WAEBRANIA 6 - Bibilia Kui Mdedie fo Kimochi

¹ Nkyo kitewe luleke isenda mbonyi tsa Kristo hando tsiasie, luhende itambahanya tsilya tseawutsia; lulakiwike-se kiwanja lya kawi kii kya mdumbuye fowuta-ho macha ipfo mawutonyi haende opfu, kii kya mwidikye foyalukya Ruwa.

² Kii kya wupatiso na kya ihekya mawoko, na kya iṟuka lya wapfu na kya mwanduye of mlungana.

³ Na ikyo lochiwuta kokoya Ruwa aluikaya.

⁴ Cha kipfa iwa waleimikyo limu wakasonja kisumbo kilya kiiruwehu wakawehawyo Mumuyo Mwele.

⁵ Wakawesonja dedo lya Ruwa lilya icha na pfinya tsilya tsa mandi halya hechicha.

⁶ Kokoya iwo wawuka kambenyi nyi kyalema iwalawuya mdumbuye lya kawi ili wai wandu wamewuya ikukapya Mana chu o Ruwa msalabenyi wakawemselya mnyeri.

⁷ Kyamba teri iya yechionga mvuo yekeikapa kafoi ikadosa mboha yechihiṟa iwa ikeri idemyo kyawo nyiyo yaonyisho nyi Ruwa.

⁸ Indi iya ingi yekeende msha na maduo iwode kiweṟepfo, ikeri afui iseso yechifurumia ikumbyo modo.

⁹ Indi nyo wakunde, kyanu lokusirya kii kiwungi kii kicha kirianyi na okiio ma ili lodeda ludi.

¹⁰ Kyamba Ruwa alai mlemeshi awechihadima wina lyanu na kunda lyanu muwewonye rina lyake ili indi muweipfuṟukanya waele walya, na iwapfuṟukanya mui.

¹¹ Na lulalakye mnu ke orio mndu onu ose nawe momanyishya-ho wuitiki wu wumu wo mfeṟa fo owedo lulya shika mawutsyonyi.

¹² Kundu mulahombye kya indi mukuwaakishane na walya waoṟa shiteṟio shilya kui mwidikye na mkutirisie.

Kyaasa kya Ruwa nyi kya lohi

¹³ Kyamba Ruwa alewikya Abrahamu kyasa, nao ili alawewode ungi awechiidama ilya nyamu kui ilya lyake kahenda kulia nyamu koke amonyi.

¹⁴ Kehamba, “Nyi lohi yonyisha njechikuonyisha, ipfumbutsa njechikupfumbutsa pfumbu.”

¹⁵ Nao kakutirisia ado kashika ikoya kyasa kilya kyaawutsyo.

¹⁶ Kyamba wandu wekelya nyamu kui ichu awang'anye, na nyamu nyi mṟasa fo orio Ngano ipfo kowo yechiwanza dedo.

¹⁷ Na wudo Ruwa ili alekunda iloṟa weoṟa kyasa kilya wutumuhari wo kyama kyake kui wuitiki wung'anyi kasanzia-ho ilya nyamu.

¹⁸ Kundu lukae wakarishe kui pfinya lukuwode na njowiko tsiwi tsihoṟoki tsilawewa iwiko nyi Ruwa tsa wongo lochiwingya ikuwada na owedo lulya lui wasumbe.

¹⁹ Lo lulukerye kipfunga mrima kiwangi kitumuhaa kikeri ikuhendya ora lo kya mba ipfo kundu kiṟikishya kilya kiishingya-ho.

²⁰ Nyi hondo Yesu alekuidya-ho molusongoya-ho so kawa mkohanyi mnene kui kamba lya Melkisedeki.