WAEBRANIA 5 - Bibilia Kui Mdedie fo Kimochi

¹ Kyamba orio mkohanyi aimtunge kiidi kya wandu awiko-ho mokaya wandu kya kiheo kyeṟundia Ruwa, kundu namdambikye njooko na shidaso sheoloṟa manyamaṟo.

² Echiidima ikapa na itsitsa walya walaichi kindo wechitangatanga, ili nao amonyi arie wufafa.

³ Na kimaduma kyawo kimbaṟi nawike-ho kidaso kyeoloṟa manyamaṟo, kiwe kido kipfa kya wandu kiwewa kido na kipfa kyake amonyi.

⁴ Ma kwipfo awada wunene wu kui pfinya yake amonyipfo, kya indi ashika ilaho nyi Ruwa cha Aron.

⁵ Na wudo Kristo chi o amonyi alekuwikya wuitoṟi wu nawe mkohanyi mnenepfo, kya indi ichu alembia, “Mana chu oko nyio iyo, nyi inu ngakufee.”

⁶ Na wudo ahambie handu hengi, “Iyo ukeri mkohanyi o mlungana o kamba lya Melkisedeki.”

⁷ Nao mafiri halya awei nyiamenyi tsake nyi aledasya ichu aleidima imletsa opfu shiterewo na sheeṟeṟo na shifuhio echimlilia malilio ha pfinya na imtonyitsya mchenyeṟe kashika iidikyo na iletso wuowu wuwembode.

⁸ Manya ai Mana na ipfo kundo aweiwawyo hakuwutia-ho ikulosha iidikya.

⁹ Ili alemaa yawutsio adi, lyo likamtana moendie iwa wamwidikye okiio lo mlungana wose.

¹⁰ Kaichimbiṟo nyi Ruwa mkohanyi o kamba lya Melkisedeki.

Iwawaso lya Ideko

¹¹ Kyake o kuweipfo shifoi shededa indi shirohie idambuya cha kipfa nyo muhombie mnu maadanyionyi.

¹² Kyamba na kiheri kilemkuidya kiwemtana walosha, na muwuṟie-se lingi muhende losho shichano sha mbonyi tsa Ruwa sha kuwoka, mukawemba wandu wawuṟie oseṟi chi shelya shumu.

¹³ Kyamba orio mndu monyo oseṟi aichiwie mbonyi tsa wuhoṟotsupfo, nyi akeri ndaka.

¹⁴ Indi shelya shumu shisumhanye wandu watimie, nyiwo wandu wawode pfinya tsetichia shindo tsii njiohishe kui mwichiwie tsewa iletsa kicha na kiwicho.