WAEFESO 2 - Bibilia Kui Mdedie fo Kimochi

¹ Kyanu nyo muwei opfunyi lo madeko na manyamaṟo hanyu.

² Muwehendekye mukuwode naho kui wuitiki wo wuyana wo kiiwulalu kya wuyana wu na wo moapfinya aiapfinya mumuyonyi, nyio moweṟu ulya echikupaya na wandu walaidikye na wulalu da.

³ Natso loose luwei chawo luweichumia lui na lango tsa nyama tsadu lochikupaya na wuitiki wo nyama na wo mahio, naso luwei wandu wapfulutsye nyashi kui mbaṟi cha walya wengi.

⁴ Indi o Ruwa molunga isaṟia ili awelukundi na mkundie fung'anyi fudo.

⁵ Kaluwika so moo fumu na Kristo matika halya luwei wapfu kui manyamaṟo nyi mui wakiṟe kui wutonga wo Ruwa.

⁶ Hamu na Yesu Kristo kawemṟutsa kechimdamiṟa kifumbinyi kimu na Kristo ipfo ruwehu.

⁷ Nyi wudo aleloṟa wandu wa maheri halya haitikiria mfeṟa welu fo wutonga woke kui wucha iwu ailuwutya so lui walungye Kristo Yesu.

⁸ Cha kipfa mui wakiṟe kui wutonga kui njia ya wuidiki. Lyo lilewutika kui pfinya yanupfo; nyi kisumbo kya Ruwa.

⁹ Chi mawuto hanu haweliendepfo, kundu manya mndu nalakuwutye-ho ikuṟumisha.

¹⁰ Kipfa so lui owiko Ruwa; lulewumbyo Kristo Yesu kundu lochiwuta mawuto mecha iho Ruwa alesonguo ihaṟeheṟa kundu luhende ikupaya naho.

Wumu kiidi kya Kristo

¹¹ Kusaṟenyi, ke ili kacha muwei mkambo ya wandu wai nyamenyi, muwesendo mulai wadine nyi wayuda wekyekuhamba walya wa odino nalo lui lo mbaṟi iya yekewuto nyamenyi tsa mndu kui owoko.

¹² Matika halya nyo muwei na Kristo-pfo, muwei wahenu ipfo mengenyi ya Israeli muwedamye mbai ya mbukaho ya kiteṟyo kilya mulawei na kindo muwei, muwei iya wuyana mulawekuwode na Ruwa.

¹³ Indi wulalu ipfo Kristo-hu Yesu, nyo ili kacha muwei wa kuleshe momecha wa afui kui samu ya Kristo.

¹⁴ Kipfa nyio ai ofoṟo lodu msanzi mosanza Wayuda na wandu wa mkambo ingi wawe wamu kedmya mfo fulya fuwei tunja fuwewika kituwa kilya.

¹⁵ Na ipfo mbihu-hu foke kawewuta nafo wuwawaso wulya wuwei wo mawiko ha wuitiki echiitsa-pfo ofoṟo.

¹⁶ Kundu wa njora tsi tsiwi nawawike mbika imu ii ya Kristo amonyi ya mndu mhya nawewaoloṟya wa njora tsi tsiwi Ruwa ipfo mbihu-hu fumu kui msalaba echiwaha na mweke fofo kituwa kilya.

¹⁷ Nao Kristo nalecha ado echimwongoya mbonyi ya Sia ya ofoṟo nyo muwei wa kuleshe na Ruwa Kaweongoya ofoṟo lu na Wayuda walya wawei wa afui na Ruwa.

¹⁸ Kyamba nyio lumbode ai moluitsa na ko Ruwa so wa njora tsi tsiwi Wayuda na wa mkambo ingi kui Mumuyo chu umu.

¹⁹ Nkyo kyainenga nanyo mulakikeri-se wahenu ma wasami, indi mui wa mṟinyi fumu na waele mui na wa kanyi ko Rṟuwa.

²⁰ Mui wawike kiwanje-hu kikiwikye nyi wasu na waikimbi, ipfo kundu Kristo Yesu akukerye-pfo iho lya ndumba mowanza kyose.

²¹ Nyio ai mopfunga mbika ya mba yose yechingana ikeri hekalu yele kui Mndumii.

²² Kui ikulunga nao, nanyo da mochiengeṟyo-ho napfo ipfo mbikenyi muwe kanyi ko Ruwa kui Mumuyo.