WAEBRANIA 9 - Bibilia Kui Mdedie fo Kimochi

¹ Owiko lu lo kuwoka na luwewode sungusihu tsalo tsa wuindi sanza na yele lilya lya wanda ii.

² Kyamba hema lilealyo-ho lilya lya kuwoka. Napfondo kuwei kiwawa njolewo kilya na mesa na mkate iya iwei-maalye Ruwa. Nalyo lii idumbuye rina, Lyo yele.

³ Indi mbele ya isulya lyeshikya mongo lilya lya kawi kuweei-pfo hema lilya lihambo maele.

⁴ Lyo liwewode rasio lya sahabu lyedasya-ho shidaso sha opfamo na isanduku lya owiko lulya liwei ikapye mawala ha sahabu nyora tsose, lyo liwei na nungu ya sahabu liwode manna iya na olio lo Aron ilululembuya yoṟa, na maho halya ha kipala ha owiko lulya.

⁵ Indi huyalyo kuwewode Wakerubimu wenyi-ngeela weruwya kiaala mhoṟie iria. Kuiho kyededa kyasho kimu kimu wulalupfo.

⁶ Ishi shikamesungusio shido wakohanyi wawekehenda hemenyi lilya lya kuwoka mkonu yose wewuta shiheo sha wuindi.

⁷ Indi ihenda hemenyi lilya lingi nyi mkohanyi ulya mnene alekuhendya-pfo orio maka limu o amonyi kulawode alarie samu aidambikye-ho iwe yemkaya o iwemkaya na mkambo fose kya madeko hawo.

⁸ Lyo nyi lya Mumuyo Mwele amanyishye nalyo ke njia yeduo wuelenyi ilandeshika ipfunguka, ili indi hema lya kuwoka likihoṟoki-seho.

⁹ Lyo lii mfanano fotungya maheri ha halemcha. Nafo fuwei na njodambiko na shidaso shiwekeendo ma shilaweidima iwanza sheko sha mrima fo mowika nasho wuindi.

¹⁰ Shiwekuwode na shelya na shenyo shiishenyi na maolyo ha mbaṟi ii na ii, sha sungusihu tsa shinyama tsiweindikye tseringa kiheri kya wusumhanzo itane kishike iwoneka.

¹¹ Kya indi Kristo amekuchea ai mkohanyi ang'anyi o mecha hai-mateṟye kakuidya hemenyi lilya ling'anyi liawukye kota lilya li-itane na mawoko, lyo lihambie ke lilai lya mtsanye fo ki-wulalu.

¹² Kakuidya-ho chi kui samu ya oṟo ang'u ya mahache, kya indi nyi kui samu yake ii njenyi kahenda hando halya haele ili limu kechiwika ndalai yekaa mlungana.

¹³ Alewo kokoya samu ya oṟo na ya chau sanza na mtsiri fo taho nkoṟe sheolya wawode paṟi shekeilisha mndu shimbonye-se wukeha wo kii-nyama.

¹⁴ Nyi wuda kya ngoseṟa samu ya Kristo ichu alekudambikya Ruwa amonyi ai mkeha kui mumuyo molungana echiilisha sheko shilya sha mrima yanu iletsano na matendo ha opfu, iwe yepfuṟukanya Ruwa menyi mo?

¹⁵ Ikyo kyanenga ai moitsa-ho owiko luhya kundu walya wai walahe wahendeambya kyoṟa kilya kiweikiteṟye kii kya mlungana, ipfa lilya likamewa lyechiwuta-ho matahachyo haweitano ipfo kiwanjehu kya owiko lo kuwoka.

¹⁶ Kyamba ipfo kundo kuwudo owiko lui lo kyoṟa nyi kiwaṟi ipfa lya mowika litane liṟingishyo.

¹⁷ Kipfa owiko loshika iwanga mandi ipfa lilya lyamhoya, indi lolaa wanda kiheri mowika aiho-se.

¹⁸ Nkyo kitewe manya lulya lo kuwoka lulehoṟotso-ho chila samu iwei-hopfo.

¹⁹ Cha kipfa mandi Mose alemaa iwia mkambo fulya mawawaso haitumananyi ipfo wuwawasonyi hose kawada samu ya mahache na oṟo sanza na mṟinga na pamba ya king'aring'ari na iṟa lyeola kaolya nasho kitapu kilya kiikyenyi na mkambo fulya fose.

²⁰ Kahamba, “Aii samu ya owiko lu Ruwa amtutumye.”

²¹ Na wudo kaweolya na hema lilya na shihia sha wuindi shose samu.

²² Kala nyi kufui shindo shose shekeilisho na samu woidikya wuwawaso; na shila samu yapusuo kowonyo mhoṟyepfo.

Ikudasa lya Yesu lyasanja Madeko

²³ Nkyo kyaitika ke ili mfano iya ya shindo shii maruwehu yakunda iilisho idi, shilya sha maruwehu shii shenyi shikundi shidaso shiidimikye kota shilya.

²⁴ Kyamba Kristo alawehenda hando haele hai-hawike na mawoko hahambie halya ha lohi kui mfano, kya indi kahenda ruwehu kwenyi nakuloṟe oshangunyi lo Ruwa wulalu echiluhoṟokya-ho so.

²⁵ Manya alawehenda-ho kundu nakudambikie amonyi kafoi chando mkohanyi mnene ekehenda hando halya haele orio maka arie samu ilawei yake.

²⁶ Kima nao na wudo nyi aweitika iwawyo kafoi wokia mandi wuyana wulembiko. Indi wulalu alewoneka-ho limu mainutsyonyi ha maheri nawute-ho wunyamaṟi kui ikudasa amonyi.

²⁷ Nakyo kirianyi na kya wandu ili kiwawaṟi wapfe limu. Likamewa washike yanduyo.

²⁸ Na wudo na Kristo nyi aledambiko-ho limu lyewuta-ho manyamaṟo ha wandu wafoi; Ili lingi echikuloṟa na walya waimbedya kya okiio alawinye wunyamaṟi.