WAEBRANIA 8 - Bibilia Kui Mdedie fo Kimochi

¹ Indi kilya kikeri mdo-hu kiidye ishi lomaa ihamba shose kikeri kidi; ke luwode mkohanyi ai mnene adi akudamiṟye ora lo kulyo lo kidembo kya wuitoṟi wo Ipfo maruwehu.

² Aiipfo moiṟicha shilya shii sheele na hema lilya lya lohi Mndumii aleliwika-ho amonyi, chi mndu o wandupfo.

³ Kyamba orio mkohanyi mnene ekewiko kundu nadambikye-ho njodambiko na shidaso. Na ichu nawudo kimbaṟi nakae awode kyedasya-ho.

⁴ Kima aweiya sangenyi chi awewa mkohanyipfo kimaduma kuwode wekedambkya-ho njodambiko tsilya tsiinjiwawase nyi wuwawaso.

⁵ Nyiwo wekeṟundya mfano na mangeṟingesha ha shilya shikeri ruwehu, chando Mose aleshika itutumyo ili indi awerie isungusia hema lilya. Kyamba ahambie ke, “Ambuya mnu ochitana shose kui mfano fulya uleloṟo ipfo fumvu-hu lilya.”

⁶ Indi wulalu amkoya wuiṟichi wung'anyi wo ngoseṟa wuwukye ipfo kundo akukerie-ho mombele o owiko lochia kya ngoseṟa ilu luiilikishye mengenyi ya shiteṟio shicha kota shilya.

⁷ Kyamba kima lulya lo kuwoka luwechia lulawewa idedya kuwechipfulo-ho otende lungipfo.

⁸ Kyamba awadedya kehamba, “Mndumii ahambie, Ambuya, mkonu ikeri icha njechiwikya mba ya Israeli na mba ya Yuda owiko luhya.

⁹ Nalo lulawaakye owiko lulya njilewikya wande yawo mkonu fulya ngamewateteṟa na owoko njewashuo ipfo orukenyi lo Misiri, kyamba wo walawekaa owikonyi lo loko na inyi ngamewaseheṟa. Nyi wudo Mndumii ahambie.

¹⁰ Na owiko, Mndumii ahambie, ilu njechiwikya mba ii ya Israeli ili indi mkonu iya yamesia lukeriludi; ke njechihomoya njowawaso tsako ipfo mhienyi yawo njechitsiṟehya ipfo ngoonyi tsawo. Na inyi njechiwawiia Ruwa nawo wechinjiwia mkambo.

¹¹ Ma kochikaa-pfo echilosha odoya ma ihenda iwia odoya manya Mndumii-pfo. Kipfa wechinjimanya wose wokia ichu ai mtutu owo shika ichu ang'nyi.

¹² Kyamba njechiwa mowasaṟia madeko hawo, na manyamaṟo hawo njechihakumbuo-sepfo.”

¹³ Ili indi ahambye, luhya, nyi alekuṟa lulya lo kuwoka. Indi kilya kii kikuṟe kiikifoye wuku kyo kiitikirie afui na ihenda saramaya.