WAEFESO 4 - Bibilia Kui Mdedie fo Kimochi

¹ Na wulalu inyi ili njii mpfunge kipfa kya iṟundia Mndumii ngamwikimba ke muchumie mchumie fusumhanye ndaho i mui walahye.

² Mchumie fu fuwade ikunyiṟa lyose na woloṟu wose na mununyie fose mochidaṟana muwenyi na wenyi kui kikunda.

³ Ili mohidya necha iringa mkae fo mumuyo fokaa wamu kui kilunga kya ofoṟo.

⁴ Kwipfo mbihu fumu, kwipfo na Mumuyo fumu chando mui walahie mbedyenyi fumu fo ndaho yanu.

⁵ Mndumii nyi umu, wuidiki nyi wumu, wupatiso nyi wumu.

⁶ Ruwa nyi umu nao nyio Nde o wose mokaa hiaa wose mokaa mrimenyi ya wose.

⁷ Indi orio mndu onu ose amsumbe wutonga kui kihesho kya kisumbo kilya aleinengo nyi Kristo.

⁸ Nkyo kimaduma Biblia ihambye, “O amedo na ipfo huye kawewada wapfungo kainengya wandu shisumbo.”

⁹ Ili amedo nyi kiki shila nao alemsokya hando halya hakeri shi ya hengi ha wanda ii?

¹⁰ Mokusokya na mokudoya-ho nyio umu mfi, aledo huye ya maruwehu hose kundu na weluo wuyana-wu kose welu.

¹¹ Nao nyio aleinenga wandu shisumbo: Iwa wawe wasu, na iwa waikimbi na iwa wedung'anyitsa ndumi ya okiio na iwa walisi na walosha.

¹² Keteseheṟa wandu wa Ruwa kya oṟundo lo Kristo shyaando shewika mbihu fo Kristo,

¹³ itane loshika ikoya so lose wukimu wo wuidiki na wo imanya Mana chu o Ruwa; luwe wasoṟo wasanze wechia wose msanze mochia ose watoṟikye welu ya wusuṟi wo Kristo.

¹⁴ Kundu lulakikae-se cha wakoku luwechiweṟutsoweṟutso na ipongitsopongitso nyi orio otanu lo ilosha lya wandu walembi kundu wadetse wengi kui mtaambo.

¹⁵ Indi ludede kilya kii lohi lui na kikunda lochikualukia kya shindo shose ipfo mndu-hu ichu umu-ho akeri mdo, nyio Kristo.

¹⁶ Ipfo kofo mbihu fu fose fukuwutya-ho ikaa fuu mpfungananyishe fui msanze foende-ho yalukya lya mbihu kui orio mpaye ya mwengeṟia fusumhanye wuitiki wuu wuhawye orio kilungo kimu kyose ya ikuhelwo fumenyi kui kikunda.

Moo mhya kiidi kya Kristo

¹⁷ Na wulalu kilya ngahamba na iṟingishya njikuwode na Mndumii nyi kikerikiile, ke mulakikuhendye cha wandu walaichi Ruwa wekekuhendya mhie yawo iwewa ya shindo sha melemele.

¹⁸ Mdo yawo ii mruwye meema, moo fo Ruwa fowawiia wuhenu kui wutondo wulya wui nawo kui wuumu wo ngoo tsawo.

¹⁹ Nawo ili wai ngarama wamekudambikya wulalenyi wo iwuta orio kindo kya ngafu kyose sanza na wuehi.

²⁰ Indi chi wudo mui wapfunde Kristo-pfo,

²¹ mleicho napata kyake na iloshyo mui nao, ke kilya kii lohi kikeri kiidi kya Yesu.

²² Kuatuonyi mbikie fo wumndu wo kacha muwekupaye nawo kuwoka, nafo nyi fukeri ideka kui lango tsa wulembi.

²³ Indi mukulawuo wuhya kui mumuyo fonu na mhie fonu.

²⁴ Mukuwikye mṟaye ya mndu mhya ichu amuumbe kui ofano lo Ruwa kui wuhoṟotsu na sungusihu ya kilya kii lohi na wuele.

²⁵ Ko ikyo lekanenyi na kilya kii wongo Dedenyi kya lohi orio mndu ose na ulya aṟasanyi nao kipfa orio umu onu nyi kiwungo kya mbihu fo Kristo.

²⁶ Mukadoso nyashi manya mulawute kya wunyamaṟi. Mulalekie mnengeṟi fuoloke mukuwode na okuchukuchu.

²⁷ Mulawone molusana mwaanya.

²⁸ Muiwi nalakiiwe-se, indi naṟunde necha nawe motambahanya kilya kii kicha ekisungusia na mawoko hake hamenyi kundu nakuwonye-ho kyenenga na ulya akiwuṟye.

²⁹ Dumbunyi lyanu kulawuke-pfo idedo lyiwicho; indi orio idedo lii licha lyetarama wengi, lilele na walya kowuṟyo, kundu waimwadanya.

³⁰ Manya mulawichuye Mumuyo chu Mwele o Ruwa alempfindihisya mkonu fulya fo oletso.

³¹ Lekanenyi na wupusu, na wushimbi, na nyashi, na kifahyo, na kirumo hamu na wumbafu wose.

³² Kya indi muwade mrima mhoo; muichyo mndu wukiwa mochihoṟyana muwenyi na wenyichando nao Ruwa alemhoṟya kui Kristo.