WAEFESO 5 - Bibilia Kui Mdedie fo Kimochi

¹ Kikawa kido muwe mokuwaakisha na Ruwa cha wana wakunde.

² Muchumie mhendo fuu mchilie nyi ikunda, chando nao Kristo awelukundi kahenda ikudambikya Ruwa hando helukaya-pfo so kambiia odambiko na kidaso sha opfamo sa lolo da.

³ Indi wuṟuhui na wulala wose na wuehi manya wulasendo ipfo konu chando kiwari wana Ruwa.

⁴ Ma shindo sha wuruhui na wuṟenze; ma sumu tsa wutondo ma piṟisi yepiṟa. Ishi shose shisumhanyipfo, kya indi kisumhanye mnu nyi madedo heindia Ruwa na iana.

⁵ Nakyo nyikyo mukiichi mukamanya ke kwipfo mṟuhui oose ang'u o wulala ang'u mwehi nao moindya maruwa ha wongo awode kyoṟa ipfo wumanginyi wo Kristo na wo Ruwapfo.

⁶ Mulawone mndu echimlemba na madedo ha wulya. Kipfa kya ishi nyashi ya Ruwa ikeri ichea wandu wa oleho.

⁷ Ma mulawe wodoyawo wa njia ii.

⁸ Kipfa kacha muwekeri meemenyi, wulalu mukeri sa kui ikulunga na Mndumii. Chumienyi mui wana wa sa,

⁹ na sa yo yechiwono wuchenyi wose na wuhoṟotsunyi wose na owikonyi lo kii lohi lose.

¹⁰ Mochitambahanya kilya kichihianyi na Mndumii.

¹¹ Ma mulakusanze na wewuta mawuto halai mecha, halya ha meema, kya indi muwadedye.

¹² Kipfa shilya shekewuto nyiwo kiṟika shiendye mndu naṟenze na ishihamba.

¹³ Indi shose shekyuwutio senyi shimanyikie.

¹⁴ Kyamba shose shawutio kundo kuwode sa. Nkyo kimaduma; kohambo “Pang'uka iyo olaa, uṟukye uukye wapfunyi, nao Kristo echikulimika.”

¹⁵ Muambuye mnu nekuṟisa chando mochumia cha ili mui waṟango. Mulawe cha ili muwuṟye wuṟango.

¹⁶ Muwe mochihinja na mwaanya fo oweṟe muwode kipfa mkonu ii injiwicho.

¹⁷ Nkyo kimaduma mulawe cha ili mui wadumbwo mdo, kya indi muidikyane na kilya Mndumii akundi.

¹⁸ Ma mulakunanze na mpfinyo fuwode kidetsa okiio, indi muichuṟo nyi Mumuyo Mwele.

¹⁹ Mochiwiana shiimbo sha njopfundo na sha wuindi na sha wuitiki wo Mumuyo. Mowee moimbya mndumii ipfo ngoonyi tsanu na imwamtsya misinango fo wuindi.

²⁰ Anenyi Ruwa Wande maheri hose kui rina lya Mndumii odu Yesu Kristo kya shindo shose.

Waka na wamii

²¹ Muwe mochikunyiṟyana ipfo makambenyi hanu muwodo nyi wuowu woowuo Kristo.

²² Waka wakunyiṟye wamii wawo cha ili nyio Mndumii waimhidya.

²³ Cha kipfa mii ai mdo fo mka chando nao Kristo ai mdo fo siṟi, o Kristo amonyi mkiṟi o siṟi ii mbihu foke.

²⁴ Chando siṟi ikunyiṟye Kristo na wudo waka wakunyiṟye wamii kui shindo shose.

²⁵ Nyo wamii kundenyi waka wanu chando nao Kristo alekunda siṟi kawekudambikyaho mwano amonyi hando hayo.

²⁶ Kundu naitane njele echiihaṟamisha kisambyonyi kilya kya mṟinga furianyi na idedo.

²⁷ Kundu naihoṟotse oshangunyi loke amonyi ikeri siṟi ya kiṟumi ilawode mlesi ma paṟi ma ki kya shindo cha isho indi kundu iwe njele.

²⁸ Na wudo kisumhanye wasoṟo ikunda waka wawo cha mbihu yawo wawenyi. Ichu akundi mka oke nyio amonyi akukundi. (

²⁹ Ma indi kuipfo mndu awesuo nyama tsake amonyipfo, kya indi nyi eketsilela na yoṟa chando nao Kristo awutie siṟi yake.

³⁰ Kyamba so lui shiwungo sha mbihu foke.)

³¹ Nkyo kitewe Biblia ihambie, mndu o wandu echida ndee na mae kechiwadana na mka oke, nawo wa wawi wechiwangu mbihu fumu.

³² Iki nyi Kyama kikoome king'anyi inyi ngasenda nakyo Kristo na siṟi yake.

³³ Nanyo-da kimuwaṟi kui mndu kui mndu orio ose nakunde ado mka oke cha ili akukundi amonyi. Indi mka nahende yowuo mii.