WAEFESO 1 - Bibilia Kui Mdedie fo Kimochi

¹ Inyi Paulo njii msu o Kristo Yesu njimbike-ho nyi Ruwa ngamwiṟikiṟa nyo mui waele wa ipfo [Efeso] mukuwode na Kristo Yesu.

² Wutonga wukae nanyo na ofoṟo ilu shiwukye ko Ruwa Ndeyadu na ko Mndumii Yesu Kristo.

Mboṟa tsa kimrima kiidi kya Kristo

³ Nawikyo kiṟumi Ruwa ichu Nde o Mndumii odu Yesu Kristo ameluonyisha na ona lo kimumuyo lose lurie shisumbo sha ruwehu shii na Kristo.

⁴ Nakyo kihianyi na kilya kilemnenga alelusambuṟa kimu nao matika halya wuyana wu wulandewiko kundu lukae waele lulawode mti ipfo oshangunyi loke.

⁵ Nyi ikunda ili aleluteseheṟya wuwana wo koke amonyi kui Yesu Kristo chando kiwechihianyi na mhie foke.

⁶ Kundu wutonga wo wusuṟi, woke iwo alelusumba kui mkunde oke wuhende iwikyo kiṟumi.

⁷ Nyio lukuwode nao ai ndalai kui samu yake awewa mhoṟye fo mafurunjo fuidikyanyi na mfeṟa fo wutonga woke.

⁸ Nawo nyiwo alewulufeṟya kui wuṟango na wutichi wose.

⁹ Echilutambahaluya kyama kikoome kya mhie yake kechidumbwo ado ipfo koke amonyi.

¹⁰ Na wudo awekuteseheṟye koke amonyi ke maheri haawutsyo nawike-ho wuiṟicha echiwikya mbika ii yose mdo fumu. Nafo nyio Kristo, ya ruwehu na iya wanda ii isanzyo ipfo koke o.

¹¹ Ipfo koke mpfo kundo naso lomewonyo-ho kyadu luwesongwo isambuṟo nyio kui mteṟie fusumhanye ichu mowika shose kui chila ya mhie foke.

¹² Kundu luwe lochiwikya wusuṟi woke kiṟumi so lulewooka iinengya Kristo lochiwedya Kristo.

¹³ Nanyo-da ili muleicho idedo lya kii lohi lya ndumi ya sia ya okiio lonu mlememwidikia na ikuwada nao, na ipfo koke muwepfindihisyo nanyo kui kisumbo kya Mumuyo Mwele ichu awemteṟio.

¹⁴ Nao ai mbetesa ya kyoṟa kyadu motalaa walya wawode menyi, kundu wuitoṟi woke wuwikyo kiṟumi.

Shiterewo kya Paulo

¹⁵ Nkyo kyannenga na inyi wokia ndeicho kya wuidiki wonu wokuwada na Mndumii Yesu na kya mkundye fonu fokundana na waele wose,

¹⁶ njekeana kitsitsi kimaduma kyanu njechimhamba shiterewonyi shako.

¹⁷ Kundu Ruwa chu o Mndumii odu Yesu Kristo nao nyio Wande menyi wuitoṟi ili molanga immanya namwenenge Mumuyo motambahalwo nawe momṟangusha.

¹⁸ Nao nawe moitsa sa ipfo ngoonyi tsanu kundu mumanye kilya kyakunda iwedyo kimcheye na ndaho yake muwemanya mfeṟa fo wusuṟi wo wuitoṟi wo kyoṟa ateseheṟye waele.

¹⁹ Mumanye na wuidimi woke chando wuikolonye shose ailukaya nawo so luidikye na ikuwada nao, nawo nyi wuwonekye ipfo kundu alekupaya na wuitiki wo pfinya yake chando wui.

²⁰ Na ipfo ko Kristo kawekupaya ado kashika imṟutsa wapfunyi kamdamiṟa ora lo owoko loke lo kulyo ipfo ruwehu.

²¹ Kidembo kyake kisongoe orio wuwee na wusuṟi na wuidimi na wuchili wose na orio wunene wo orio rina lyechiwa isendo maheri ha kiiwulalu ang'uhalya hechiitumana naho.

²² Nyi alemleṟya shose piu shi ya madende hake kawembika mdo fo siṟi mochilia shose.

²³ Nayo nyiyo mbihu foke fochiawukyana na ichu aawutsye shose mbikenyi yose.