WAEBRANIA 7 - Bibilia Kui Mdedie fo Kimochi

¹ Na Melkisedeki cho awei mangi ya Salemu mkohanyi o Ruwa ichu o huyashose. Nao kahenda yambya Abrahamu ili indi alewuka ngapanonyi iya yewinza wamangi walya, kamkumbuhana kembikya ona.

² Nyio Abrahamu kahenda imlekia kilya kyeshitsa ikumi kya shindo shilya shose. Nao asonguo ihambo mangi menyi wuhoṟotsu kawehambo lingi mangi ya Salemu lyo lihambye mangi menyi ofoṟo.

³ Alaimsende ma kui wande ma kui wama ma kui kiriterite kya waku, alawode ma kiheri mkonu yake iwoke-ho ma kiheri moo foke fuinukye nakyo. Aimbaakishye Mana chu o Ruwa akaa mkohanyi o kitsitsi.

⁴ Keambuyenyi-wo ichu chando ang'anyi Abrahamu mku chu mnene kamnengya kilya keshitsa ikumi kya madambiko halya.

⁵ Lohi na walya wa wana wa Lewi waiwadambikye wukohanyi wulya, wo wawode iwawaso lyewesa mkambo shilya shishitsye ikumi shiidikyanyi na wuwawaso. Nafo nyi fui fo wanawawama wawo wapaṟikye kitsi-hu kya Abrahamu.

⁶ Kya indi ichu alawa isendo na kiriterite kya waku ipfo kowo, o aleambya kilya kishitsye ikumi kya shilya sha Abrahamu kawikya ichu awembikye shiteṟyo shilya ona.

⁷ Indi kii-ho kilechiwa iteshuo nyi kikeri kidi, ke kilya kii kitutu kyo kyechiwikyo ona nyi kilya king'anyi.

⁸ Na iya nyi wakukerye wadi wandu wepfa waambya shilya sheshitsa ikumi, indi ulya handu akukerye aimṟingishye ke nyi ai na moo.

⁹ Ngahamba kyehambika ke nao Lewi chu moambya sheshitsa ikumi alembeso kishitsye kya ikumi kui Abrahamu.

¹⁰ Kipfa awei-se kitsinyi kya mku oke mandi akumbuhananye Melkisedeki.

¹¹ Mkambo fo wandu fomewawasyo wukohanyi-hu wo ki-Lewi, kya indi kima nyiwo wuweawutsya wuawutsi nyi ki kilekiitika-se iwika-ho mkohanyi ungi arianyi na kamba lya Melkisedeki, alasendo na kamba lya Aron?

¹² Kyamba ipfo kundo wukohanyi wolacho kokuwukya-ho na wuitiki woilacha wuwawaso.

¹³ Kyamba ichu aihambo na isho nyi apaṟikye osharinyi lungi hondo kulawewukie echiṟunda rasionyi.

¹⁴ Kumanyikye na pata ke hando Mndumii odu apaṟikye ipfo ko Yuda, na oshari lu Mose alelusendya wukohanyipfo.

¹⁵ Na iki kyakishika itambahaluka-se kya ngoseṟa ili kowiko-ho mkohanyi ungi ai-mbaakishye Melkisedeki.

¹⁶ Alawewa adi kui owiko loliwawasya na njia ya kii-nyama, kya indi kawewa adi kui pfinya ya moo fulechipaṟakana.

¹⁷ Kyamba aṟingishyo, ke iyo ui mkohanyi o mlungana kui kamba lya Melkisedeki.

¹⁸ Lyo nyi lyawuta-ho iwawaso lisongoe-ho cha kipfa liweifafaa lilawewa. Kyamba wuwawaso wulaleawutsia ma kindo kiawukiepfo.

¹⁹ Kukaitso-ho owedo lu ucha kota, lyo lyaluduo oshangunyi lo Ruwa.

²⁰ Kinene-ho nyi nyamu iya. Wo wawekewa wukohanyi tare nyamu.

²¹ Indi ichu kawiko-ho kui nyamu ya mohenda imbia; “Mndumii alelya nyamu, ma alechieweṟo kyayo kehamba, Iyo ui mkohanyi o mlungana.”

²² Ipfo kundo alawewiko-ho tare nyamu nyi hondo Yesu kawa mwiṟichi moiṟicha owiko lochia kota lulya lungi.

²³ Nawo wai wafoi wawewa wakohanyi cha kipfa nyi walechikaa wai wadumbuo nyi opfu.

²⁴ Indi ichu ili ekaa mlungana awode wukohanyi wulechiteshuka.

²⁵ Ikyo kyaenenga aidima iwonya iwa waichea Ruwa wakuwawie nao okiio lo mlungana, kipfa ekaa na moo maheri hose mowaterewya-ho.

²⁶ Na mkohanyi mnene ai ado nyio alusumhanye kawa menyi wuindi mkeha ose, alawode huya maruwehu.

²⁷ O alamwitike mfiri yose cha wakohanyi wanene walya wesonguo iwika-ho shidaso sheoloṟa manyamaṟo hawo waweny wechifurumia na shilya sha ha mkambo, Kyamba ikyo amaa ikiwuta limu echikudambika-ho amonyi.

²⁸ Kyamba wuwawaso wulya wotana wandu wakohanyi wanene wawode wunyonge, indi dedo lya nyamu iya iitumanyi wuwawaso lyawika-ho Mana mokaa mlungana aawukie kose.