WAEFESO 3 - Bibilia Kui Mdedie fo Kimochi

Iṟunda lya Paulo ko wandu wa mkambo ingi

¹ Nkyo kitewe inyi Paulo njii mpfungo o Kristo Yesu kipfa kyanu mui wa mkambo ingi njiterewa Ruwa.

² Mukamemwicho mbo wuiṟichi wo wutonga wo Ruwa njilewawasyo kyanu.

³ Ngammanyisho kyama kikoome kui kilya mawonesyo chando njilewooka ihamba (Ngaṟehia ko kifui.

⁴ Mukaisoma moiduma imanya wutichia woko wo kyamenyi kya Kristo.)

⁵ Kilya kilawemanyishyo wandu marika halya ha kacha indi wulalu Ruwa kamanyishia wasu wake waele na waikimbi kui Mumuyo.

⁶ Kyehamba ke wa mkambo ingi waengeṟyo kyoṟenyi na mbihu-hu kimu na Wayuda osengenyi lo kiteṟyo kilya kikuwode na Kristo Yesu kui Ndumi ya Sia ya okiio.

⁷ Kyayo nyio inyi ngamtano mṟundi kui isaṟia mopfuṟukanya kui kisumbo kilya kya wutonga wo Ruwa njimwinenge kui wuitiki wo pfinya yake.

⁸ Inyi njii mtutu o wandu wose wa Ruwa. Indi njimwinenge wutonga wu woongoya wa mkambo ingi Ndumi ya Sia ya wusuṟi wo Kristo iwu wulawa itumo,

⁹ njiwatambaṟuye wandu wose wuiṟichi wo kyama kilya kya ko Ruwa mbiki o shindo shose iki kiwei kikoomye maheri halya ha kacha mṟamna.

¹⁰ Kundu wuṟango wo Ruwa iwu wufoi mbaṟi wumanyishio wasongoru na waapfinya wa ipfo ruwehu, nyi yo siṟi.

¹¹ Kisumhanye chila ya mṟamna Ruwa aleiwika iwei ya ko Kristo Yesu Mndumii odu.

¹² Na ipfo koke lukuwode lui na wutumbe wokushitsa-ho lochikusira kui wuhendeli wu woke.

¹³ Ikyo nyikyo ngaterewa mulahende iwichuyo kipfa kya shiwira shako ngalisyo kipfa kyanu, nasho shikeri imwendye kiṟumi.

Mkundie fo Kristo

¹⁴ Nkyo kimaduma mkundie fo Kristo ngapfira ndi tsako oshangunyi lo Wande.

¹⁵ Ichu adumbuye orio mbaṟi ya wandu rina ma ikeri ruwehu ma ikeri orukenyi.

¹⁶ Kundu kui kisumbyonyi kya wuitoṟi woke namwenenge muhende iṟamtsyo pfinya ipfo wumndunyi wo kya mba kui Mumuyo oke.

¹⁷ Kundu Kristo nakape kanyi koke ipfo ngoonyi tsanu kawe kui wuidiki mochikaa mokapya mri ipfo kiwanjenyi kilya kii kikunda.

¹⁸ Kundu mukuidimye necha hamu na wandu wose wa Ruwa imanya wulandari wokyo na wuleshe na wo-huye na wo-shi.

¹⁹ Na imanya ke kikunda kya Kristo king'anye mtichie ya wuṟango yose kundu muwelutso itane mochikaa na welu ya Ruwa yose.

²⁰ Ichu aidima iwuta kya woeṟa shing'anye shilya luiterewa ang'u ikusaṟa shose kui pfinya iya iludung'anye so.

²¹ O Ruwa ai na kiṟumi ipfo siṟinyi na ipfo Kristo-hu Yesu kishike ikooya marika na maheri hose. Nkyo kya lohi kyandio.