoonyi kekusihya kyakyo kikeri kii-le ke, njilawone njechisuka manya-le, kya indi njikae na wukahari chando njiwei shiheri shose njiwe njido na wulalu, kundu Kristo nakuwutie-ho ihenda ṟumisho ipfo mbihu koko likawa ma kui moo fofo ma kui opfu lofo.

²¹ Lyanjiwiia inyi moo nyi Kristo na ihenda ipfa lyo lyanjisumba.

²² Indi kokoya ikaa na mafuo lyanjiendye mwaanya foṟunda maṟunda, njichi hando hesambuṟapfo.

²³ Hanjirohya ha hawi, ili limu lyanjiamtsya langa lyehenda isama na ikukaya na Kristo lyo lii inetsi mnu.

²⁴ Indi ili lingi lyekaa mafuonyilyo lyaitika kawi kimaduma kyanu nyo.

²⁵ Ili njikusihye njido na njiichi ke njechikaa-ho ntsinda nanyo mose muhende iwanzyo mwidikye na ifeṟyo msiha fofo.

²⁶ Kundu mukuwutie koko yengeṟa iṟumisha lya kui Kristo Yesu ili njekaa njishike-se ipfo konu.

²⁷ Maṟi muhende kuachia kui chile tsa mkambo tsisumhanye ndumi ya sia yehamba Kristo, kundu na ilindi ngacha ngambona ma ilindi njii kuleshe ngawio kyanu njikoye muhoṟoki mhoṟoki fo mumuyo fumu mochikapanya mwidikye fo ndumi ya sia ya okiio mupfunganyi mui mrima fumu.

²⁸ Ma mulawone mochiowesho nyi wakituwa ma kindo ma kihya. Nakyo nyi kyo kyawawiia kichano kya odetso kiwembiia nyo kyo okiio, na wudo kii-kiwike nyi Ruwa.

²⁹ Cha kipfa nyo mui-wasumbye kya Kristo ke mulawe mochimwidikya tupu kya indi muwewa mochituṟo kimaduma o.

³⁰ Ngapano ii muiwode na iya iya muwewonyi iwei yako na wulalu moicho ikeri na inyi.